WAHYU 11 - JANJAI BLAU Lem Bahaso Jang Bebilai

Duai saksai Allah

¹ Sesudo'o uku nelei depun kiyeu de serai ngen depun tokot pengukua, lajau neriteak, “Lalauba nukua Bait Sucai Allah ngen mezbah. Nitungba kedau ade tun de semyang neak lemne.

² Tapi jibeakba nukua latet neak depeak luea Bait Sucai Allah o, sebab bagian o bi senreak ngen tun-tun de coa kemnal Tuhan. Tobo'o bakea melat Kota de Sucai o selamo pat puluak duai bulen.

³ Uku bakea mutus duai tun saksai-Ku de makei keracok bekabung, ngen tobo'o bakea melei namen bito Allah selamo 1260 bilai.”

⁴ Duai saksai o adeba duai pun zaitun ngen duai bueak kekea lapu de ade neak adep Tuhan semesta alam.

⁵ Amen tun cemubo menea sesuaktau de coa baik tehadep tobo'o, mako kunei bibia tobo'o kelueaba opoi de benaso musuak-musuakne. Ngen ca'o awei yo, kute tun de lok megis tobo'o bakea nunuak.

⁶ Tobo'o temuan kuaso utuk temutup lenget supayo jibeak tu'un ujen selamo tobo'o melei namen bito kunei Allah. Tobo'o temuan kulo kuaso das kute matai bioa, utuk mubeak bioa jijai daleak. Ngen tobo'o temuan kulo kuaso utuk mokoa bumai ngen kute mecem bencano, tengen bae tobo'o lok meneane.

⁷ Sesudo tobo'o selsei melei bito tobo'o, benatang de keluea kunei jurang maut bakea melawen tobo'o. Si bakea maleak ngen munuak tobo'o.

⁸ Ngen mayit tobo'o bakea besirok neak dalen kota lai, neak ipe Tuhan tobo'o senalib. Gen kiasan kota o adeba Sodom atau Mesir.

⁹ Tun-tun kunei kute negrai, sukau, bahaso, ngen bangso bakea kemliak mayit tobo'o selamo telau setengeak bilai, ngen coa mizin mayit-mayit o kenubua.

¹⁰ Penduduk bumai bakea beriang das kematei keduai saksai o. Tobo'o bakea merayokanne ngen saling mbo hadiah, kerno keduai tun nebai o sudo menea dau sikso ngen kute tun neak bumai.

¹¹ Sesudo telau setengeak bilai, tekoba napas idup kunei Allah ngen masuk igai moi lem keduai tun nebai o. Tobo'o kulo kelongon je, sehinggo kute tun de kemliak tobo'o jijai saben sekilai.

¹² Sesudo'o keduai nebai o temi'uk sa'ei lek de menok tobo'o kunei surgo, “Maroba kenek mio!” Lajau neak adep musuak-musuak tobo'o, tobo'o kenek moi surgo, tenutup ngen embun.

¹³ Mako waktau o kulo tejijaiba gepo lai. Seperpuluak kunei kota o ajua, ngen tujuak ribau tun matei kerno gepo o. Tun-tun luyenne jijai kembiak saben, lajau tobo'o mujai kebesaran Allah neak surgo.

¹⁴ Celako de keduai bi liwet. Tapi kenliakba! Celako de ketelau tegoa igai bakea nyusul.

Terupet ke tujuak

¹⁵ Lajau malaikat ketujuak kembus trupetne, mako neak surgo teni'uk sa'ei-sa'ei kembiak lek de madeak, “Kuaso utuk meriteak dunio uyo ade neak tangen Tuhan ite ngen Rajo Penyelamat de jenanjai-Ne. Si bakea meriteak utuk selamo-lamone!”

¹⁶ Mako keduai puluak pat pemipin de temot neak takhta tobo'o neak adep Allah, tukup ngen nyembeak Allah.

¹⁷ Tobo'o madeak, “Tuhan, Allah Mahakuaso, de ade, ngen de sudo ade! Keme mokasiak ngen Ko sebab Ko makei kuaso-Nu de lai, ngen bi muloi meriteak!

¹⁸ Tun-tun de coa kemnal Tuhan, ngamuk sebab bi waktaune Ko mengiak, ngen bi waktaune Ko mukum tun-tun matei. Dioba waktaune utuk melei upeak ngen hamba-hamba-Nu, tobo nebai, ngen kute umat-Nu, adeba kute tun de semyang ngen Ko, lai atau titik. Dioba waktaune utuk majua tun-tun de majua bumai!”

¹⁹ Mako tukokba Bait Sucai Allah neak surgo, ngen ketenba Petai Perjanjian neak lemne. Lajau tejijaiba kilat, gutua gemruduk, gepo ngen ujen es de lai.