TITUS 1 - JANJAI BLAU Lem Bahaso Jang Bebilai

¹ Anokku Titus! Uku, Paulus, temulis su'et yo sebagai hamba Allah ngen rasul Yesus Kristus. Uku niliak ngen nutus utuk temulung tun-tun piliak Allah supayo jijai kuet lem imen tobo'o. Uku kulo harus bimbing tobo'o supayo kemnal ajaran de benea de najea agamo te.

² Ajaran o das dasar harapan bahwo ite bakea temimo idup sejati ngen kekal. Allah bi melei janjai idup o ayok mulone zaman – ngen Allah coa mukin ngike.

³ Pado waktau de tepat, Allah melei janjaine o lem pesen-Ne. Pesen o bi senapei ngen uku, ngen uku melei namenne das periteak Allah Penyelamat ite.

⁴ Titus, ko adeba sungguak-sungguak anokku, sebab ko ngen uku bi pecayo ngen Kristus. Uku ma'ep supayo Allah Bapa ngen Kristus Yesus Rajo Penyelamat ite, melei berkat ngen sejahtera ngen ko.

Kerjo Titus neak Kreta

⁵ Uku teminggea ko neak Kreta supayo ko dapet murus hal-hal de masiak perlu natur. Kulo, supayo ko maket pemipin-pemipin jemaat neak tiep kota. Tingetba ngen petunjuk-petunjukku yo:

⁶ Suang pemipin jemaat lokba suang tun de baik; si harus temuan do ngenyan; anok-anokne harus bi pecayo ngen Kristus ngen iso anok nakea ngen coa nam natur.

⁷ Tun de kerjo neak jemaat adeba tun de murus kerjo Allah, si coa buliak tun de coa baik. Si coa buliak ombong atau gacang mengiak, atau tukang mabuk, galok belago, atau bogoa meker caci.

⁸ Si harus galok temimo tun neak daseine, galok ngen hal-hal baik, dapet temaen dirai, jujur, sucai ngen tertib.

⁹ Ia harus bepegong teguak pado ajaran de dapet pecayo, awei de sudo najea ngenne. Awei ipe si sanggup melei nasehat tun pado ajaran de benea, ngen temunjuk kesaleak tun-tun de temtangne.

¹⁰ Sebab dau tun de galok berutak, terutamo tun-tun de nanone agamo Yahudi; tobo'o mike tun luyen.

¹¹ Tun-tun awei o harus bibiane npem, sebab tobo'o kemacau dau keluargo ngen ajaran-ajaran de coa ade gunone. Tobo'o menea o cuma kerno lok mesoa utung de coa patas!

¹² Perneak nebai tobo'o suang de kunei Kreta madeak, “Tun-tun Kreta bogoa mike, awei benatang buas de jelen ngen malas.”

¹³ Jano de nadeak nebai o memang benea. Do'o sebabne ko harus tema'ok tobo'o seca'o tegas; supayo tobo'o tep bepegong ngen ajaran de benea.

¹⁴ Ngen coa igai bepegong ngen dongeng-dongeng Yahudi atau aturan-aturan de nea tun-tun de temulok ajaran de benea o.

¹⁵ Kute sesuaktau adeba sucai bagiak tun-tun de sucai. Tapi utuk tun-tun de pekeranne kidek ngen de coa ade imen, coa ade sesuaktau de sucai, sebab pekeran ngen atei nurani tobo'o bi kidek!

¹⁶ Tobo'o madeak bahwo tobo'o kemnal Allah, padahal plep tobo'o temulok-Ne. Tobo'o nyelek, ngen tobo'o coa lok taat; tobo'o adeba tun-tun de coa nam menea de baik.