TITUS 2 - JANJAI BLAU Lem Bahaso Jang Bebilai

Dasar-dasar ajaran de benea

¹ Tapi ko, Titus, lokba ko majea ajaran de paset.

² Nasehatba tun semanei-semanei de tu'ai, supayo tobo'o tema'en dirai, bijaksana ngen idup sebagai tun de patut nego. Tobo'o harus kulo bepegong pado ajaran de benea kunei Allah, mengasihi ngen sempurno, saro ngen tabah.

³ Awei o kulo lokba ko nasehat selawei-selawei de tu'ai supayo plep tobo'o sesuoi ngen jano de patut bagiak tun de idup kusus bagiak Allah. Tobo'o coa buliak fitneak tun luyen, coa buliak bogoa mabuk. Tobo'o harus majea hal-hal de baik,

⁴ supayo ngen ca'o o tobo'o dapet majea selawei-selawei u'ai utuk mengasihi sematen ngen anok-anokne,

⁵ jijai bijaksana, idup sucai ngen jijai ngenyan de baik de temurut kecek sematenne. Ngen awei o coa ade tun de dapet mino bito kunei Allah.

⁶ Awei o kulo, meleiba nasehat ngen tun-tun u'ai supayo tobo'o jijai bijaksana.

⁷ Lem kute hal lokba ko jijai teladan de baik. Amen ko majea, ko harus jujur ngen sungguak-sungguak.

⁸ Pakeiba kecek-kecek de bijaksana, de coa dapet mino tun, supayo lawen-lawennu jijai selek kerno coa ade hal-hal kidek de dapet tobo'o madeak tetang ite.

⁹ Hamba-hamba harus tunduk ngen tuanne. Ngen semnang atei lem kute hal. Tobo'o coa buliak melawen kecek,

¹⁰ atau maling. Lokba tobo'o kemten bahwo tobo'o bogoa sikep baik ngen setia, supayo ngen sikep tobo'o tun mujai ajaran tetang Allah, Penyelamat ite.

¹¹ Sebab Allah bi kemten rahmat-Ne utuk semlamat kute umat manusio.

¹² Rahmat Allah o majea ite supayo coa igai idup melawen kelok Allah ngen coa temotoa kelok duniawi. Ite najea utuk idup lem dunio yo ngen namen temaen dirai, tulus, setia ngen Allah.

¹³ Uyo ite gidong mbot Bilai de ite ma'ep o; pado Bilai o dunio bakea kemliak keagungan Yesus Kristus, adeba Allah Mahabesar ngen Rajo Penyelamat ite.

¹⁴ Si bi melei dirai-Ne bagiak ite utuk mbebas ite kunei kute kejahatan, ngen jemijai ite umat de bebas kunei duso, de jijai de Si temuan bae, serto de rajin menea baik.

¹⁵ Najeaba kutene o, ngen melei nasehat serto tema'okba paro pendengarnu seca'o wibawa. Jibeak munyau suang kulo manggap ko rendeak.