WAHYU 20 - JANJAI BLAU Lem Bahaso Jang Bebilai

Tetang waktau seribau taun

¹ Sesudo'o uku kemliak malaikat tu'un kunei surgo. Neak tangenne si megong kucai jurang maut ngen debueak ratoi lai.

² Lajau si temakep nagai o, dung tuai o, – adeba Iblis atau roh kidek o, – ngen si meketne utuk seribau taun anne.

³ Sesudo'o malaikat o muang nagai o moi lem jurang maut, lajau kemucai jurang o ngen semegelne, supayo nagai o cigai dapet mike bangsa-bangsa ayok masa seribau taun o abis. Sesudo'o si harus npas utuk waktau de siket.

⁴ Lajau uku kemliak takhta-takhta, ngen tun-tun de temot neak takhta-takhta o nelei kuaso utuk melei keputusan ukuman. Uku kemliak kulo tun-tun de sudo tentus ulaune kerno tobo'o melei saksai tetang Yesus, ngen melei namen firman Allah. Tun-tun o coa nyembeak benatang, atau patungne. Tobo'o kulo coa perneak temimo tando benatang o neak ning atau tangen tobo'o. Mako tobo'o idup igai ngen meriteak sebagai rajo besamo Kristus selamo seribau taun.

⁵ Dioba tahap pertamo tun-tun matei nidup igai. (Tapi tun-tun matei luyenne coa nidup igai selamo maso seribau taun o.)

⁶ Riangba tun-tun de nidup igai lem tahap pertamo o. Tobo'o patas jijai de Allah temuan. Kematian tahap keduai coa bekuaso das tobo'o. Tobo'o bakea jijai imem-imem Allah ngen imem-imem Kristus. Ngen tobo'o bakea meriteak besamo Si seribau taun anne.

Iblis nukum

⁷ Sesudo abis masa seribau taun o, Iblis bakea bebas kunei selne,

⁸ ngen si bakea lalau mike bangsa-bangsa de tersebea neak kute dunio, adeba Gog ngen Magog. Iblis kemopoa tobo'o utuk perang, suaktau jumlah de kembiak lai, kedau benei neak laut.

⁹ Mako tobo'o kulo becibea moi kute dunio, lajau kempung perkemahan umat Allah ngen kota de Allah kasihi. Tapi opoi tu'un kunei lenget ngen mbem tobo'o.

¹⁰ Sesudo'o de mike tobo'o, nuang moi lem lautan opoi ngen bli'ang. Neak di ba penanne benatang ngen nebai palsu o nuang lebiak dute. Tobo'o bakea senikso lueng kelmen utuk selamo-lamone.

Hukuman terakhir

¹¹ Sesudo'o uku kemliak debueak takhta putiak de lai ngen Si de temot neak dasne. Lenget ngen bumai nyep kunei adep-Ne, sehinggo coa keten igai.

¹² Ngen uku kemliak tun-tun matei, lai titik, je neak adep takhta o. Mako kiteb-kiteb kulo nukok. Lajau debueak kiteb de luyen nukok, adeba Kiteb Tun Idup. Sesudo'o ukuman nelei ngen tun matei, setipal ngen plep tobo'o temurut de ade neak lem bukau-bukau o.

¹³ Lajau laut semreak tun-tun matei de ade neak lemne. Maut ngen Alam Maut kulo semreak tun-tun matei de ade ngen si. Ngen tun-tun matei o kutene nelei ukuman setipal ngen plep tobo'o.

¹⁴ Sesudo'o Maut ngen Alam Maut nuang moi lem lautan opoi. (Lautan opoi yo adeba kematian tahap keduai.)

¹⁵ Tun-tun de genne coa tetulis neak lem Bukau Tun Idup, nuang moi lem lautan opoi.