ROMA 5 - JANJAI BLAU Lem Bahaso Jang Bebilai

Asea pembenaran

¹ Sebab o, ite de benea kerno imen, ite idup lem damoi sejahtera ngen Allah kerno Tuhan ite, Yesus Kristus.

² Kerno ite percayo ngen Yesus, mako ite kulo dapet kasih karunio kunei Allah. Neak lem kasih karunio yo, ite idup ngen bangga lem pengharapan ngen temimo kemulioan Allah.

³ Ngen iso do'o bae. Ite malah bangga kulo lem derito ite, kerno ite namen bahwo derito o menea tun jijai taat,

⁴ ngen ketaatan menea ite taen nujai ngen kerno ite taen nujai, ite dapet pengharapan.

⁵ Harapan de awei yo coa bakea menea ite keciwo, kerno atei ite sudo nelei Allah ngen kasih-Ne. Allah menea o liwet Roh-Ne de sudo nelei ngen ite.

⁶ Kerno waktau ite masiak lemah, Kristus bi matei utuk ite tun-tun durhako pado waktau de temtau Allah.

⁷ Sebab coa mudeak tun lok matei utuk de benea – tapi mukin utuk tun de baik ade de binai matei.

⁸ Tapi Allah kemten kasih-Ne ngen ite, kerno Kristus bi matei utuk ite, ketiko ite masiak beduso.

⁹ Lebiak-lebiak, kerno ite uyo bi benea kerno daleak-Ne, ite paset senlamat kunei murka Allah.

¹⁰ Pado waktau ite jijai musuak, Allah bi demamoi ite liwet kematian Anok-Ne. Telebiak uyo, ketiko ite sudo bi demamoi, pasetba ite bi demamoi-Ne, liwet idup-Ne!

¹¹ Ngen iso cuma do'o bae! Ite mala bangga lem Allah kerno Yesus Kristus, Tuhan ite, sebab kerno Si ite sudo temimo damoi o.

Adam ngen Kristus

¹² Sebab o, serai awei duso bi masuk moi lem dunio kerno do tun, ngen kerno doso o kulo maut, awei'oba maut bi sapei ngen kute tun, kerno kute tun bi menea duso.

¹³ Sebab ayok hukum agamo Yahudi ade, bi ade duso neak dunio. Tapi duso o coa nitung amen coa ade hukum agamo Yahudi.

¹⁴ Kunyau awei o maut sudo bekuaso kunei zaman Adam sapei zaman Musa kulo das tobo'o, de coa menea duso ngen ca'o de serai awei de sudo nea Adam, de adeba gambaran Si de bakea teko.

¹⁵ Tapi karunio Allah coa serai ngen pelanggaran Adam. Sebab, amen kerno pelanggaran do tun kute tun bi us moi lem kuaso maut, uak lebiak lai kasih karunio Allah ngen karunio-Ne, de nelei-Ne das kute tun kerno do tun, adeba Yesus Kristus.

¹⁶ Ngen kasih karunio Allah coa sebanding ngen duso do tun. Sebab penghakiman das do pelanggaran o bi menea jijai penghukuman, tapi penganugrahan karunia das dau pelanggaran o menea jijai pembenaran.

¹⁷ Sebab, amen kerno duso do tun, maut bi be kuaso kerno do tun o, mako lebiak benea igai tobo'o, de sudo temimo kelimpahan kasih karunia ngen anugrah kebenaran, bakea idup ngen bekuaso kerno do tun o, adeba Yesus Kristus.

¹⁸ Sebab o, serai awei kerno do pelanggaran kute tun dapet hukuman, awei o kulo kerno do perbuatan kebenaran kute tun dapet pembenaran utuk idup.

¹⁹ Jijai serai awei kerno do tun coa taat kute tun bi jijai tun be duso, awei o kulo kerno ketaatan do tun kute tun jijai benea.

²⁰ Tapi hukum agamo Yahudi tenambeak, supayo pelanggaran jijai tambeak dau; ngen neak ipen duso tambeak dau, neak di kasih karunia jijai berlimpah.

²¹ Supayo, serai awei duso bekuaso lem alam maut, awei o kasih karuni bakea bekuaso kerno kebenaran utuk idup de kekal, kerno Yesus Kristus, Tuhan ite.