WAHYU 21 - JANJAI BLAU Lem Bahaso Jang Bebilai

Lenget blau ngen bumai blau

¹ Lajau uku kemliak lenget de blau ngen bumai de blau. Lenget pertamo ngen bumai pertamo nyep, serto laut nyep.

² Mako uku kemliak kota sucai o, adeba Yerusalem de blau, tu'un kunei surgo kunei Allah. Kota o bi seniap awei pengaten selawei nrias utuk magea matenne.

³ Lajau uku temi'uk sa'ei de kembiak lek kunei takhta o madeak, “Uyo penan tinggea Allah adeba besamo-samo ngen manusio! Si bakea idup ngen tobo'o, ngen tobo'o bakea jijai umat-Ne. Allah suang bakea ade ngen tobo'o ngen jijai Allah tobo'o.

⁴ Si bakea musep bioa matai kunei matai tobo'o. Kematian coa bakea ade igai; ibo, tangisan, atau duko cito bakea cigai. Hal-hal de an bi nyep.”

⁵ Lajau Si de temot neak das takhta o madeak, “Uyo Uku bi menea kutene blau!” Si madeak kulo ngen uku, “Tulisba dio, sebab kecek-kecek yo benea ngen dapet cayo.”

⁶ Lajau Si madeak, “Bi selsei! Ukuba Tuhan kunei Pertamo ngen Terakhir; Ukuba Tuhan kunei mulo sapei akhir. Tiep tun de haus, bakea Uku melei bioa ngen cuma-cuma kunei matai bioa de melei idup.

⁷ Tun-tun de menang bakea temimo kutene yo. Uku bakea jijai Allahne, ngen si jijai anok-Ku.

⁸ Tapi tun-tun penyaben, tun-tun de coa pecayo, tun-tun keji, pembunuh, tun-tun zina, penyihir, tun de nyembeak patung ngen kute pendusta, bakea nuang moi lem lautan opoi ngen bli'ang de lai, adeba kematian de keduai.”

Yerusalem belau

⁹ Do kunei antaro ketujuak malaikat de sudo megong penan-penan de penuak ngen ketujuak bencano terakhir o teko ngen uku ngen madeak, “Maro! Uku bakea kemten ngen udi pengaten selawei, adeba pengaten selawei Anok Bebirai.”

¹⁰ Mako Roh Allah kemuaso uku, ngen malaikat o mbin uku moi das tebo de kembiak lekat. Si kemten ngen uku Yerusalem, kota sucai o, kota o tu'un kunei surgo, kunei Allah.

¹¹ Kota o penuak ngen kemulioan Allah ngen cahayone serai awei butau permata, awei butau baiduri panden de jeniak awei kristal.

¹² Tembok neak sekelilingne lai lekat, ngen gerbangne duai belas bueak, jenagai duai belas malaikat. Neak das gerbangne ade tulisan gen-gen keduai belas suku bangsa Israel.

¹³ Ade telau gerbang de madep moi kute arah: telau neak adep Timur, telau neak adep Selatan, telau neak adep Utara, ngen telau neak adep Barat.

¹⁴ Tembok kota o ten'gok neak das duai belas butau pondasi. Neak butau-butau pondasi o ade tulisan gen-gen keduai belas rasul Anok Bebirai o.

¹⁵ Malaikat de miling ngen uku o temuan tokot pengukua kunei mas, utuk mukua kota o, gerbangne ngen tembokne.

¹⁶ Kota o betukne segai pat – panjangne serai ngen libeane. Mako malaikat o mukua kota o ngen tokot pengukuane; ternyato panjangne duai puluak pat ribau kilo meter, libea ngen lekatne serai awei panjangne.

¹⁷ Ketiko malaikatne mukua tembokne, ternyato lekat sotos pat puluak pat hasta, temurut ukuran manusio, de adeba kulo ukuran malaikat.

¹⁸ Tembok o nea kunei butau baiduri panden tapi kotane su'ang kunei mas murni, jeniak awei kaco.

¹⁹ Butau-butau pondasi o nrias ngen kute mecem butau permata. Butau pondasi de pertamo nea kunei butau baiduri panden, de keduai kunei butau nilam, ketelau kunei butau yakut, kepat kunei butau zamrud,

²⁰ Kelemo kunei butau baiduri sepah, kenum kunei butau delima. Ketujuak kunei butau ratna cempako, ke delapen kunei butau pirus, ke sembilan kunei butau topas, ke sepuluak kunei butau krisopras, ke seblas kunei butau lazuardi, ngen de keduai belas kunei butau kecubung.

²¹ Keduai belas gerbangne ade duai belas mutiara, masing-masing bang nea kunei do mutiara. Dalen neak kota o nea kunei mas murni, jeniak awei kaco.

²² Uku coa kemliak Bait Sucai neak lem kota o, sebab Bait Sucaine adeba Tuhan su'ang, Allah De Mahakuaso, ngen Anok Bebirai o.

²³ Kota o coa perlu cahayo matai bilai atau bulen, sebab kemulioan Allah tem'angne, ngen Anok Bebirai o adeba lapune.

²⁴ Bangsa-bangsa neak dunio bakea paneu neak lem cahayone, ngen rajo-rajo kulo bakea mbin kekayaan tobo'o moi lem kota o.

²⁵ Bang-bang kota o bakea tukok terus; coa bakea tenutup, sebab coa ade kelmen neak di.

²⁶ Kebesaran ngen kekayaan bangsa-bangsa bakea nembin moi lem kota o.

²⁷ Tapi tun de menea hal-hal de najis, atau tun de ngike – pokokne jano de najis, coa bakea masuk moi lemne. De bakea masuk cuma tun de genne tetulis lem Bukau Tun Idup, bukau Anok Bebirai o.