ROMA 6 - JANJAI BLAU Lem Bahaso Jang Bebilai

Matei ngen idup igai ngen Kristus

¹ Amen awei o, jano de lok ite madeak? Jano buliak ite bogoa menea duso, supayo tambeak kasih karunia o?

² Coa samo sekilai! Ite bi matei neak lem duso, awei ipe ite masiak dapet idup neak lemne?

³ Atau udi coa namen, bahwo ite kute de sudo dibaptis lem Kristus, bi baptis lem kematian-Ne?

⁴ Ngen awei o ite bi kenubua besamo-samo Si ngen baptisan lem kematian, supayo, serai awei Kristus bi nidup igai kunei antaro tun matei ngen kemuliaan Bapa, awei o kulo ite bakea idup lem idup de blau.

⁵ Sebab amen ite bi jijai do ngen jano de serai ngen kematian-Ne, ite kulo bakea jijai do ngen jano de serai ngen idup-Ne igai.

⁶ Kerno ite namen, manusio an ite bi senalib kulo, supayo awok duso ite nyep kuasone, kunyau ite coa tunduk igai ngen duso.

⁷ Sebab api de sudo matei, si bi bebas kunei duso.

⁸ Jijai amen ite bi matei ngen Kristus, ite pecayo, bahwo ite bakea idup kulo ngen Si.

⁹ Kerno ite namen, bahwo Kristus, sesudo Si idup igai kunei antaro tun matei, coa matei igai: maut coa bekuaso igai das Si.

¹⁰ Sebab kematian-Ne adeba kematian teadep duso, debat bae ngen utuk seke'anne, ngen idup-Ne adeba idup utuk Allah.

¹¹ Awei'oba lokne udi kemliakne: bahwo udi bi matei utuk duso, tapi udi idup utuk Allah lem Kristus Yesus.

¹² Sebab o lokba duso coa bekuaso igai neak lem awoknu de fana, supayo udi jibeak igai temotoa kelokne.

¹³ Ngen jibeakba udi semreak anggota-anggota awoknu ngen duso utuk nakei sebagai senatai kelaliman, tapi senreakba dirainu ngen Allah sebagai tun-tun, de bel'o matei, tapi de uyo idup. Ngen senreakba anggota-anggota awoknu ngen Allah utuk jijai senatai-senatai kebenaran.

¹⁴ Sebab ko coa bakea kenuaso duso igai, kerno udi coa ade neak beak hukum agamo Yahudi, tapi neak beak kasih karunio.

Duai mecem perhambaan

¹⁵ Jijai awei ipe? Jano ite bakea menea duso, kerno ite coa ade neak beak hukum agamo Yahudi, tapi neak beak kasih karunio? Coa samo sekilai!

¹⁶ Jano udi coa namen, bahwo amen udi semreak dirainu ngen suang tun sebagai hamba utuk tunduk ngen si, udi adeba hamba tun o, de harus udi tunduk, baik lem duso de mipin udi ngen kematian, atau lem ketaatan de mipin udi ngen kebenaran?

¹⁷ Tapi mucep syukurba ngen Allah! Bel'o memang udi hamba duso, tapi uyo udi ngen segenep atei bi tunduk ngen ajaran de sudo tenrus ngen udi.

¹⁸ Udi bi bebas kunei duso ngen ijai hamba kebenaran.

¹⁹ Uku madeak hal yo seca'o manusio kerno kelemahan udi. Sebab serai awei udi bi semreak anggota-anggota awoknu jijai hamba de coa benea ngen de kidek utuk maksud-maksud de kidek. Awei o kulo uyo udi harus semreak anggota-anggota awoknu jijai hamba kebenaran de mbin udi ngen kesucian.

²⁰ Sebab waktau udi hamba duso, udi bebas kunei kebenaran.

²¹ Ngen asea jano de udi dapet kunei padone? Kutene o jijai sebab udi meding selek uyo, kerno kutene o adeba kematian.

²² Tapi uyo, sesudo udi bebas kunei duso ngen sesudo udi jijai hamba Allah, udi dapet asea de mbin udi moi kesucian ngen sebagai kesudone adeba idup de kekal.

²³ Sebab upeak duso adeba maut; tapi karunio Allah adeba idup de kekal lem Kristus Yesus, Tuhan ite.