WAHYU 2 - JANJAI BLAU Lem Bahaso Jang Bebilai

Pesen utuk jemaat neak Efesus

¹ “Ngen malaikat jemaat neak Efesus, tulisba awei yo: Dioba pesen kunei Si de megong ketujuak bitang pado tangen kanen-Ne, ngen paneu neak antaro ketujuak kekea lapu mas o.

² Uku namen jano de udi nea: Udi kerjo keras ngen udi kembiak sabar. Uku namen bahwo udi coa melei atei ngen tun jahat. Ngen tun-tun makau diraine rasul padahal iso, sudo udi ntes, ngen udi namen bahwo tobo'o mike.

³ Udi tep sabar ngen udi saro kerno Uku, ngen udi coa putus asa.

⁴ Tapi dio keberatan-Ku teadep udi: Udi coa igai mengasiak Uku awei semulo.

⁵ Sebab o, tingetba padeak ke'uakne udi bi us! Tobatba kunei duso-dusonu, ngen neaba jano de udi nea semulo. Amen coa, mako uku bakea teko ngen udi, mok kekea lapu o kunei penanne.

⁶ Tapi ade de baik ngen udi, adeba: Udi jengik ngen plep tobo penotoa Nikolaus, de uku jengik kulo.

⁷ Api dapet temi'uk, lokba temi'uk jano de nadeak Roh Allah ngen jemaat-jemaat! Tobo'o de menang, bakea Uku melei izin mbuk bueak kunei pun kehidupan de idup neak surgo.”

Pesen utuk jemaat neak Smirna

⁸ “Ngen malaikat jemaat neak Smirna, tulisba awei yo: Dioba pesen kunei Si de Pertamo ngen Terakhir – de sudo matei ngen idup igai.

⁹ Uku namen kesaro-kesaro udi; Uku namen udi peset – tapi sebeneane udi kayo! Uku namen fitnahan-fitnahan tobo'o, de madeak diraine tu Yahudi, padahal iso; tobo'o adeba umat Iblis!

¹⁰ Jibeakba saben te'adep penderitaan de coa an igai harus udi meding. Tinget, Iblis bakea embin kekedau kunei udi masuk lem sel utuk cemubo udi. Udi bakea saro puluak bilai an ne. Lokba udi setia ngen Uku sapei matei, mako Uku bakea melei ngen udi idup sejati ngen kekal sebagai hadiah kemenangan.

¹¹ Api temuan ti'uk, lokba si temi'uk jano de nadeak Roh Allah ngen jemaat-jemaat! Api de menang si coa bakea saro kerno kematian de keduai.”

Pesen utuk jemaat neak Pergamus

¹² “Ngen Malaikat jemaat neak Pergamus, tulisba awei yo: Dioba pesen kunei Si de megong pedang tajem matai duai.

¹³ Uku namen neak ipe udi tinggea, neak penan Iblis tinggea. Udi setia ngen Uku. Mala ketiko Antipas, saksai Uku de setia o, nunuak neak adep udi neak penean Iblis tinggea, udi coa murtad bahwo udi pecayo ngen Uku.

¹⁴ Tapi awei yo ade kekedau hal de Uku coa senang kunei udi: Ade pa'o tun neak antaro udi de temotoa jano de najea Bileam. Bileam majea Balak awei ipe jemrumus umat Israel moi lem duso; ngen mbujuk tobo'o utuk mbuk kembuk de sudo seniap ngen patung, menea hal-hal de cabul.

¹⁵ Awei o kulo ade neak antaro udi tun-tun de be pegong ngen ajaran penotoa Nikolaus.

¹⁶ Sebab o, tobatba kunei duso-dusonu! Amen coa, tegoa igai Uku bakea teko ngen udi, merang tun-tun o ngen pedang de ade neak bibia-Ku.

¹⁷ Api temuan ti'uk, lokba si temi'uk jano de nadeak Roh Allah ngen jemaat-jemaat! Api de menang, bakea Uku melei izin embuk manna de tebunyin, masing-masing bakea temimo kunei Uku debuak butau putiak. Pado butau o tetulis do gen de belau, de coa namen api bae, seluyen tun de temimone.”

Pesen utuk jemaat neak Tiatira

¹⁸ “Ngen malaikat jemaat neak Tiatira, tulisba awei yo: Dioba pesen kunei Anok Allah, de matai-Ne awei opoi ngen kekea-Ne awei temagai.

¹⁹ Uku namen kute de udi nea – Uku namen udi mengasiak sesamo udi, udi setia, udi bekerjo, ngen udi tabah menderita. Uku namen udi uyo bekerjo lebiak dau kunei bel'o.

²⁰ Tapi dio keberatan-Ku teadep udi: Udi melei atei ngen Izebel, selawei de makau diraine suruhan Allah. Bi dau hamba-hamba-Ku de tepike ngen de najeane utuk menea zinah ngen Utuk embuk kembuk persembahan patung.

²¹ Sesudo Uku melei ngen si kesepatan utuk tobat kunei duso-dusone, tapi si coa lok bedan menea hal-hal de zinah o.

²² Tingetba! Uku bakea meting si sapei bolon neak penan tidua. Neak di si ngen tun-tun de berzinah ngen si bakea kembiak menderita. Kutene o bakea Uku nea uyo – kecuali amen tobo'o bedan menea hal-hal de kidek besamo-samo ngen si.

²³ Penotoa-penotoane bakea Uku munuak kulo supayo kute jemaat sadar bahwo Ukuba Si de namen pekeran ngen atei manusio. Uku bakea males udi temurut plep udi masing-masing.

²⁴ Tapi udi de luyen-luyenne neak Tiatira coa temotoa ajaran de kidek o, ngen coa belajea lemau-lemau Iblis. Uku madeak bahwo Uku coa bakea nambeak beban luyen ngen udi.

²⁵ Tapi sapei waktau Uku teko be, lokba udi tep temotoa jano de sudo udi temuan.

^26-27 Tobo'o de menang, ngen sapei akhir bogoa menea jano de Uku lok, bakea Uku melei kuaso de serai awei de Uku temimo kunei Bapa-Ku. Tobo'o bakea temimo kuaso kunei Uku utuk meriteak bangso-bangso ngen tokot besai, ngen utuk majua bangso-bangso o awei ko'on kunei pitok.

²⁸ Tobo'o bakea temimo bitang timur kunei Uku.

²⁹ Api temuan ti'uk, lokba si temi'uk jano de nadeak Roh Allah ngen jemaat-jemaat!”