LUKAS 22 - JANJAI BLAU Lem Bahaso Jang Bebilai

Rencano utuk munuak Yesus

¹ Bilai rayo Ruti coa ade Agai, de senbut Paskah, sudo pa'ok.

² Imem-imem kepalo ngen gu'au-gu'au agamo mesoa dalen, awei ipe tobo'o dapet munuak Yesus seca'o diem-diem, sebab tobo'o saben ngen tun dau.

Yudas mianat Yesus

³ Mako masukba Iblis moi lem Yudas, de genne Iskariot, suang kunei keduai belas penotoa Yesus.

⁴ Lajau lalauba Yudas ngen imem-imem kepalo ngen kepalo pengawal Umeak Tuhan ngen berunding ngen tobo'o, awei ipe si dapet semreak Yesus ngen tobo'o.

⁵ Tobo'o kembiak riang ngen mupakat utuk melei sejumlah caci ngen si.

⁶ Si tujau, ngen muloi kunei waktau o si mesoa kesempatan de baik utuk semreak Yesus ngen tobo'o ngen coa ade tun dau namen.

Semiap utuk mbuk Paskah

⁷ Mako sapeiba Bilai Rayo Ruti Coa ade Agai, adeba bilai neak ipe tun arus sembeliak bebirai Paskah.

⁸ Lajau Yesus meluak Petrus ngen Yohanes, nadeak-Ne, “Lalauba, seniapba kembuk Paskah utuk ite!”

⁹ Nadeak tobo'o ngen Si, “Neak ipe Ko kenlok keme semiapne?”

¹⁰ Jawab-Ne, “Amen udi masuk moi lem kota, udi bakea temma suang de mbin gerigik bisai bioa. Tenotoaba si moi lem umeak de nasukne,

¹¹ ngen nadeakba ngen tuan umeak o, ‘Gu'au temnai ngen udi: Neak ipe penan Uku sesamo ngen penotoa-penotoa-Ku bakea mbuk Paskah?’

¹² Lajau tun o bakea temunjuk ngen udi debuak bilik das de lai de sudo lekep, neak di ba udi arus semiapne.”

¹³ Mako berakatba tobo'o ngen tobo'o temmau kute awei de nadeak Yesus ngen tobo'o. Lajau tobo'o semiap Paskah.

Tuhan temtep jamau

¹⁴ Ketiko sapei waktaune, Yesus temot mbuk serpok ngen penotoa-penotoa-Ne.

¹⁵ Nadeak-Ne ngen tobo'o, “Uku kembiak indau mbuk Paskah yo serpok ngen udi, ayok Uku saro!

¹⁶ Sebab Uku madeak ngen udi: Uku coa bakea mbukne igai sapei si dapet gemnepne lem Dunio Blau Allah.”

¹⁷ Sesudo'o Si mok makuk anggur, mucep syukur, lajau madeak, “Mokba dio ngen nagiakba neak antaro udi.

¹⁸ Sebab Uku madeak ngen udi, muloi kunei uyo yo Uku coa bakea menem igai anggur sapei Allah meriteak sebagai Rajo bi teko.”

¹⁹ Lajau Yesus mok ruti. Sesudo mucep syukur, Si memecuakne ngen meleine ngen tobo'o, nadeak-Ne, “Dioba awok-Ku de senreak bagiak udi; neaba dio utuk minget Uku.”

²⁰ Awei'o kulo nea-Ne ngen makuk anggur sesudo mukmei; Si madeak, “Makuk anggur yo adeba perjanjian belau de nsah ngen daleak-Ku, de tenupeak bagiak udi.”

²¹ “Tapi, keliak, tangen tun de semreak Uku, ade sesamo ngen Uku neak mija yo!

²² Sebab Anok Manusio memang bakea lalau awei de bi tentep, tapi celakoba tun de muker gen-Ne!”

²³ Lajau muloiba tobo'o betanye-tanye do ngen de luyen, api kunei antaro tobo'o de bakea menea hal o.

Betekea tetang api de lebiak lai

²⁴ Neak antaro penotoa-penotoa Yesus betekea, kerno tobo'o lok namen api de nanggap lebiak lai neak antaro tobo'o.

²⁵ Yesus madeak ngen tobo'o, “Rajo-rajo bangso-bangso meriteak rakyat tobo'o ngen tun-tun de maneu kuaso das tobo'o senbut ‘Pelindung Rakyat’.

²⁶ Tapi udi coaba awei'o, sebelekne de lebiak lai neak antaro udi lokba jijai awei de lebiak uai ngen pemipin awei pelayan.

²⁷ Api de lebiak lai: tun de temot mukmei, jano de melayan? Paset tun de temot o. Tapi Uku ade neak tengeak-tengeak udi awei pelayan.

²⁸ Ko ba de tep tinggea sesamo ngen Uku lem kute cubo de Uku meding.

²⁹ Ngen Uku temtau hok-hok Kerajaan bagiak udi, serai awei Bapa-Ku temtaune bagiak-Ku.

³⁰ Bahwo udi bakea mukmei ngen menem do mija ngen Uku neak lem Kerajaan-Ku ngen udi bakea temot neak das takhta utuk makim keduai belas sukau Israel.”

Nubuat bahwo Petrus bakea muker Yesus

³¹ “Simon, Simon, ti'uk! Iblis bi nelei izin utuk ngujai udi, awei gelpung cen'ei kunei kaleakne.

³² Tapi Uku bi bedu'o utuknu, supayo imennu jibeak lemuak. Ngen udi, amen ko sudo insaf, kenuetba pasuak-pasuaknu.”

³³ Jawab Petrus, “Tuhan, uku besedio masuk sel ngen matei sesamo ngen Ko!”

³⁴ Nadeak Yesus, “Pecayoba Petrus ayok monok bekokok bilai yo, ko telau kilai muker Uku.”

Dupet, katung jano pedang

³⁵ Lajau Si madeak ngen tobo'o, “Ketiko Uku mbo udi ngen coa mizin mbin dupet, sangau ngen sepatu, jano ade de ku'ang ngen udi?” Jawab tobo'o, “Coa!”

³⁶ Nadeak Yesus, “Tapi uyo yo, api de temuan dupet, lokba si mbinne, awei yo kulo de temuan sangau; ngen api de coa temuanne lokba si jemuoa jubahne ngen temukua pedang.

³⁷ Sebab Uku madeak ngen udi, bahwo ayat Kiteb Sucai yo arus gennep pado-Ku. Si bakea te'itung neak antaro pembrutak-pembrutak. Sebab jano de tetulis tetang Uku gidong gennep.”

³⁸ Nadeak tobo'o, “Tuhan, dio duai pedang.” Jawab-Ne, “Sudo gennep.”

Yesus bedu'o neak Tebo Zaitun

³⁹ Lalauba Yesus moi luea kota ngen awei ipe biaso Si temujau Tebo Zaitun. Penotoa-penotoa-Ne kulo temotoa Si.

⁴⁰ Sesudo sapei neak penan o Si madeak ngen tobo'o, “Bedu'oba supayo udi jibeak beduso amen udi cenubo.”

⁴¹ Sesudo Si me'uak dirai kunei tobo'o kekiro seke'uak butau neluk, lajau Si sujud ngen bedu'o.

⁴² Nadeak-Ne, “Au Bapa-Ku, amen Ko lok, mokba saro yo kunei pado-Ku; tapi isoba kelok-Ku, tapi kelok-Nuba de tejijai.” [

⁴³ Mako suang malaikat kunei lenget kemten dirai ngen-Ne utuk kemuet Si.

⁴⁴ Yesus kembiak saben ngen kembiak sesungguak bedu'o. Eteng-Ne awei daleak temtik moi taneak.]

⁴⁵ Lajau Si klongon kunei du'o-Ne ngen belek ngen penotoa-penotoa-Ne, tapi Si temmau tobo'o gidong tidua kerno ibo.

⁴⁶ Nadeak-Ne ngen tobo'o, “Getai udi tidua? Klongonba ngen bedu'o, supayo udi jibeak us moi lem cubo.”

Yesus tenakep

⁴⁷ Waktau Yesus masiak miling, tekoba dekaben tun, Yudas suang kunei keduai belas penotoa o, paneu neak adep tobo'o. Yudas ma'ok Yesus lajau semium-Ne.

⁴⁸ Mako nadeak Yesus ngen si, “Hoi Yudas, ko semreak Anok Manusio ngen semium?”

⁴⁹ Ketiko penotoa-penotoa Yesus kemliak jano de bakea tejijai, tobo'o madeak, “Tuhan, keme semrang tobo'o ngen pedang!”

⁵⁰ Ngen suang kunei tobo'o mabeak hambo Imem Lai sehinggo putus ti'uk kanenne.

⁵¹ Tapi Yesus madea, “Sudoba do'o!” Lajau Si megong ti'uk tun o ngen kema'enne.

⁵² Mako Yesus madeak ngen imem-imem kepalo ngen kepalo pengawal Umeak Tuhan serto tetuai de teko utuk temakep Si, nadeak-Ne, “Ko sako Uku perapok, mako udi teko lekep ngen pedang ngen gado?

⁵³ Padohal tetiep bilai Uku ade neak tengeak-tengeak udi neak lem Umeak Tuhan, ngen udi coa temakep Uku. Tapi dioba saat udi, ngen dioba kuaso kegelapan o.”

Petrus muker Yesus

⁵⁴ Lajau Yesus tenakep ngen nembin kunei penan o. Si ni'ing moi umeak Imem Lai. Ngen Petrus temotoa kunei uak.

⁵⁵ Neak tengeak-tengeak latet umeak o tun mpek opoi ngen tobo'o temot gemlungne. Petrus kulo temot neak tengeak-tengeak tobo'o.

⁵⁶ Suang hambo selawei kemliak si temot pa'ok opoi; si kemliakne, lajau madeak, “Kulo tun yo sesamo ngen Si.”

⁵⁷ Tapi Petrus muker, nadeakne, “Iso, uku coa kenal ngen Si!”

⁵⁸ Coa kedau an sesudo'o suang tun luyen kemliak si lajau madeak, “Ko kulo suang kunei tobo'o!” Tapi Petrus madeak, “Iso, uku coa!”

⁵⁹ Kekiro dejam sesudo'o suang luyen madeak ngen tegas, “Sungguak, tun yo kulo sesamo ngen Si, sebab si kulo tun Galilea.”

⁶⁰ Tapi Petrus madeak, “Iso, uku coa namen jano de udi nadeak.” Saat o kulo, sementaro si madeak, bekokokba monok.

⁶¹ Lajau Tuhan jemling ngen demnong Petrus. Mako tingetba Petrus bahwo Tuhan bi madeak ngen si, “Ayok monok bekokok pado bilai yo, ko bi telau kilai muker Uku.”

⁶² Lajau si lalau moi luea ngen ngindoi ngen ibone.

Yesus neliam ngen nokoa

⁶³ Ngen tun-tun tema'en Yesus, meliam ngen mokoa Si.

⁶⁴ Tobo'o temutup matai-Ne ngen temnai, “Cuboba nadeak api de mokoa Ko?”

⁶⁵ Ngen dau igai kecek mimok de nucep tobo'o ngen-Si.

Yesus neak adep mahkamah agamo

⁶⁶ Sesudo bilai pueng pemipin-pemipin Yahudi, imem-imem kepalo ngen gu'au-gu'au agamo bekopoa lajau Yesus nembin moi adep Mahkamah Agamo tobo'o.

⁶⁷ Nadeakne, “Amen Ko adeba Mesias, nadeakba ngen keme.” Jawab Yesus, “Sekilai kulo Uku madeakne ngen udi, tapi udi coa masai.

⁶⁸ Ngen amen Uku temnai ngen udi, tapi udi coa bakea jemawab.

⁶⁹ Muloi uyo Anok Manusio sudo temot neak depeak kanen Allah De Mahokuaso.”

⁷⁰ Nadeak tobo'o kute, “Amen awei'o, Ko yo Anok Allah?” Jawab Yesus, “Ko suang madeak, bahwo Ukuba Anok Allah.”

⁷¹ Lajau nadeak tobo'o, “Utuk jano ite perlu saksai igai? Ite yo bi temi'ukne kunei bibia-Ne suang.”