ROMA 3 - JANJAI BLAU Lem Bahaso Jang Bebilai

¹ Amen awei o, jano kelebihan tun Yahudi ngen jano gunone sunat?

² Dau nien, ngen neak lem kute hal. Pertamo-tamo: sebab ngen tobo'oba Allah cayo firman-Ne.

³ Jijai awei ipe, amen neak ataro tobo'o ade de coa setia, jano kerno o Allah jijai coa setia?

⁴ Paset bae coa! Sebelekne: Allah adeba benea, ngen kute manusio pendusta, awei ade tetulis: “Supayo Ko ternyato benea lem kute firman-Nu, ngen menang, amen Ko nukum.”

⁵ Tapi amen keadilan Allah jijai tambeak nyato, kerno ite menea de coa benea, jano de lok ite madeak? Bahwo Allah coa adea amen Si mukum ite?

⁶ Debat bae coa! Amen awei o, awei ipe Allah dapet mukum dunio?

⁷ Tapi amen kebenaran Allah kerno dustaku tambeak melimpah utuk kemulioan-Ne, getai uku masiak nukum igai sebagai tun beduso?

⁸ Jano coa benea fitnaan tun de madeak, bahwo ite madeak, “Maroba ite menea de coa baik, supayo de baik teko kunei si.” Tun de awei o bi sepatutne dapet ukuman.

Kute manusio adeba tun beduso

⁹ Jijai awei ipe? Jano ite temuan kelebihan kunei pado tun luyen? Samo sekilai coa. Sebab neak das bi ite nadeak baik tun Yahudi, atau iso Yahudi, mako tobo'o kute ade neak beak kuaso duso.

¹⁰ Awei ade tetulis: “Coa ade de benea, su'ang tun kulo coa,

¹¹ coa ade su'ang tun kulo ngertai, coa ade su'ang tun kulo de mesoa Allah.

¹² Kute tun bi nyeleweng, tobo'o kute coa beguno. Coa ade de menea baik, su'ang tun kulo coa!

¹³ Kerongkongan tobo'o awei kubua de tukok, dileak tobo'o merayu-rayu, bibia tobo'o mengandung bisai.

¹⁴ Bibia tobo'o penuak ngen supeak serapah.

¹⁵ Lakeak tobo'o gacang utuk semikso ngen munuak tun.

¹⁶ Kehancuran ngen kebinasoan tobo'o teminggea neak dalen tobo'o.

¹⁷ Ngen dalen damoi coa tobo'o namen;

¹⁸ asai saben ngen Allah coa ade ngen tun o.”

¹⁹ Tapi ite namen, bahwo kute de ade neak lem Kiteb hukum agamo Yahudi adeba utuk tobo'o de idup neak beak hukum agamo Yahudi. Ngen awei o coa su'ang tun dapet melei alasan jejano igai ngen kute dunio dapet ukuman Allah.

²⁰ Sebab coa su'ang tun kulo dapet benea neak adep Allah kerno kemerjo hukum agamo Yahudi, kerno justru hukum agamo Yahudi tun kemnal duso.

Manusio jijai benea kerno imen

²¹ Tapi uyo, ngen coa ade hukum agamo Yahudi kebenaran Allah bi kenten, awei de ade neak lem Kiteb hukum agamo Yahudi ngen Kiteb-kiteb paro nebai,

²² adeba kebenaran Allah kerno imen lem Yesus Kristus utuk kute tun de pecayo. Sebab coa ade bedane.

²³ Kerno kute tun bi menea duso ngen bi coa ade kemulioan Allah.

²⁴ Ngen kerno kasih karunio nelei ngen cuma-cuma kerno penebusan lem Kristus Yesus.

²⁵ Kristus Yesus bi tentau Allah jijai dalen damoi kerno imen, lem daleak-Ne. Hal iyo nea-Ne utuk kemten keadilan-Ne, kerno Si bi munyau duso-duso de sudo tejijai bel'o pado maso kesabaran-Ne.

²⁶ Maksud-Ne adeba utuk kemten keadilan-Ne pado maso yo, supayo nyato, bahwo Si benea ngen kulo menea tun de pecayo ngen Kristus jijai benea.

²⁷ Jijai amen awei o, jano alasan ite utuk bangga? Coa ade! Getai awei o? Jano kerno plep? Coa, tapi kerno imen!

²⁸ Kerno keme yakin, bahwo manusio jijai benea kerno imen, ngen iso kerno si kemerjo hukum agamo Yahudi.

²⁹ Atau Allah o Allah tun Yahudi bae? Jano Si kulo adeba Allah bangso-bangso luyen? Au, benea. Si kulo adeba Allah bangso-bangso luyen!

³⁰ Taine, amen ade do Allah, de bakea menea tun-tun Yahudi baik igai ngen Allah kerno tobo'o percayo. Baik igai ngen Allah, tun Yahudi kulo iso Yahudi.

³¹ Amen awei o, jano kerno ite pecayo ngen Kristus, ite muang hukum agamo Yahudi? Samo sekilai coa! Sebelekne, keme mego hukum o.