TITUS 3 - JANJAI BLAU Lem Bahaso Jang Bebilai

Plep tun Kristen

¹ Melei namen anggota jemaat-jemaatnu supayo tobo'o tunduk ngen pimipin-pemipin, penguaso negrai serto taat ngen besedio menea tiep hal de baik.

² Nadeak ngen tobo'o supayo jibeak fitneak atau betekea ngen api bae, tapi supayo besikep ramah. Lokba tobo'o bogoa besikep lemuak te'adep kute tun.

³ Sebab bel'o ite suang kulo bodong, sesat ngen coa taat. Ite jijai hamba memecem nafsu ngen kelok; ite idup ngen niat-niat kidek ngen kidek atei, serto saling jengik.

⁴ Tapi Allah, Penyelamat ite temunjuk kasiak ngen kebaikan atei-Ne ngen ite.

⁵ Si semlamat ite, iso kerno ite sudo menea sesuaktau de baik, tapi kerno Si suang mengasihi ite. Si semlamat ite liwet Roh Allah, de melei ite laher blau, idup blau, ngen dalen semucai ite.

⁶ Allah melei Roh-Ne ngen ite liwet Yesus Kristus, Rajo Penyelamat ite,

⁷ supayo rahmat Yesus, menea ite baik igai ngen Allah, ite temimo idup sejati ngen kekal.

⁸ Kecek yo sungguak benea. Uku lok ko manggap hal-hal yo peting, supayo tun-tun de pecayo ngen Allah sungguak-sungguak berusaho utuk menea kerjo de baik ngen beguno utuk kute tun.

⁹ Ne'uakba selisiak de coa ade gunone, cerito-cerito asal usul, tekea, belago tetang hukum agamo. Kutene o coa ade gunone ngen coa ade utungne.

¹⁰ Tun de menea selisiak lem jemaat, lokba ko tema'ok debat duai kilai; sesudo'o jibeakba igai kuat ngen si.

¹¹ Ko namen bahwo tun awei o jahat ngen duso-dusone melei bukti bahwo si saleak.

Petunjuk-petunjuk terakhir

¹² Sesudo uku mutus Artemas atau Tikhikus ngen ko, berusahoba segacangne utuk teko ngen uku neak Nikopolis, sebab uku ade niat tinggea neak di selamo musim sengok.

¹³ Berusahoba sungguak-sungguak utuk temulung Zenas, guau agamo o, ngen Apolos, supayo tobo'o nam berakat ngen coa kuang jejano.

¹⁴ Tun-tun ite harus belajea menea hal-hal de baik supayo dapet cemukup kebutuhan-kebutuhan; jibeak sapei tobo'o idup coa ade gunone.

¹⁵ Kute saudaro de ade besamo uku, mbo salam ngen ko. Semapeiba salam keme ngen kekuat ite do imen. Semoga Tuhan memberkati saudaro kutene. Hormat keme, Paulus