MATIUS 28 - JANJAI BLAU Lem Bahaso Jang Bebilai

Yesus idup igai kunei matei-Ne

¹ Waktau bilai Sabat tun Yahudi sudo liwet, pado bilai minggau pueng-pueng nien, Mariam Magdalena ngen Mariam de luyen'o lalau kemliak kubua'o.

² Tetibo tejijai gepo de lai. Su'ang malaikat Tuhan tu'un kunei surgo lajau gemuling butau penutup'o, ngen temot neak dasne.

³ Papea malaikat'o awei kilet, ngen keracokne putiak nien.

⁴ Tentra penjago de njago neak di kembiak saben sapei tobo'o gemtea ngen jijai awei tun matei.

⁵ Malaikat'o madeak ngen selawei-selawei'o, “Jibeak saben! Uku namen udi mesoa Yesus de sudo senalib'o.

⁶ Si coa gen neak yo. Si bi idup igai awei de sudo nadeak-Ne bel'o. Maro keliakba penan kenubua-Ne.

⁷ Uyo, lalauba gacang, melei namen ngen penotoa-penotoa-Ne, ‘Si bi idup igai ngen uyo Si lalau lebiak dute kunei udi moi Galilea. Neak di udi bakea kemliak Si!’ Mingetba jano de sudo Uku madeak ngen ko.”

⁸ Gegulut selawei-selawei'o teminggea kubua'o ngen saben capua riang delai ngen mlilai utuk melei namen ngen penotoa-penotoa Yesus.

⁹ Tetibo Yesus teko magea selawei-selawei'o ngen madeak, “Salam!” Lajau tobo'o ma'ok Si, sudo'o megep kekea-Ne ngen sembeak Si.

¹⁰ “Jibeakba saben,” nadeak Yesus ngen tobo'o, “lalau melei namen ngen pasuak-pasuak-Ku supayo tobo'o lalau moi Galilea, neak di tobo'o bakea kemliak Uku.”

Penjago-penjago melei namen jano de tejijai

¹¹ Sementaro selawei-selawei'o lalau kekedau kunei tentra penjago de jemago kubua'o belek moi kota, ngen melei namen ngen pemipin imem-imem kute de sudo tejijai.

¹² Pemipin Imem-imem'o basen ngen pemipin-pemipin Yahudi, lajau melei dau caci ngen tentra penjago'o,

¹³ ngen madeak, “Udi mestai madeak bahwo penotoa-penotoa Yesus teko pado bilai klemen, ngen maling mayit-Ne waktau udi dong tidua.

¹⁴ Ngen amen Gubernur temi'uk hal'o keme bakea mbujuk si supayo udi coa dapet masalah jano bae.”

¹⁵ Mako tentra penjago'o mok caci'o, ngen menea awei de nesen ngen tobo'o. Kerno'o cerito'o masiak teniuk neak antaro tun Yahudi sapei pado bilai yo.

Yesus kemten diraine ngen penotoa-penotoan-Ne

¹⁶ Sebelas penotoa Yesus'o lalau moi tebo neak Galilea awei de neriteak Yesus ngen tobo'o.

¹⁷ Pado waktau tobo'o kemliak Yesus neak di tobo'o sujud nyembeak Si. Tapi ade neak antaro tobo'o de ragau.

¹⁸ Yesus maok tobo'o ngen madeak, “Kute kuaso neak surgo ngen neak bumai sudo senreak ngen Uku.

¹⁹ Kerno'o lalauba ngen kute bangso neak kute dunio, jijaiba tobo'o penotoa-penotoa-Ku. Baptis tobo'o ngen sembut Gen Bak, Anok, ngen Roh Sucai kunei Allah.

²⁰ Najeaba tobo'o menea kute de sudo Uku periteak ngen ko. Ingetba Uku bakea selalu semerto udi sapei Bilai Kiamat.”