WAHYU 18 - JANJAI BLAU Lem Bahaso Jang Bebilai

Ajuane Babel

¹ Sesudo'o uku kemliak malaikat luyen tu'un kunei surgo. Si temuan kuaso de lai, ngen kemulianne menea kute bumai jijai te'ang.

² Ngen sa'ei de lek, si mengang, “Sudo ajua! Babel lai bi ajua! Uyo si jijai penan semat-semat ngen roh-roh kidek. Neak lemne idup kute mecem burung de najis ngen de jengik tun.

³ Sebab kute bangsa bi mbuk anggur nafsu perzinahanne. Rajo-rajo dunio menea zinah ngen si, ngen pedagang-pedagang neak bumai jijai kayo kerno coa taen ngen nafsune.”

⁴ Lajau uku temi'uk sa'ei luyen kunei surgo madeak, “Kelueaba, umat-Ku! Kelueaba kunei lemne! Jibeakba udi temotoa duso-dusone, ngen temanggung ukumanne!

⁵ Sebab dusone betupuk-tupuk sapei moi lenget, ngen Allah tinget ngen kejahatanne.

⁶ Neaba si awei ipe si bi menea udi; malesba si duai kilai lipet utuk kute de sudo neanne. Mpekba makukne ngen minuman de duai kilai lebiak keras kunei minuman de seniapne utuk udi.

⁷ Neleiba ngen si sikso ngen duko cito de serai daune ngen kemulioan ngen kemewahan de neleine ngen diraine su'ang. Sebab si bogoa madeak ngen diraine, ‘Uku yo ratu de meriteak! Uku iso jando; uku coa bakea meding ibo!’

⁸ Kerno hal o ba, mako lem debilai bae si bakea keno bencano – olon, ibo ngen nyemen. Ngen si bakea nembem ngen opoi, sebab bekuasoba Tuhan Allah de mukumne o.”

⁹ Rajo-rajo dunio de milau lem plep-plep zinahne ngen nafsu selawei o bakea ngindoi ngen ngibo kota o amen tobo'o kemliak asep ngebuk kunei opoi de mbemne.

¹⁰ Tobo'o bakea je kunei uak sebab tobo'o saben keno siksaanne. Tobo'o madeak, “Aduh, padeak celakone kota de termasyhur yo – kota Babel de kuet! Lem de jam bae ukumannu sudo neane!”

¹¹ Pedagang neak bumai kulo ngindoi ngen duko kerno selawei o, sebab coa ade su'ang kulo de melei barang-barang dagangan tobo'o.

¹² Coa ade de mukua mas, pirok permata, ngen mutiara tobo'o; kulo kain linen, kain ungu, sutera, ngen kain mileak tuai; kute mecem kieu de jarang dapet, barang-barang kunei gading ngen kunei kieu de la'ang, kunei temagai, besi, ngen pualam;

¹³ kulit manis, rerepeak, setanggi, mur, ngen kemenyen; anggur ngen minyok, tepung ngen gendum; sapai ngen bebirai, kudo ngen kerita, hamba-hamba, bahkan nyabai manusio kulo.

¹⁴ Pedagang madeak ngen selawei o, “Kute de ko lok bi cigai, ngen kute kemewahan ngen keindahan bi nyep. Ko coa bakea temau igai!”

¹⁵ Pedagang de sudo jijai kayo kerno dagang neak kota o bakea je kunei uak, sebab tobo'o saben keno siksaanne. Tobo'o bakea ngindoi ngen duko,

¹⁶ ajau madeak, “Aduh, padeak celakone kota de termasyhur yo! Biasone si makei keracok linen, kain ungu ngen kain mileak tuai; biasone si penuak ngen perhiasan mas, permata ngen mutiara!

¹⁷ Tapi lem de jam bae, sudo nyep kute kekayaanne o!” Kute nakhoda, penupang, ngen anok bueak kepea, serto kute tun kerjone neak laut, je kunei ueak.

¹⁸ Ngen menggang waktau tobo'o kemliak asep kebuk kunei opoi de mbem kota o. Tobo'o menggang, “Coa perneak ade kota luyen awei kota de lai yo!”

¹⁹ Mako tobo'o semiram abau neak ulau tobo'o sebagai tando duko, lajau ngindoi ngen menggang, “Aduh, padeak celakone kota de lai yo! Kekayaanne bi menea kute tun de temuan kepea-kepea neak laut jijai kayo! Tapi lem de jam bae, sudo nyep kekutene!”

²⁰ Hai surgo, riangba das ajuane kota o! Hai umat Allah, rasul-rasul, ngen nebai-nebai, riang ba! Sebab Allah sudo mukum si sebagai pembalasan das jano de neane teadep udi!

²¹ Sesudo'o su'ang malaikat de perkaso maket debuak butau – kelai butau gilingan de lai – lajau melukne moi lem laut serto madeak, “Awei'oba ca'one kota Babel de termasyhur o bakea nuang sehinggo coa bakea temau igai.

²² Sa'ei musik kunei pemain kecapi, kunei paro biduan, kunei pemain suling ngen kunei peniup trupet, coa bakea teni'uk igai neak lem udi! Coa bakea temau kulo su'ang pekerjo ahli kulo neak di, ngen sa'ei butau gilingan kulo coa bakea teni'uk igai.

²³ Tun coa bakea kemliak igai cahayo lapu neak lem udi; ngen coa bakea kulo teni'uk keramaian pesta nikeak neak di. Pedagang-pedagangnu adeba tun-tun de paling terkemuko neak bumai, ngen lemau-lemau gaibnu ko mike kute bangso neak dunio!”

²⁴ Babel nukum sebab neak lem kota o bi ade daleak nebai-nebai, daleak umat Allah – siketne daleak kute tun de sudo nunuak neak das bumai.