LUKAS 23 - JANJAI BLAU Lem Bahaso Jang Bebilai

Yesus neak adep Pilatus

¹ Lajau je kute tun neak sidang o, ngen Yesus nembin madep Pilatus.

² Neak di tobo'o muloi temuduak Si, nadeakne, “Bi dapet ngen keme, bahwo tun yo de limau bangso keme, ngen temgeak masen pajak ngen Kaisar, ngen tetang dirai-Ne Si madeak, bahwo Si adeba Kristus, adeba Rajo.”

³ Pilatus temnai ngen Si, “Ko rajo tun Yahudi?” Jawab Yesus, “Ko suang de madeakne.”

⁴ Nadeak Pilatus ngen imem-imem kepalo ngen kute tun dau o, “Uku coa dapet temau kesaleak pado Tun yo.”

⁵ Tapi tobo'o kembiak kuet demsok, nadeakne, “Si majung rakyat ngen ajaran-Ne neak kute Yudea, Si muloi neak Galilea ngen sudo sapei moi mindi.”

Yesus neak adep Herodes

⁶ Ketiko Pilatus temi'uk do'o si temnai, “Jano Tun o suang Galilea?”

⁷ Ngen waktau si namen, bahwo Yesus suang kunei wilayah Herodes, Pilatus kemirim Yesus madep Herodes, de pado waktau o ade kulo neak Yerusalem.

⁸ Ketiko Herodes kemliak Yesus, si kembiak riang. Sebab bi an si lok kemliak-Ne, kerno si cet temi'uk tetang Si, igai kulo si ma'ep kemliak awei ipe Yesus made suaktau tando.

⁹ Si dau betanye ngen Yesus, tapi Yesus coa melei jemawab jejano.

¹⁰ Sementaro o imem-imem kepalo ngen gu'au-gu'au agamo madep kulo neak di ngen temuduak Yesus ngen benek.

¹¹ Herodes ngen anggota-anggota tentrane meliam ngen mimok Yesus, lajau Herodes mpek bajau kebesaran ngen Yesus. Sesudo'o kemirim Yesus ngen Pilatus.

¹² Pado bilai o kulo Herodes ngen Pilatus, de bel'one bemusuak, bekuat igai.

Yesus nukum matei

¹³ Pilatus kemopoa imem-imem kepalo ngen pemipin-pemipin serto rakyat,

¹⁴ lajau madeak ngen, “Ko bi mbin tun yo ngen uku awei suang de semaro rakyat. Ko suang kemliak bahwo uku bi merikso Si, ngen kunei kesaleak-kesaleak de udi temuduak ngen Si coa ade de udi dapet pado-Ne.

¹⁵ Ngen Herodes kulo coa, sebab si kemirim Yesus belek ngen keme. Sesungguakne coa ade suaktau jano de nea Si de setipal ngen ukuman matei.

¹⁶ Jijai uku bakea melipai Si, lajau melepas-Ne.” [

¹⁷ Sebab si wajib melepas suang bagiak tobo'o pado bilai rayo Paskah.]

¹⁸ Tapi tobo'o menggang sesamo, “Nunuakba Si! Nepasba Barabas bagiak keme!” (

¹⁹ Barabas yo nasuk moi lem penjara behubung ngen suaktau pembrontakan de bi tejijai neak lem kota ngen kerno munuak.)

²⁰ Debat igai Pilatus miling ngen sa'ei lek ngen tobo'o, kerno si lok melepas Yesus.

²¹ Tapi tobo'o menggang malesne, nadeakne, “Senalibba Si! Senalibba Si!”

²² Nadeak Pilatus utuk ketelau kilaine ngen tobo'o, “Kesaleak jano de sebeneane bi Si menea? Coa ade kesaleak de uku dapet pado-Ne, de setipal ngen ukuman matei. Jijai uku bakea melipai Si, lajau melepas-Ne.”

²³ Tapi ngen menggang tobo'o demsok ngen temutut, supayo Yesus senalib, ngen akhirne tobo'o menang.

²⁴ Lajau Pilatus mutus, supayo tututan tobo'o kenabul.

²⁵ Ngen si melepas tun de nasuk moi lem penjara kerno pembrontakan ngen munuak o sesuoi ngen tututan tobo'o, tapi Yesus senreakne ngen tobo'o utuk nea sesuoi ngen kelok tun-tun'o.

Yesus senalib

²⁶ Ketiko tobo'o mbin Yesus, tobo'o tema'en suang de genne Simon kunei Kirene, de blau teko kunei luea kota, lajau neletok salib o neak das bau ne, supayo nusungne samo temotoa Yesus.

²⁷ Sejumlah lai tun temotoa Si, neak antarone dau selawei de ngindoi ngen ibo.

²⁸ Yesus jemling ngen tobo'o ngen madeak, “Hoi semulen-semulen Yerusalem! Jibeakba udi mindoi Uku, tapi nindoiba dirainu suang ngen anok-anoknu!

²⁹ Sebab bakea teko waktaune tun bakea madeak, ‘Padeak butungne selawei-selawei de coa perneak tenei lai, de coa perneak temuan anok ngen coa perneak megep cupik!’

³⁰ Mako tun bakea muloi madeak ngen tebo-tebo, ‘Ubuakba teminggang keme!’ Ngen tebo-tebo, ‘Timbunba keme!’

³¹ Sebab amen tun menea awei'o te'adep kiyeu idup, jano de bakea tejijai ngen kiyeu ke'ing?”

³² Ngen ade kulo ni'ing duai tun luyen, adeba duai penjahat utuk nukum matei sesamo ngen Si.

³³ Ketiko tobo'o sapei neak penan de genne “Tebo Krokong”, tobo'o semalib Yesus neak di ngen kulo keduai tun penjahat o, de suang neak depeak kanen-Ne ngen de luyen neak depeak kideu-Ne.

³⁴ Yesus bedu'o, “Au Bapa! Napunba tobo'o, sebab tobo'o coa namen jano de tobo'o nea.” Ngen tobo'o muang lotre utuk magiak bajau Yesus.

³⁵ Tun dau je neak di ngen kemliak kutene. Pemipin-pemipin ngupet Si, nadeakne, “Tun luyen Si semlamat, kunyauba uyo Si semlamat dirai-Ne suang, amen Si adeba Mesias, tun de niliak Allah.”

³⁶ Kulo prajurit-prajurit ngupet Si. Tobo'o melei anggur pi'iak ngen Si.

³⁷ Nen madeak, “Amen Ko adeba rajo tun Yahudi, senlamat ba dirai-Nu!”

³⁸ Ade kulo tulisan neak das ulau-Ne, “Dioba Rajo Tun Yahudi.”

³⁹ Suang kunei penjahat de genatung o mimok Yesus, nadeakne, “Iso Ko adeba Kristus? Senlamatba dirai-Nu ngen keme!”

⁴⁰ Tapi de suang tema'ok si, nadeakne, “Coa udi saben, kulo coa ngen Allah, gidong udi temimo ukuman de serai?

⁴¹ Ukuman ite memang setipal, sebab ite temimo bales de setipal ngen plep ite, tapi tun yo coa menea sesuaktau de saleak.”

⁴² Lajau si madeak, “Yesus, tingetba uku, amen Ko teko awei Rajo.”

⁴³ Nadeak Yesus ngen si, “Uku madeak ngen ko, sesungguakne bilai yo kulo bakea ade sesamo ngen Uku neak lem Firdaus.”

Yesus matei

⁴⁴ Ketiko o bilai sudo kekiro jam duai belas, lajau kelem neak kute daerah o sapei jam telau.

⁴⁵ Sebab matai bilai coa besinea. Ngen tabir Umeak Tuhan ca'ik jijai duai.

⁴⁶ Lajau Yesus menggang ngen sa'ei nya'ing, “Au Bapa, moi lem tangen-Nu Uku senreak nyabai-Ku.” Ngen sesudo madeak awei'o Si semreak nyabai-Ne.

⁴⁷ Ketiko kepalo pasukan kemliak jano de tejijai, si mujai Allah, nadeakne, “Sungguak, tun yo adeba tun benea!”

⁴⁸ Tun dau de teko neak di utuk temoton, kemliak jano de tejijai. Tobo'o kute belek ngen atei de kembiak kesal.

⁴⁹ Kute tun de kemnal Yesus kunei pa'ok, temasuk selawei-selawei de temotoa Si kunei Galilea, je euak ngen kemliak kutene o.

Yesus kenubua

⁵⁰ Adeba suang de genne Yusuf. Si anggota Majelis Lai, ngen suang de baik igai benea.

⁵¹ Si coa tujau ngen putusan ngen ca'o Majelis o. Si asalne kunei Arimatea, debuak kota Yahudi ngen si mbot Allah meriteak sebagai Rajo.

⁵² Si lalau madep Pilatus ngen minoi mayit Yesus.

⁵³ Ngen sesudo si temu'un mayit o, si kempanne ngen kain lenan, lajau mletok neak lem kubua de nea kunei tebo butau. Kubua o ati perneak nakei.

⁵⁴ Bilai o adeba bilai Jum'at; ngen bilai Sabat gesea muloi.

⁵⁵ Ngen selawei-selawei de teko sesamo ngen Yesus kunei Galilea, milau serto ngen tobo'o kemliak kubua o ngen awei ipe mayit-Ne neletok.

⁵⁶ Ngen sesudo belek, tobo'o semiap repeak-repeak ngen minyok um. Pado bilai Sabat tobo'o bedan bekerjo utuk temurut ukum agamo Yahudi.