WAHYU 12 - JANJAI BLAU Lem Bahaso Jang Bebilai

Selawei ngen nagai

¹ Lajau keten neak lenget suaktau de ajaib ngen luea biaso. Suang selawei de makei matai bilai sebagai keracokne, gidong je neak das bulan. Neak ulaune ade debueak mahkota kunei duai belas bitang.

² Selawei o dong tenei lai, ngen kerno bi waktaune utuk melaher, mako si menggang kerno gis.

³ Lajau keten kulo neak lenget suaktau de ajaib. Ade dikup nagai mileak de kembiak lai de temuan tujuak ulau ngen puluak tanduk. Tiep ulaune makei debueak mahkota.

⁴ Ngen ikoane si seme'et sepertelau kunei bitang-bitang neak lenget ngen nuangne moi bumai. Nagai o je neak adep selawei de lok melaher o ngen maksud temlen anokne, sesudo anokne laher.

⁵ Lajau selawei o melaher anok semanei de bakea meriteak kute bangsa ngen tokot besai. Tapi anok o mbut kunei selawei o, lajau nembin ngen Allah, ngen mbin moi adep takhta-Ne.

⁶ Mako selawei o melilai moi benei libea, moi penan de sudo seniap Allah utukne. Neak penan o si bakea nurus 1260 bilai anne.

⁷ Lajau neak surgo tejijai perang. Mikhael besamo malaikat-malaikatne tepua melawen nagai o. Ngen nagai o kulo tenulung malaikat-malaikatne melawen Mikhael.

⁸ Tapi nagai o aleak. Si ngen malaikat-malaikatne coa buliak igai tinggea neak surgo.

⁹ Nagai lai o nuang moi luea! Siba dung tuai o de genne Iblis atau Roh Kidek, de mike kute dunio. Si nuang moi bumai ngen kute malaikatne.

¹⁰ Lajau uku temi'uk sa'ei de lek neak surgo madeak, “Uyoba waktaune Allah semlamat umat-Ne! Uyo Allah kemten kuaso-Ne sebagai Rajo! Uyo Rajo Penyelamat de jenanjai o kulo kemten kuaso-Ne! Sebab de temuduak saudaro-saudaro ite neak adep Allah lueng ngen kelmen, sudo kenluea kunei surgo.

¹¹ Saudaro-saudaro ite sudo maleak si ngen daleak Anok Bebirai, ngen bito benea kunei Allah de tobo'o melei namen. Tobo'o rela melei nyabai tobo'o sapei matei.

¹² Sebab o, lokba surgo ngen kute de tinggea neak lemne, riang! Tapi celakoba bumai ngen laut, sebab Iblis bi tu'un ngen udi, ngen kembiak mengiak, kerno si namen bahwo waktaune tinggea didik igai.”

¹³ Ketiko nagai o sadar bahwo si bi nuang moi bumai, si muloi jemalang selawei de sudo melaher anok semanei o.

¹⁴ Tapi selawei o nelei duai sayep burung rajowali de lai, supayo si tebang moi penanne neak benei libea, neak ipe si bakea nurus selamo telau setengeak taun, bebas kunei serangan nagai.

¹⁵ Mako nagai o kemluea kunei bibiane dau nien bioa moi selawei o, kunyau si monot.

¹⁶ Tapi bumai temulung selawei o; bumai mukok bibiane ngen temlen bioa de keluea kunei bibia nagai o.

¹⁷ Nagai o jijai kembiak mengiak ngen selawei o, sehinggo si lalau semrang turunan de luyen kunei selawei o, adeba kute tun de taat ngen periteak-periteak Allah, ngen de melei saksai tetang Yesus ngen kuaso-Ne.

¹⁸ Lajau nagai o je neak pantai.