ROMA 15 - JANJAI BLAU Lem Bahaso Jang Bebilai

Semnangba tun luyen, jibeak dirainu su'ang

¹ Ite de sungguak-sungguak yakin ngen jano de ite pecayo, harusba sabar teadep kelemahan-kelemahan tun de coa kuet imenne. Jibeakba ite lok semnang dirai ite su'ang bae.

² Sebelekne ite masing-masing harus semnang atei sesamo saudaro ite utuk kebaikanne, supayo imenne tambeak kuet.

³ Sebab Kristus kulo coa meker kesenangan dirai-Ne su'ang. Neak lem Kiteb Sucai tetulis awei yo, “Kute hinaan teadep Ko bi keno ngen uku.”

⁴ Kute de tetulis neak lem Kiteb Sucai adeba utuk majea ite. Sebab pelajaran de ite temimo kunei Kiteb Sucai menea ite jijai tabah ngen kuet sehinggo ite dapet ma'ep ngen Allah.

⁵ Semoga Allah, de melei kesabaran ngen penghiburan ngen manusio, temulung udi utuk idup do atei, temotoa teladan Kristus Yesus.

⁶ Ngen do atei Saudaro kutene besamo-samo dapet mujai Allah, Bapa Tuhan ite Yesus Kristus.

Bito Baik utuk bangso-bangso de iso Yahudi

⁷ Sebab o lokba Saudaro-saudaro temimo do ngen de luyen ngen riang atei, serai awei Kristus kulo temimo udi utuk memuliakan Allah.

⁸ Sebab, tingetba, bahwo Kristus sudo mlayani tun Yahudi utuk melei namen bahwo Allah setia lem tempat janjai-Ne ngen ninik puyang ite.

⁹ Yesus kulo menea bangso-bangso luyen memuliakan Allah kerno atei-Ne baik ngen tobo'o. Neak lem Kiteb Sucai tetulis awei yo, “Sebab o uku bakea mujai Ko neak antaro bangso-bangso, uku bakea mbin legau pujian utuk gen-Nu.”

¹⁰ Ade tetulis awei yo kulo, “Beriang-riangba besamo umat Allah de tepiliak, hoi bangso-bangso!”

¹¹ Tetulis awei yo, “Pujaiba Allah, hoi kute bangso, lokba kute tun mujai Si!”

¹² Ngen dio kulo de nadeak Yesaya, “Kunei royot Isai bakea teko su'ang tun de bakea meriteak bangso-bangso; ngen Siba bangso-bangso o bakea ma'ep.”

¹³ Allah adeba penan udi ma'ep. Semoga Si menea ateinu ngen kute sukocito ngen sejahtera kerno udi pecayo ngen Si, supayo ngen kuaso Roh Allah udi tambeak ma'ep ngen Allah.

Sebab-sebabne Paulus temulis ngen tegas

¹⁴ Saudaro-saudaroku! Uku yakin bahwo ade dau hal de baik ngen ko. Udi kulo namen kekutene ngen dapet majea do ngen de luyenne kulo.

¹⁵ Tapi tetang hal-hal tertentu, uku minget udi ngen tegas lem su'et yo, kerno Allah bi melei anugerah ngen uku tugas o.

¹⁶ Si bi menea uku jijai pelayan Kristus Yesus utuk nutus ngen bangso-bangso de iso Yahudi. Ngen uku bertindak sebagai imem, de melei namen Bito Baik kunei Allah, supayo tun-tun iso Yahudi jijai suaktau persembahan ngen Allah de dapet tenimo-Ne. Semoga Roh Allah menea tobo'o jijai suaktau persembahan de khusus utuk Allah.

¹⁷ Jijai, kerno uku bi jijai do ngen Kristus Yesus, mako uku buliak bangga das kerjoku utuk Allah.

¹⁸ Uku binai madeak awei o cuma tetang jano de sudo nea Kristus liwet uku utuk jijai tun-tun iso Yahudi taat ngen Allah. Uku menea o ngen kecek-kecek atau plep,

¹⁹ de senerto keajaiban-keajaiban ngen hal-hal luea biaso; kutene o kerno kuaso Roh Allah. Bito Baik tetang Kristus bi uku melei namen kutene ngen tun-tun, muloi kunei Yerusalem sapei moi Ilirikum.

²⁰ Cito-cito uku adeba melei namen Bito Baik kunei Allah neak penan-penan neak ipe tun ati temi'uk tetang Kristus. Sebab uku coa lok menea kerjo neak pondasi de pek tun luyen.

²¹ Neak lem Kiteb Sucai tetulis, “Tun-tun de ati perneak temimo bito tetang Si, bakea kemliak; ngen tobo'o de ati perneak temi'uk, bakea ngertai.”

Rencano Paulus utuk lalau moi Roma

²² Do'o sebabne bi cet uku buye utuk semulau udi.

²³ Tapi uyo kerjoku neak daerah-daerah o bi selsei. Kekedau taun anne uku lok semulau udi.

²⁴ Be amen liwet kotanu lem pemaneu uku moi Spanyol, uku ma'ep dapet temau ngen udi, beriang tegoa ngen udi. Sesudo'o uku ma'ep udi dapet temulung uku utuk pemaneuku moi Spanyol o.

²⁵ Tapi uyo uku lok moi Yerusalem utuk mbin batuan bagiak umat Allah neak di.

²⁶ Sebab jemaat-jemaat neak Makedonia ngen Akhaya bi tujau utuk melei sumbangan ngen saudaro-saudaro de peset neak antaro umat Allah neak Yerusalem.

²⁷ Ngen riang atei tobo'o mutus utuk menea o. Memang sebeneane tobo'o patut temulung saudaro-saudaro de peset neak Yerusalem o; sebab kunei tun-tun Yahudiba tun-tun iso Yahudi o bi temimo berkat-berkat kunei Allah. Jijai, tun-tun iso Yahudi o patut kulo temulung tun-tun Yahudi ngen berkat-berkat de ade ngen tobo'o.

²⁸ Amen uku bi semlesei tugas uku yo, ngen semreak ngen tobo'o de neak Yerusalem o sumbangan de sudo kenopoa o, mako uku bakea berakat moi negrai Spanyol liwet kotanu.

²⁹ Amen uku teko ngen udi, paset uku teko ngen dau berkat kunei Kristus utuk udi.

³⁰ Demi Tuhan ite Yesus Kristus, ngen demi kasih de nelei Roh Allah, uku minoi nien ngen udi, semoga udi bedu'o kulo ngen sungguak-sungguak besamo-samo uku ngen Allah utuk uku.

³¹ Bedu'oba supayo Allah mbebas uku kunei tangen tun-tun de coa pecayo neak Yudea, ngen supayo tugas uku utuk mbin sumbangan moi Yerusalem tenimo ngen riang atei ngen umat Allah neak di.

³² Ngen awei o, amen Allah kemlokne, uku dapet teko magea udi ngen atei riang. Ngen uku bakea terhibur neak tengeak-tengeak udi.

³³ Mudah-mudahan Allah, de melei sejahtera ngen manusio, semerto saudaro kutene. Amin.