WAHYU 17 - JANJAI BLAU Lem Bahaso Jang Bebilai

Hukuman das Babel

¹ Sesudo'o saleak su'ang kunei ketujuak malaikat de megong tujuak penan o teko ngen uku ngen madeak, “Maro, uku bakea kemten ngen udi awei ipe selawei nakea de lai o bakea nukum, adeba kota lai o de ten'gok pa'ok bioa-bioa.

² Rajo-rajo dunio menea zinah ngen si, ngen penghuni bumai jijai mabuk kerno mbuk anggur perzinahanne.”

³ Lajau Roh Allah kemuaso uku, ngen malaikat o mbin uku moi benei libea. Neak di uku kemliak su'ang selawei temot neak das dikup benatang de warnone mileak tuai, ngen de penuak tetulis gen-gen de mino Allah. Benatang o temuan tujuak ulau ngen puluak tanduk.

⁴ Selawei o makei bajau ungu ngen mileak tuai, serto makei perhiasan-perhiasan mas, permata-permata ngen mutiara. Neak tangenne si megong debuak makuk mas de penuak ngen hal-hal keji ngen najis, asea kunei perzinahan ne.

⁵ Neak ningne ade tulisan gen de temuan tai resio. Gen o adeba “Babel De Lai, indok kunei kute selawei nakea ngen kunei tun jahat neak dunio.”

⁶ Lajau uku kemliak bahwo selawei o mabuk ngen daleak umat Allah ngen daleak tun-tun de nunuak kerno setia ngen Yesus. Ketiko uku kemliak selawei o, uku jijai sele.

⁷ Lajau malaikat o madeak ngen uku, “Jano sebab ko sele? Baikba uku melei namen ngen udi resio selawei o ngen resio benatang de ken'nekne, adeba benatang de temuan tujuak ulau ngen puluak tanduk.

⁸ Benatang o bel'o perneak idup, tapi uyo bi matei. Si tegoa igai bakea keluea kunei jurang maut ngen bakea lalau moi kebinasaan. Tun-tun de idup neak bumai, de genne coa terdaftar lem Bukau Tun Idup ayok dunio ade bakea sele amen kemliak benatang o. Sebab benatang o perneak idup. Uyo si bi matei, tapi si bakea teko igai.

⁹ Lem hal yo perlu ade hikmat ngen pengertian. Tujuak ulau o adeba tujuak tebo: adeba tebo-tebo penan selawei o temot. Ngen tujuak ulau o kulo adeba tujuak rajo:

¹⁰ lemo kunei tobo'o bi us, do masiak meriteak, ngen do igai ati teko. Amen si teko be, si harus meriteak tegoa bae.

¹¹ Ngen benatang de bel'o perneak idup, tapi uyo bi matei adeba rajo de kedelapen. Si adeba do kunei tujuak rajo o kulo, de uyo gidong lalau moi kebinasaan.

¹² Puluak tanduk de udi kemliak o adeba puluak rajo de ati muloi meriteak. Tapi tobo'o bakea nelei kuaso utuk meriteak sebagai rajo besamo-samo ngen benatang o selamo de jam.

¹³ Puluak rajo yo kutene temuan tujuan de serai; tobo'o kutene semreak kekuatan, kuaso ngen benatang o.

¹⁴ Tobo'o bakea perang melawen Anok Bebirai o. Tapi Anok Bebirai o ngen penotoa-penotoa-Ne de setia de sudo nok-Ne ngen niliak-Ne o bakea maleak rajo-rajo o, sebab Siba Tuhan kute tuan, ngen Rajo kute rajo-rajo.”

¹⁵ Malaikat o madeak kulo, “Bioa de ko kemliak o, penan selawei nakea o temot, adeba bangsa-bangsa, rakyat-rakyat, negara-negara ngen bahaso-bahaso.

¹⁶ Puluak tanduk de udi kemliak ngen benatang o bakea jengik ngen selawei nakea o. Tobo'o bakea mbut kute de temuanne, ngen menea si jijai beleseng. Tobo'o bakea mbuk dagingne ngen benasone ngen opoi.

¹⁷ Sebab Allah sudo mukok atei tobo'o utuk kemerjo rencano Allah. Allah menea tobo'o sepakat utuk semreak kuaso tobo'o ngen benatang o, supayo benatang o meriteak sapei tejijai jano de nadeak Allah.

¹⁸ Selawei de ko kemliak o adeba kota lai, de meriteak rajo-rajo neak bumai.”