LUKAS 20 - JANJAI BLAU Lem Bahaso Jang Bebilai

Pertanyaan tetang kuaso Yesus

¹ Pado suaktau bilai ketiko Yesus ngajea tun dau neak Umeak Tuhan ngen semapei Bito Baik, tekoba imem-imem kepalo ngen gu'au-gu'au agamo serto tetuai moi mindi.

² Tobo'o madeak ngen Yesus, “Nadeakba ngen keme ngen kuaso ipe Ko menea hal-hal o, api de melei kuaso o ngen Ko!”

³ Jawab Yesus, “Uku kulo lok temnai ngen ko. Nadeakba ngen Uku,

⁴ baptisan Yohanes o, kunei surgo jano kunei manusio?”

⁵ Tobo'o temimbangne neak antaro tobo'o, ngen madeak, “Amen ite madeak: ‘Kunei surgo, Si bakea madeak: Getai udi coa masai ngen si?’

⁶ Tapi amen ite madeak, ‘Kunei manusio,’ kute rakyat bakea meluk ite ngen butau, sebab tobo'o yakin, bahwo Yohanes adeba suang nebai.”

⁷ Lajau tobo'o jemawab, “Bahwo tobo'o coa namen kunei ipe baptisan o.”

⁸ Mako nadeak Yesus ngen tobo'o, “Amen awei'o, Uku kulo coa madeak ngen udi ngen kuaso ipe Uku menea hal-hal o.”

Perumpamo pekerjo-pekerjo kebun anggur

⁹ Lajau Yesus madeak perumpamo yo ngen tun dau, “Suang mukok kebun anggur; sesudo'o si semiwone ngen pekerjo-pekerjo lajau berakat moi negrai luyen utuk waktau de agok an.

¹⁰ Ketiko sudo sapei musimne panen anggur, si meluak suang pelayan ngen pekerjo-pekerjo o, supayo tobo'o semreak pa'ok kunei asea kebun anggur o ngen si. Tapi pekerjo-pekerjo o mokoa pelayan o ngen meluak si belek ngen coa ade uliak.

¹¹ Sesudo'o si meluak suang pelayan de luyen, tapi pelayan o kulo nokoa ngen senelek tobo'o, lajau neluak belek ngen coa ade uliak.

¹² Selanjutne si meluak pelayan de ketelau. Tapi tun o kulo nokoa tobo'o, lajau enting moi luea kebun o.

¹³ Mako nadeak tuan kebun anggur o, ‘Jano de arus ku menea? Uku bakea meluak anokku suang; paset tobo'o coa binai.’

¹⁴ Tapi ketiko pekerjo-pekerjo o kemliak anokne o, tobo'o berunding, nadeakne, ‘Si adeba ahli waris, maro ite munuak si. Supayo warisan yo jijai ite temuan.’

¹⁵ Lajau tobo'o meting si moi luea kebun anggur o ngen munuakne. Uyo jano de bakea nea tuan kebun anggur o ngen tobo'o?

¹⁶ Si bakea teko ngen munuak pekerjo-pekerjo o, ngen semreak kebun anggur o ngen tun luyen.” Temi'uk do'o tobo'o madea, “Sekilai-kilai jibeak!”

¹⁷ Tapi Yesus demnong tobo'o ngen madeak, “Amen awei'o jano tai ayat yo? ‘Butau de nuang tukang-tukang bangunan bi jijai butau sudut?’

¹⁸ Kute tun de us moi butau o bakea ajua; ngen api de teninggang butau o bakea jijai debu.”

Soal masen pajak

¹⁹ Lajau gu'au-gu'au agamo ngen imem-imem kepalo berusaho temakep Si pado saat o kulo, sebab tobo'o namen, bahwo tobo'o ba de jijai maksud-Ne ngen perumpamo o, tapi tobo'o saben ngen tun dau.

²⁰ Gu'au-gu'au agamo ngen imem-imem kepalo demnong Yesus. Tobo'o meluak ngen-Ne matai-matai de ce'icak awei tun jujur, supayo tobo'o dapet temakep-Ne ngen temanye ngen semreak-Ne ngen wewenang ngen kekuaso gubernur.

²¹ Tun-tun o temnai ngen Yesus, “Gu'au, keme namen bahwo beneaba jano de Ko madeak ngen najea, ngen Ko cao mok, tapi ngen jujur ngajea dalen Allah.

²² Jano keme buliak masen pajak ngen Kaisar jano coa?”

²³ Tapi Yesus namen maksud de licik o, lajau madeak ngen tobo'o,

²⁴ “Tenunjukba ngen Uku do keping caci pirok. Gambar ngen tulisan api dio?” Jawab tobo'o, “Gambar ngen tulisan Kaisar.”

²⁵ Lajau nadeak Yesus ngen tobo'o, “Amen awei'o, neleiba ngen Kaisar jano de wajib ko melei ngen Kaisar, ngen Allah jano de wajib ko melei ngen Allah!”

²⁶ Tobo'o coa dapet temakep Si lem kecek-Ne neak muko tun dau. Tobo'o selle bakea jawab-Ne o ngen tobo'o diem.

Tetang idup igai

²⁷ Mako tekoa ngen Yesus kekedau tun Saduki, de coa makau adene idup igai. Tobo'o temnai ngen Si,

²⁸ “Gu'au, Musa temulis periteak yo utuk ite: Amen suang, de temuan pasuak semanei matei gidong ngenyanne masiak ade, tapi si coa teminggea anok, pasuakne arus nikeak ngen ngenyanne o ngen midup igai royot bagiak pasuakne o.

²⁹ Adeba tujuak tun pasuak. De dute nikeak ngen suang selawei lajau matei ngen coa teminggea anok.

³⁰ Lajau anok de keduai o nikeak,

³¹ ngen de ketelau ngen awei'oba sapei ngen ketujuak pasuak o, tobo'o kutene matei ngen coa teminggea anok.

³² Akherne selawei o kulo matei.

³³ Awei ipe uyo ngen selawei o, api neak antaro tun-tun o de jijai adukne pado bilai idup igai? Sebab ketujuakne bi nikeak ngen si.”

³⁴ Jawab Yesus ngen tobo', “Tun-tun de idup uyo yo nikeak.

³⁵ Tapi tun-tun de nanggap patut utuk dapet bagiak lem dunio de luyen o, coa nikeak.

³⁶ Sebab tobo'o coa dapet matei igai; tobo'o serai awei malaikat-malaikat ngen tobo'o adeba anok-anok Allah, kerno tobo'o bi idup igai.

³⁷ Tetang idup igaine tun matei, Musa bi melei namenne lem ayat tetang sakea tebo, neak ipe Tuhan de senbut ‘Allah Abraham, Allah Ishak ngen Allah Yakub’.

³⁸ Si iso Allah tun matei, tapi Allah tun idup, sebab neak adep Si kute tun idup.”

³⁹ Temi'uk do'o kekedau gu'au agamo madeak, “Gu'au, jawab-Nu o tepat sekilai.”

⁴⁰ Sebab do'o tobo'o coa binai igai temanye jejano ngen Yesus.

Hubungan antaro Yesus ngen Daud

⁴¹ Tapi Yesus madeak ngen tobo'o, “Awei ipe tun dapet madeak, bahwo Mesias adeba Anok Daud?

⁴² Sebab Daud suang madeak lem kiteb Mazmur: ‘Tuhan bi befirman ngen Tuanku: Temotba neak depeak kanen-Ku,

⁴³ sapei Uku menea musuak-musuak-Nu jijai takluk ngen Ko.’

⁴⁴ Jijai amen Daud sembut Si Tuanne, awei ipe mukin Si anokne kulo?”

Yesus melei nasehat supayo atei-atei te'adep gu'au-gu'au agamo

⁴⁵ Ketiko kute tun dau temi'uk Yesus, Yesus madeak ngen penotoa-penotoa-Ne,

⁴⁶ “Waspadaba te'adep gu'au-gu'au agamo de galok paneu makei jubah panjang ngen galok temimo penan terhormat neak tengeak pasar. Tobo'o galok temot neak penan terhormat baik neak lem umeak semyang ngen pesta.

⁴⁷ Tobo'o mike jando-jando ngen mbut umeakne. Ngen utuk temutup kejahatan tobo'o o, tobo'o bedu'o pepanjang! Hukuman tobo'o paset benek!”