WAHYU 15 - JANJAI BLAU Lem Bahaso Jang Bebilai

Malaikat ngen bencano de terakhir

¹ Sesudo'o uku kemliak neak lenget sesuaktau de ajaib ngen luea biaso lai ne. Ade tujuak malaikat ngen tujuak bencano de terakhir. Dioba akhir murka Allah.

² Sesudo'o uku kemliak sesuaktau de ketenne awei lautan kaco becapua opoi. Uku kemliak kulo tun-tun de sudo menang das benatang ngen patungne, ngen menang das tun de genne nelei tando ngen ako. Tun-tun de menang o je neak biding laut kaco samo megong kecapi de nelei Allah ngen tobo'o.

³ Ngen tobo'o mbin legau Musa, hamba Allah, ngen legau Anok Bebirai. Awei yo sa'eine, “Tuhan, Allah Maha Kuaso, padeak lai ngen ajaibne perbuatan-perbuatan-Nu! Rajo kute bangso, padeak adea ngen benea tindakan-tindakan-Nu!

⁴ Api de coa saben ngen Ko, Tuhan? Api de coa lok melei bito kebesaran-Nu? Ko bae de sucai. Kute bangso bakea teko nyembeak Ko Kerno tindakan-tindakan-Nu de adea bi kenliak kute tun.”

⁵ Sesudo'o uku kemliak Bait Tuhan neak surgo tukok, ngen Kemah Tuhan ade neak lemne.

⁶ Lajau ketujuak malaikat ngen ketujuak bencano o kelua kunei Bait Sucai. Keracok tobo'o kunei kain linen de bersi ngen gemilep. Ngen tobo'o makei tutup dado de nea kunei mas.

⁷ Sesudo'o saleak do kunei pat makhluk o melei ngen ketujuak malaikat o tujuak bueak penan mas de penuak ngen murka Allah, – Allah de idup selamo-lamone.

⁸ Mako Bait Sucai o penuak ngen asep kunei keagungan ngen kuaso Allah. Ngen selamo ketujuak bencano de nembin ketujuak malaikat o ati berakhir, coa ade su'ang kulo de dapet masuk moi lem Bait Sucai.