LUKAS 5 - JANJAI BLAU Lem Bahaso Jang Bebilai

Yesus miliak murid-murid-Ne de dute

¹ Pado waktau Yesus je neak patoi Daneu Genesaret, lajau tun dau gemlumbung Si. Tobo'o lok temi'uk firman Allah.

² Si kemliak duai biduk neak pengger patoi. Nelayan-nelayanne bi tu'un ngen gidong mpuk jalaine.

³ Si kenek moi saleak do biduk o, adeba biduk Simon, ngen meluak si supayo temuluk bidukne uak didik kunei patoi. Lajau Si temot ngen majea tun dau kunei das biduk.

⁴ Sesudo selsei miling, Si madeak ngen Simon, “Lalauba moi penan de lem ngen nambuaba jalainu utuk temakep kan.”

⁵ Simon jemawab, “Gu'au, bi de malem lutup keme bekerjo benek ngen keme coa temakep jejano, tapi kerno Ko meluakne, uku bakea nambua jalai kulo.”

⁶ Sesudo tobo'o meneane, tobo'o temakep dau kan sapei jalai tobo'o muloi ca'ik.

⁷ Sebab o tobo'o minoi tulung ngen kekuat tobo'o neak biduk de luyen. Kekuat tobo'o o teko lajau tobo'o sesamo misai keduai biduk o penuak ngen kan sapei biduk-biduk o gesea tendem.

⁸ Waktau Simon kemliak hal o si kulo sujud neak adep Yesus ngen madeak, “Tuhan, lalauba kuneiku, kerno uku yo tun beduso.”

⁹ Simon ngen kute tun de sesamo si sele kemliak daune kan de tobo'o temakep.

¹⁰ Awei o kulo Yakobus ngen Yohanes, anok-anok Zebedeus, de jijai kuat Simon. Yesus madeak ngen Simon, “Jibeak saben, muloi kunei uyo ko bakea jemalai manusio.”

¹¹ Ngen sesudo tobo'o seme'et biduk-bidukne moi da'et, tobo'o kulo teminggea kutene, lajau temotoa Yesus.

Yesus kema'en suang de olon kidek

¹² Pado waktau Yesus ade neak lem do kota. Neak di ade suang de penuak olon kidek. Waktau si kemliak Yesus, sujudba si ngen bekinoi, “Yesus, amen Yesus lok, Yesus dapet kema'en uku.”

¹³ Yesus megong tun o samo madeak, “Uku lok, ka'enba!” Saat o kulo olonne nyep.

¹⁴ Lajau Yesus temgeak tun o cemrito hal o ngen api bae, nadeak-Ne, “Lalauba ngen imen, ngen minio si utuk maset ko sudo ka'en. Lajau lalauba semreak kurban awei de neriteak Musa, sebagai bukti ngen tun-tun ko benea-benea sudo ka'en.”

¹⁵ Tapi bito tetang Yesus tambeak tesebea moi ipe-ipe, ngen dau tun teko utuk temi'uk Si ngen utuk kena'en kunei olon tobo'o.

¹⁶ Sesudo'o Yesus lalau bedu'o moi penan de sunyai.

Yesus kema'en suang pakuak

¹⁷ Pado waktau Yesus gidong majea, ade kekedau tun Farisi ngen gu'au-gu'au agamo temot neak di. Tobo'o teko kunei Yerusalem, ngen kunei kota-kota neak Galilea ngen Yudea. Kuaso Tuhan ade pado Yesus utuk kema'en tun-tun bolon.

¹⁸ Lajau tekoba kekedau tun musung suang pakuak neak das penan tidua; tobo'o berusaho mbin si masuk ngen meletokne neak adep Yesus.

¹⁹ Kerno tun kembiak dau neak di, tobo'o coa dapet mbin si masuk. Kenekba tobo'o moi atep umeak, lajau mukea atep o, ngen temu'un si ngen penan tiduane neak tengeak-tengeak tun dau pas neak adep Yesus.

²⁰ Waktau Yesus kemliak kembiak lai imen tobo'o, madeakba Si, “Hoi udi, dusonu sudo napun!”

²¹ Tapi gu'au-gu'au agamo Yahudi ngen tun-tun Farisi bepeker lem ateine, “Api tun de mino Allah yo? Api de dapet mapun duso seluyen kunei Allah?”

²² Tapi Yesus namen pekeran tobo'o, lajau madeak ngen tobo'o, “Jano de ko peker lem ateinu?

²³ Ipe lebiak mudeak, madeak: Dusonu sudo napun, jano madeak: klongonba, ngen paneuba?

²⁴ Tapi supayo ko namen, neak dunio yo Anok Manusio bekuaso mapun duso.” Madeakba Si ngen tun pakuak o, “Ngen ko Uku nadeak, klongonba, naketba penan tidua ko ngen belekba moi umeaknu!”

²⁵ Ketiko o kulo klongonba si, neak adep tobo'o, lajau maket penan tiduane ngen belek moi umeakne samo mulio Allah.

²⁶ Kute tun o kagum, lajau mujai Allah, ngen tobo'o kembiak saben, si madeak, “Bilai yo keme bi kemliak hal-hal de kembiak sele!”

Lewi penagiak pajak temotoa Yesus

²⁷ Sesudo'o, ketiko Yesus moi luea, Si kemliak suang penagiak pajak, de genne Lewi, gidong temot neak umeak pajak. Yesus madeak ngen si, “Milauba Uku!”

²⁸ Mako je ba Lewi ngen teminggea kutene, lajau temotoa Yesus.

²⁹ Lewi menea pesta lai utuk Yesus neak umeakne ngen dau penagiak pajak ngen tun-tun luyen milem mbuk sesamo ngen Yesus.

³⁰ Tun-tun Farisi ngen gu'au-gu'au agamo meding coa senang, lajau madeak ngen murid-murid Yesus, “Getai ko mbuk ngen menem sesamo ngen penagiak pajak ngen tun beduso?”

³¹ Lajau jawab Yesus ngen tobo'o, Si madeak, “Iso tun sehat de perlu dokter, tapi tun de bolon.

³² Uku teko iso utuk menok tun benea, tapi tun beduso, supayo tobo'o betobat.”

Hal puaso

³³ Tun-tun o madeak kulo ngen Yesus, “Penotoa-penotoa Yohanes cet puaso ngen semyang, awei yo kulo penotoa-penotoa tun Farisi, tapi penotoa-penotoa-Nu mbuk ngen menem.”

³⁴ Jawab Yesus ngen tobo'o, “Pado pesta nikeak ko coa dapet meluak tamu bepuaso amen sematen semanei masiak ade.

³⁵ Tapi bakea teko waktaune, amen sematen o nemok kunei tobo'o, pado waktau do'oba tobo'o bakea puaso.”

³⁶ Si madeak kulo do umpamo ngen tobo'o, “Coa suang kulo semgit delambea kain kunei bajau blau utuk temepekne pado bajau de an. Amen awei yo, de blau o kulo bakea segit. Pado kain blau coa cocok tenepek kain de an.

³⁷ Awei yo kulo coa suang de temuang anggur de blau moi lem katung babok de tuai, kerno amen awei yo, anggur de blau o bakea semgit katung o ngen anggur o bakea tekuang ngen katung o kulo ajua.

³⁸ Tapi anggur de blau harus naik lem katung de blau kulo.

³⁹ Ngen coa suang kulo de bi menem anggur tuai lok menem anggur de blau, sebab si bakea madeak: ‘Anggur de tuai o baik.’ ”