MARKUS 14 - JANJAI BLAU Lem Bahaso Jang Bebilai

Rencano Utuk Munuak Yesus

¹ Bilai Rayo Paskah ngen Bilai Rayo Ruti Coa Be'agai bakea muloi duai bilai igai. Imem-imem kepalo ngen gu'au-gu'au agamo mesoa dalen utuk temakep ngen munuak Yesus ngen tipu muslihat.

² Sebab tobo'o madeak, “Jibeak pado waktau perayaan, supayo jibeak timboa betekea neak antaro rakyat.”

Yesus nelomok minyok um

³ Yesus berade neak Betania, neak umeak Simon si temuan olon kidek. Ngen dong mukmei, tekoba suang selawei mbin suatu kaco si'ing minyok narwastu murni de la'ang gone. Sesudo necuakne kagen kaco'o, nelomokne minyok'o neak das ulau Yesus.

⁴ Tapi kekedau tun jijai liseak ngen madeak suang ngen de luyen, “Utuk jano metat minyok narwastu'o?

⁵ Sebab minyok'o dapet jenua telau otos dinar lebiak. Cacine dapet nelei ngen tun-tun peset.” Lajau tobo'o mengiak selawei'o.

⁶ Tapi Yesus madeak, “Nunyauba si. Getai udi semaro si? Si bi menea suatu de baik ngen-Ku.

⁷ Kerno tun-tun peset bogoa ade ngen udi, ngen tengen bae udi kemlokne udi dapet temulung tobo'o, tapi Uku coa bakea slalu besamo-samo udi.

⁸ Si bi menea jano de dapet neane. Awok-Ku bi ninyokne sebagoi persiapan utuk kenubua-Ku.

⁹ Sesungguakne Uku madeak ngen udi: Neak ipe bae Bito Baik semiar neak kute dunio, jano de neane yo bakea senebut kulo utuk minget si.”

Yudas muker Yesus

¹⁰ Lajau lalauba Yudas Iskariot, saleak suang kunei keduai belas murid-murid'o, ngen imem-imem kepalo ngen maksud utuk semrak Yesus ngen tobo'o.

¹¹ Tobo'o kembiak riang waktau temi'uk ngen tobo'o bejanjai bakea melei caci ngen si. Sesudo'o si mesoa kesempatan de baik utuk semerak Yesus.

Yesus mbuk paskah ngen murid-murid-Ne

¹² Pado bilai pertamo kunei Bilai Rayo Roti Coa Be'agai, pado waktau tun sembeliak bebirai Paskah, murid-murid Yesus madeak ngen-Si, “Moi ipe Ko meluak keme lalau utuk semiap kembuk Paskah bagiak-Nu?”

¹³ Lajau Si meluak duai tun penotoa-Ne ngen pesen, “Lalauba moi kota; neak di suang tun de mbin cerek si'ing bioa bakea magea udi. Totoaba si.

¹⁴ Nadeakba ngen temuan umeak de nasukne: Pesen Gu'au: neak ipe ruang penan Uku bakea mbuk Paskah besamo-samo ngen murid-murid-Ku?

¹⁵ Lajau tun'o bakea temunjuk udi debuak ruangan das de lai, de sudo lekep ngen tesedio. Neak di ba udi harus semiap kembuk Paskah utuk ite!”

¹⁶ Keduai penotoa'o berakat ngen sapeine neak kuta tobo'o dapet kute awei de nadeak Yesus ngen tobo'o. Lajau tobo'o semiap Paskah.

¹⁷ Sesudo bilai kelmen, tekoba Yesus besamo ngen keduai belas murid o.

¹⁸ Ketiko tobo'o dong temot neak di ngen dong ngembuk, Yesus madeak, “Sesungguakne Uku madeak ngen udi, suang tun neak antaro udi bakea semerak Uku, adeba si de ngembuk ngen Uku.”

¹⁹ Tobo'o kulo muloi meding selen ngen de do madeak ngen Si, “Iso uku, au Tuhan?”

²⁰ Yesus jemawab, “Tun'o adeba saleak suang kunei udi de duai belas yo, si de cemlup ruti neak lem do makuk ngen Uku.

²¹ Sebab Anok Manusio memang bakea lalau sesuoi ngen de tenulis tetang Si, tapi celakoba tun de kerno si Anok Manusio'o senreak. Lebiak baik amen si coa laher.”

Jammau Tuhan

²² Ketiko Yesus ngen murid-murid-Ne dong mukmei, Yesus mok ruti, mucep syukur, mecuak-mecuakne lajau melei ngen tobo'o ngen madeak, “Mokba, dioba awok-Ku.”

²³ Sesudo'o Si mok anggur lem caker, mucep syukur lajau meleine ngen tobo'o, kutene menem kunei caker'o.

²⁴ Ngen Si madeak ngen tobo'o, “Dioba daleak-Ku, daleak perjanjian de tenupeak bagiak dau tun.

²⁵ Sesungguakne Uku madeak ngen udi: Uku coa bakea menem anggur igai sapei pado bilai Uku menemne ngen udi. Adeba de blau, lem Dunio Blau Allah.”

²⁶ Sesudo tobo'o nyanyi legau pujian, lalauba tobo'o moi Tebo Zaitun.

Petrus bakea muker Yesus

²⁷ Lajau Yesus madeak ngen murid-muridne, “Udi kute bakea guyang imennu. Sebab ade tetulis: Uku bakea mokoa gembala ngen bebirai'o bakea cibea.

²⁸ Tapi sesudo Uku idup igai, Uku bakea demute udi moi Galilea.”

²⁹ Nadeak Petrus ngen-Si, “Kunyau tobo'o guyang imenne, tapi Uku coa.”

³⁰ Lajau nadeak Yesus ngen-Si, “Sesungguakne Uku madeak ngen ko, pado bilai yo, kelmen yo kulo, ayok monok berkokok duai kilai, ko bi muker Uku telau kilai.”

³¹ Tapi ngen lebiak sungguak-sungguak Petrus madeak, “Kunyau uku harus matei besamo-samo Ko. Uku coa bakea muker Ko.” Kute de luyen madeak awei'o kulo.

Yesus bedu'o neak Taman Getsemani

³² Lajau sapeiba Yesus ngen murid-murid-Ne moi do penan de genne Getsemani. Nadeak Yesus ngen murid-murid-Ne, “Temot ba neak yo, sementaro Uku bedu'o.”

³³ Si mbin Petrus, Yakobus ngen Yohanes besamo-Ne. Si muloi meding saben ngen liseak.

³⁴ Lajau nadeak-Ne ngen tobo'o, “Atei-Ku kebiak ibo, awei lok matei aseine. Tinggea ba neak yo ngen bejago-jago ba.”

³⁵ Si maju didik, gemulek diraine moi pitok ngen bedu'o supayo, sekirone mukin, saat'o lalau kunei adep-Ne.

³⁶ Nadeak-Ne, “Au abba, Au Bapa, kute sesuatau mukin bagiak-Nu, mokba caker yo kunei adep-Ku, tapi jibeakba jano de Uku kenlok, seluyen jano de Ko kenlok.”

³⁷ Sesudo'o Si teko igai, ngen temau tobo'o gidong tidua. Lajau Si madeak ngen Petrus, “Simon, gidong tidua ko? Jano ko sanggup bejago-jago kunyau de jam bae?

³⁸ Bejago-jagoba ngen bedu'oba, supayo udi coa us moi lem cobaan. Rohnu memang lok menea de benea, tapi plep manusio lemah.”

³⁹ Lajau Si lalau igai ngen mucep du'o de do'o kulo.

⁴⁰ Ketiko Si belek, Si temau tobo'o dong tidua, sebab matai tobo'o sudo benek ngen tobo'o coa namen de harus tobo'o nadeak ngen-Si.

⁴¹ Sesudo'o Si belek utuk ketelau kilaine ngen madeak ngen tobo'o, “Masiak ba udi tidua ngen istirahat? Cukupba! Waktaune bi sapei, keliak, anok manusio senreak moi tangen tun-tun beduso.

⁴² Kelongonba, maroba ite lalau. Si de semereak Uku bi pa'ok.”

Yesus tenakep

⁴³ Waktau Yesus masiak miling, timboaba Yudas, saleak suang kunei keduai belas murid'o, ngen besamo-samo si rombongan tun de mbin pedang ngen gado, neluak ngen imem-imem kepalo, gu'au-gu'au agamo ngen tuai-tuai.

⁴⁴ Tun de semreak Si de melei namen suatu tando ngen tobo'o, “Tun de bakea-Ku semium, do'oba Si, takepba Si ngen mbin ba Si ngen selamat.”

⁴⁵ Ketiko si sapei neak di si lajau ma'ok Yesus ngen madeak, “Rabi,” lajau senium Si.

⁴⁶ Lajau tobo'o megong Yesus ngen tenakep Si.

⁴⁷ Saleak suang kunei tobo'o de ade neak di macung pedangne, lajau temtok pelayan Imem Lai sehinggo putus ti'ukne.

⁴⁸ Nadeak Yesus ngen tobo'o, “Sako udi Uku yo perapok, mako udi teko lekep ngen pedang ngen gado utuk temakep Uku?

⁴⁹ Tiep bilai Uku ade neak tengeak-tengeak udi mengajea neak Bait Allah, ngen udi coa temakep Uku. Tapi harusba genep de tetulis lem Kiteb Sucai.”

⁵⁰ Lajau kute murid'o teminggea Si ngen melilai dirai.

⁵¹ Ade tun u'ai, de waktau'o cuma makei de lembea kain lenan utuk temutup awokne, temotoa Si. Tobo'o lok temakep si,

⁵² tapi si mpas kain lenan'o ngen melilai ngen beleseng.

Yesus neak adep Mahkamah Agamo

⁵³ Sesudo'o Yesus nembin madep Imem Lai. Lajau bekopoaba kute imem kepalo, tuai-tuai ngen gu'au agamo neak di.

⁵⁴ Sementaro'o Petrus temotoa Si kunei uak, sapei milem latet Imem Lai, ngen neak di si temot neak antaro pengawal-pengawal samo bediang.

⁵⁵ Imem-imem lai, ngen paro anggota agamo luyenne mesoa saksai melawen Yesus supayo Si dapet nukum matei, tapi tobo'o coa temaune.

⁵⁶ Dau kulo tun de melei saksai palsu melawen Si, tapi saksai-saksai'o coa sesuai ngen do ngen de luyen.

⁵⁷ Lajau kekedau tun melei saksai palsu melawen Si ngen madeak:

⁵⁸ “Keme sudo temi'uk tun yo madeak: Uku bakea mubuak Bait Sucai de nea ngen tangen manusio yo ngen lem telau bilai bakea, ‘Uku temgok de luyen, de iso nea tangen manusio.’ ”

⁵⁹ Lem hal yo saksai tobo'o coa sesuoi do ngen de luyen.

⁶⁰ Sesudo'o Imem Lai je neak tengeak-tengeak sidang ngen betanye ngen Yesus, “Ko coa jemawab samo sekilai? Awei ipe tetang tenuduak tun-tun yo teadep Ko?”

⁶¹ Tapi Si tep diem ngen coa jenawab jano-jano. Imem Lai'o betanye igai ngen-Si, “Ko jano Rajo Penyelamat, Anok kunei De Terpujai?”

⁶² Jawab Yesus, “Uku ba Si, ngen udi bakea kemliak Anok Manusio temot neak depeak kanen de Maho Kuaso ngen teko neak tengeak-tengeak embun-embun neak lenget.”

⁶³ Lajau Imem Lai'o cema'ik keracokne ngen madeak, “Utuk jano ite perlu saksai igai?

⁶⁴ Udi bi temi'uk Si mino te'adep Allah. Awei ipe pendapet udi?” Tobo'o sepakat mutus bahwo Si harus nukum matei.

⁶⁵ Lajau muloi ba kekedau tun temkek Si ngen temutup papea-Ne ngen teminjau-Si samo madeak ngen Si, “Hoi nebai, cubo teko Ko!” Lajau paro pengawal mokoa Si.

Petrus muker Yesus

⁶⁶ Pado waktau'o Petrus masiak ade neak beak, neak latet. Lajau tekoba suang pelayan selawei Imem Lai.

⁶⁷ Ngen ketiko selawei'o kemliak Petrus dong bediang, si kemliak papeane ngen madeak, “Ko kulo bogoa besamo-samo Yesus, tun Nazaret'o.”

⁶⁸ Tapi Petrus muker Si, nadeakne, “Uku coa namen ngen coa ngertai jano maksudnu.” [Lajau si lalau moi berendo muko ngen bekokokba monok.]

⁶⁹ Ketiko pelayan selawei'o kemliak Petrus igai, madeak ba si kulo ngen tun-tun de ade neak di, “Tun yo saleak suang kunei tobo'o.”

⁷⁰ Tetapi Petrus muker igai. Coa an sesudo'o tun-tun de ade neak di madeak kulo ngen Petrus, “Ko pasti saleak suang kunei tobo'o, jano igai ko tun Galilea!”

⁷¹ Lajau muloiba Petrus mengutuk ngen semupeak, “Uku coa namen tun de udi nadeak yo!”

⁷² Seketiko o kulo bekokok ba monok utuk keduai kileine Petrus tinget bahwo Yesus bi madeak ngen si, “Ayok monok kokok duai kilai, ko bi muker Uku telau kilai.” Lajau Si ngindoi ngen seset.