ROMA 9 - JANJAI BLAU Lem Bahaso Jang Bebilai

Allah ngen umat-Ne de tepiliak

¹ Uku madeak kebenaran lem Kristus, uku coa mike. Sa'ei ateiku saksai lem Roh Sucai,

² bahwo uku kembiak duko ngen bogoa ibo.

³ Bahkan, uku lok terkutuk ngen ce'ei kunei Kristus demi saudaro-saudaroku, kaum sebangsoku seca'o jasmani.

⁴ Sebab tobo'o adeba tun Israel, tobo'o bi naket jijai anok, ngen tobo'o bi temimo kemuliaan, janjai-janjai, ngen hukum agamo Yahudi.

⁵ Tobo'o adeba royot bapa-bapa leluhur, de tumu'un Kristus lem keadaan-Ne sebagai manusio, de ade neak das kute sesuaktau. Si adeba Allah de harus nujai sapei selamo-lamone. Amin!

⁶ Tapi firman Allah coa mukin gagal. Sebab coa kute tun de asalne kunei Israel adeba tun Israel.

⁷ Ngen kulo coa kute de teitung royot Abraham adeba anok Abraham, tapi, “De asalne kunei Ishak de bakea senbut royotnu.”

⁸ Taine: Iso anok-anok temurut tabi'at manusio adeba anok-anok Allah, tapi anok-anok perjanjian de senbut royot de benea.

⁹ Sebab firman yo mengandung janjai, “Pado waktau awei yo ba Uku bakea teko ngen Sara bakea temuan su'ang anok semanei.”

¹⁰ Tapi iso cuma do'o bae. Lebiak jelas igai adeba Ribka de ngandung kunei do tun, adeba kunei Ishak, bapa leluhur ite.

¹¹ Sebab waktau anok-anok o ati laher ngen ati menea de baik atau kidek, – supayo rencano Allah tetang pemilihan-Ne diteguhkan, iso kerno plep tapi kerno panggilan-Ne –

¹² de nadeak ngen Ribka: “Anok de tuai bakea jijai hamba anok de u'ai.”

¹³ Awei ade tetulis: “Uku mengasihi Yakub, tapi jengik ngen Esau.”

¹⁴ Amen awei o, jano de lok ite madeak? Jano Allah coa adea? Mustahil!

¹⁵ Sebab Si berfirman ngen Musa: “Uku bakea kemten rahmat ngen api Uku lok kemten rahmat ngen uku lok baik atei ngen api Uku lok baik atei.”

¹⁶ Jijai hal o coa tergantung ngen kelok tun atau usaho tun, tapi ngen kemurahan atei Allah.

¹⁷ Sebab Kiteb Sucai madeak ngen Firaun, “Do'oba sebabne Uku midup igai ko, adeba supayo Uku kemten kuaso-Ku neak lem ko, ngen supayo gen-Ku termasyhur neak kute dunio.”

¹⁸ Jijai Si kemten belas kasihan ngen api de kenlok-Ne ngen Si temguak atei api de kenlok-Ne.

¹⁹ Uyo ko bakea madeak ngen uku, “Amen awei o, jano igai de masiak senaleak-Ne? Sebab api de temtang kelok-Ne?”

²⁰ Api ko, hoi manusio, mako udi membantah Allah? Jano dapet de nea madeak ngen de meneanne, “Getai ko menea uku awei yo?”

²¹ Jano tun de menea pot bungai o behok kemerjo pitok daliak o sekelok ateine? Kunei degum pitok daliak, tun o behok menea duai mecem pot bungai: do de ba'es, ngen de luyenne de agok kidek.

²² Jijai, amen utuk kemten murka-Ne ngen kemten kuaso-Ne, Allah melei kesabaran de lai teadep benda-benda kemurkaan-Ne, de sudo seniap utuk kebinasaan –

²³ justru utuk kemten kekayaan kemuliaan-Ne das benda-benda kasihan-Ne de sudo seniap-Ne utuk kemuliaan,

²⁴ adeba ite, de sudo nok-Ne iso cuma kunei antaro tun Yahudi, tapi kulo kunei antaro bangso-bangso luyen.

²⁵ Awei de sudo nadeak-Ne lem kiteb Nebai Hosea: “De iso umat-Ku bakea Uku sembut: ‘Umat-Ku’. Ngen de iso kekasih: bakea Uku sembut: ‘Kekasih-Ku’.

²⁶ Ngen neak penan, neak ipe bakea nadeak ngen tobo'o: ‘Anok-anok Allah de idup.’ ”

²⁷ Ngen Nebai Yesaya madeak seca'o tegas tetang Israel, “Kunyau jumlah anok Israel awei benei neak laut, tapi cuma didik bae de bakea senlamat.

²⁸ Sebab jano de sudo nadeak-Ne, bakea nea Tuhan neak das bumai, sempurno ngen segro.”

²⁹ Ngen awei de nadeak Yesaya ayokne: “Seandaine Tuhan semesta alam coa teminggea ngen ite keturunan, ite bi jijai awei Sodom ngen serai awei Gomora.”

Hubungan antaro umat Allah ngen Bito Baik de kunei Allah

³⁰ Amen awei o, jano de lok ite madeak? Dio: Bahwo bangso-bangso luyen de coa mesoa kebenaran, bi dapet kebenaran, adeba kebenaran kerno imen.

³¹ Tapi: bahwo Israel, kunyau mesoa hukum de mbin kebenaran, coa kulo sapei ngen hukum o.

³² Getai coa? Kerno Israel mesoa iso kerno imen, tapi kerno plep. Tobo'o jijai tebtut pado butau de menea tun jijai tebtut.

³³ Awei ade tetulis: “Sesungguakne, Uku mpek neak Sion debueak butau de menea tun jijai tebtut, ngen api de pecayo ngen Si, coa bakea selek.”