ROMA 13 - JANJAI BLAU Lem Bahaso Jang Bebilai

Ketaatan ngen pemeriteak

¹ Tiep-tiep tun harus taat ngen pemeriteak de neak dasne, sebab coa ade pemeriteak, de asalne iso kunei Allah; ngen pemeriteak-pemeriteak de ade, das periteak kunei Allah.

² Sebab o api de melawen pemeriteak, si melawen periteak Allah ngen api de menea awei o, bakea teko hukuman das diraine.

³ Sebab amen tun menea baik, si jibeak saben ngen pemeriteak, cuma amen si menea de coa baik. Jano udi lok idup supayo coa saben tea'dep pemeriteak? Neaba jano de baik ngen udi bakea nujai.

⁴ Kerno pemeriteak adeba hamba Allah utuk kebaikannu. Tapi amen udi menea de coa baik, sabenba ngen si, kerno coa sio-sio pemeriteak mukum tun. Pemeriteak adeba hamba Allah utuk males murka Allah das tobo'o de menea de coa baik.

⁵ Sebab o Saudaro harus taat ngen pemeriteak, iso bae kerno kemurkaan Allah, tapi kulo kerno sa'ei atei nurani ite.

⁶ Do'oba kulo sebabne mako udi masen pajak. Kerno tobo'o de murus hal o adeba pelayan-pelayan Allah.

⁷ Nasenba ngen kute tun jano de harus udi masen: pajak ngen tun de temuan hok temimo pajak, nasenba cukai ngen tun de temuan hok temimo cukai; asai saben ngen tun de berhok temimo asai saben ngen hormat ngen tun de berhok temimo hormat.

Kasih adeba kegenapan hukum agamo Yahudi

⁸ Jibeakba udi butang jejano ngen api bae, tapi lokba udi sesamo mengasihi. Sebab api mengasihi sesamone manusio, si sudo kemerjo hukum agamo Yahudi.

⁹ Kerno Firman: Jibeak berzinah, jibeak munuak, jibeak maling, jibeak lok temuan jano de tun luyen temuan; kutene o besamo-samo ngen hukum-hukum de luyen, sudo temasuk lem firman yo, adeba: “Kasihiba sesamonu manusio awei dirainu su'ang!”

¹⁰ Kasih coa menea de coa baik teadep sesamo manusio, kerno o kasih adeba kegenapan hukum agamo Yahudi.

¹¹ Hal yo harus udi nea, kerno udi namen keadaan waktau uyo, adeba bahwo saatne bi sapei utuk udi jagai kunei tidua. Sebab uyo keselamatan bi lebiak pa'ok utuk ite kunei pado waktau ite jijai pecayo.

¹² Bilai bi uak malem, tegoa igai lueng. Sebab o maroba ite bedan menea plep-plep kidek, ngen makei perlengkapan senatai te'ang!

¹³ Maroba ite idup ngen sopan, awei tengeak bilai, jibeak lem pesta pora ngen mabuk, jibeak lem percabulan ngen hawa nafsu, jibeak lem selisiak ngen kidek atei.

¹⁴ Tapi kunyauba Tuhan Yesus Kristus sebagai perlengkapan senatai te'ang ngen jibeakba murus awoknu utuk memuaskan kelokne.