WAHYU 13 - JANJAI BLAU Lem Bahaso Jang Bebilai

Duai benatang

¹ Sesudo'o uku kemliak dikup benatang keluea kunei laut. Si temuan puluak tanduk ngen tujuak ulau. Neak das tanduk-tandukne ade puluak mahkota ngen neak tiep ulaune tetulis debueak gen penghinaan teadep Allah.

² Benatang de uku kemliak o awei macan tutul, kekeane awei kekea beruang, muncungne awei muncung singo. Lajau benatang o nelei nagai o kekuatanne su'ang, ngen takhtane, ngen kuasene de lai.

³ Do neak antaro ketujuak ulau kunei benatang o ketenne awei keno sileak, tapi sileak o bi ka'en. Kute dunio sele, lajau temotoa benatang o.

⁴ Ngen tobo'o nyembeak nagai o sebab si bi melei kuasone ngen benatang o. Ngen tobo'o nyembeak benatang o, samo madeak, “Coa ade de serai ngen benatang yo! Coa ade de dapet perang melawen si!”

⁵ Benatang o neluak madeak hal-hal de kembiak ombong ngen mino Allah. Si neluak meriteak pat puluak duai bulen anne.

⁶ Lajau si muloi mino Allah, ngen gen Allah. Awei'o kulo penan Allah tinggea, ngen kute de tinggea neak surgo kenidekne.

⁷ Si neluak kulo melawen umat Allah serta maleak tobo'o. Ngen kuaso das kute suku, negara bahaso, ngen bangso nelei ngen si.

⁸ Benatang o bakea senbeak kute tun de idup neak dunio, kecuali tun-tun de genne bi terdaftar ayok dunio ade, neak lem bukau tun idup milik Anok Bebirai de sudo sembeliak.

⁹ Kerno o, amen udi sanggup temi'uk, teni'ukba bito yo:

¹⁰ “Tun de harus nukum, bakea nukum. Ngen tun de harus nunuak ngen pedang, bakea nunuak ngen pedang. Do'oba sebabne umat Allah harus sabar ngen setia.”

¹¹ Lajau uku kemliak dikup benatang luyen keluea kunei lem bumai. Si temuan duai tanduk awei tanduk anok bebirai. Sa'eine awei sa'ei nagai.

¹² Neak adep benatang de pertamo o si makei kuaso de lai de dapetne kunei benatang o kulo. Kute bumai ngen kute isaine, maksone nyembeak benatang de pertamo o, de sileak bi kaen.

¹³ Benatang de keduai o menea keajaiban-keajaiban de lai. Neak adep kute tun si menea opoi tu'un kunei lengget moi bumai.

¹⁴ Ngen kute tun de idup neak bumai ngikene ngen keajaiban-keajaiban de buliak neane neak adep benatang de pertamo o. Ngen tobo'o kutene neluakne menea debuak patung kunei benatang de sudo sileak ngen pedang, tapi tep idup.

¹⁵ Benatang de keduai o neluak melei nyabai ngen patung o, sehinggo patung o dapet miling ngen munuak kute tun de coalok nyembeak ne.

¹⁶ Kute tun, lai ngen titik, kayo ngen peset, hamba ngen tun bebas, makso benatang o utuk temimo tando neak tangen kanen tobo'o atau moi ning tobo'o.

¹⁷ Coa su'ang tun kulo dapet mukua atau jemua sesuaktau, amen si coa temuan tando o, adeba gen benatang o su'ang, atau ako genne.

¹⁸ Neak yo perlu ade hikmat. Tun de bijaksana amen dapet mitung tai kunei ako benatang o, sebab ako o adeba gen su'ang manusio. Akone adeba 666.