ROMA 14 - JANJAI BLAU Lem Bahaso Jang Bebilai

Jibeak mukum saudaronu

¹ Temimoba tun de lemah imenne ngen coa bogoa madeak pendapetne.

² De su'ang yakin, bahwo si buliak mbuk kute mecem kembuk, tapi tun de lemah imenne cuma mbuk sayur-sayuran bae.

³ Api de mukmei, jibeakba mino tun de coa mukmei, jibeakba semaleak tun de mukmei, sebab Allah bi temimo tun o.

⁴ Api udi, sehinggo udi semaleak hamba tun luyen? Teak si je, teak si us, do'o adeba urusan tuanne su'ang. Tapi si bakea tep je, kerno Tuhan bekuaso jemago si tep je.

⁵ De su'ang madeak bilai de do lebiak peting kunei bilai de luyen, tapi de luyen manggap kute bilai serai bae. Lokba tiep tun benea-benea yakin lem ateine su'ang.

⁶ Api de bepegong ngen do bilai tertentu, si meneane utuk Tuhan. Ngen api mukmei, si meneane utuk Tuhan, sebab si mucep syukur ngen Allah. Ngen api coa mukmei, si meneane utuk Tuhan, ngen si kulo mucep syukur ngen Allah.

⁷ Sebab coa ade su'ang kulo neak antaro ite de idup utuk diraine su'ang, ngen coa ade su'ang kulo de matei utuk diraine su'ang.

⁸ Sebab amen ite idup, ite idup utuk Tuhan, ngen amen ite matei, ite matei utuk Tuhan. Jijai baik idup atau matei, ite adeba de Tuhan temuan.

⁹ Sebab utuk do'oba Kristus bi matei ngen idup igai, supayo Si jijai Tuhan, baik das tun-tun matei, atau das-das tun-tun idup.

¹⁰ Tapi Saudaro-saudaro, getai ko semaleak saudaronu? Atau getai ko mino saudaronu? Sebab ite kute harus madep takhta pengadilan Allah.

¹¹ Kerno ade tetulis: “Demi Uku idup, awei'oba firman Tuhan, kute tun bakea nyembeak neak adep-Ku; ngen kute tun bakea memuliakan Allah.”

¹² Jijai ite masing-masing harus tanggung jawab ngen kute plep ite ngen Allah.

Jibeakba menea saudaronu seset

¹³ Kerno o jibeakba ite saling semaleak. Sebelekne berusahoba supayo udi coa menea jejano de menea su'ang saudaro do imen tergoda ngen beduso.

¹⁴ Kerno uku jijai do ngen Tuhan Yesus, mako uku pecayo nien bahwo coa ade sesuaktau kulo pado dasarne najis; tapi hal o najis utuk su'ang tun, amen tun o manggapne najis.

¹⁵ Tapi amen ngen jano de Saudaro mbuk, su'ang saudaro do imen gis ateine, mako Saudaro coa igai bertindak kerno kasih. Amen Kristus bi matei utuk su'ang tun, jibeakba munyau tun o nusak ngen jano de saudaro mbuk.

¹⁶ Do'o sebabne jibeakba munyau jano de baik utuk udi, udi anggap coa baik ngen tun luyen.

¹⁷ Sebab amen Allah meriteak su'ang tun, jano de si buliak mbuk atau menem, coa peting igai. De peting adeba bahwo tun o temotoa kelok Allah, meding atei tenang ngen temimo sukocito de nelei Roh Allah.

¹⁸ Tun de melayan Kristus seca'o awei o, tun o semnang atei Allah, ngen tun-tun luyen hormat ngen si.

¹⁹ Sebab o tujuan ite harusba bogoa utuk hal-hal de menea kerukunan ngen samo-samo mbangun.

²⁰ Jibeakba, kerno soal kembuk, Saudaro musak jano de sudo kenerjo Allah. Kute kembuk halal utuk nemuk; tapi amen jano de Saudaro mbuk menea tun luyen jijai beduso, mako Saudaro saleak.

²¹ Lebiak baik jibeak mbuk daging atau menem anggur atau menea jano bae amen hal o menea su'ang saudaro do imen jijai beduso.

²² Kunyauba jano de saudaro cayo o, saudaro nea neak adep Allah bae utuk saudaro su'ang. Tun de coa temuan alasan utuk meding saleak ngen jano de nanggapne benea, tun o riang.

²³ Tapi tun de reragau utuk mbuk sesuaktau, sesudo o kerno mbuk kembuk o, tun o senaleak Allah; sebab tun o coa bertindak temurut keyakinanne tetang jano de benea ngen de saleak. Ngen jano de nea coa kerno imen adeba duso.