LUKAS 19 - JANJAI BLAU Lem Bahaso Jang Bebilai

Yesus ngen Zakheus

¹ Yesus masuk moi kota Yerikho ngen paneu terus liwet kota o.

² Neak di ade suang de genne Zakheus, kepalo penagiak pajak de tun kayo.

³ Si berusaho utuk kemliak tun jano Yesus o, tapi si coa berasea kerno tun dau, sebab awokne pendok.

⁴ Si kulo melilai demno tun dau, lajau kemnek pun ara utuk kemliak Yesus de bakea liwet neak di.

⁵ Ketiko Yesus sapei moi penan o, Si kemliak moi das ngen madeak, “Zakheus, segro ba tu'un, sebab bilai yo Uku arus singgeak neak umeaknu.”

⁶ Lajau Zakheus segro tu'un ngen temimo Yesus ngen sukocito.

⁷ Kemliak hal o, kute tun muloi gerunyam, nadeakne, “Si melandai neak umeak tun beduso.”

⁸ Tapi Zakheus je ngen madeak ngen Tuhan, “Tuhan, keliakba, setengeak kunei hokku bakea uku melei ngen tun peset ngen sekirone ade sesuaktau de uku mbut kunei sesuang bakea uku melek pat kilai lipet.”

⁹ Nadeak Yesus ngen si, “Bilai yo bi tejijai keselamatan ngen seisai umeak yo, kerno tun yo kulo anok Abraham.

¹⁰ Sebab Anok Manusio teko utuk mesoa ngen semlamat de nyep.”

Perumpamo caci mas

¹¹ Sementaro tun masiak temi'uk Yesus miling, Si cemrito debuak perumpamo. Sebab pado waktau o Si berade pa'ok Yerusalem, ngen tun kemiro bahwo Allah segro bakea meriteak awei Rajo neak dunio.

¹² Yesus madeak, “Adeba suang bangsawan de lalau moi negrai uak utuk jijai rajo, sesudo'o belek.

¹³ Ayok berakat Si menok depuluak hambane, lajau melei ngen tobo'o tiep tun dekeping caci mas, nadeakne, ‘Pakeiba dio utuk jagea sapei uku teko igai.’

¹⁴ Tapi tun negraine o jengik ngen si. Jijai, sesudo si berakat, tobo'o kemirim utusan utuk madeak, ‘Keme coa lok tun yo jijai rajo keme.’

¹⁵ Tapi bangsawan o jijai rajo, sesudo'o belek igai moi negraine. Segro si menok pelayan-pelayanne madep, utuk namen kedau utung de bi tobo'o dapet.

¹⁶ Tun de dute teko ngen madeak, ‘Tuan, do caci mas de Tuan nelei o bi uku jemijai depuluak.’

¹⁷ Nadeakne ngen tun o, ‘Baik sekilai plepnu o, hoi pelayan de baik, ko bi setia lem pekaro titik, kerno o tenimoba kuaso das depuluak kota.’

¹⁸ Tekoba pelayan de keduai ngen madeak, ‘Tuan, caci mas Tuan bi masea lemo caci mas.’

¹⁹ Nadeakne ngen tun o, ‘Ngen ko, kenuasoba lemo kota.’

²⁰ Pelayan de luyen teko ngen madeak, ‘Tuan, dio caci Tuan; ku maikne lem stangen.

²¹ Sebab uku saben ngen Tuan, kerno Tuan tun de kejam. Tuan mok jano de iso Tuan temuan, ngen Tuan mungut asea neak penan de coa Tuan temanem.’

²² Nadeakne ngen tun o, ‘Hoi pelayan de kidek, uku bakea makim ko temurut keceknu suang. Ko sudo namen bahwo uku adeba tun de kejam, de mok jano de coa perneak uku mpek ngen mopoa jano de coa uku temanem.

²³ Amen awei o getai ko coa mpek caci o moi bank supayo amen uku belek ku dapet mok caci ngen bungaine?’

²⁴ Lajau nadeakne ngen tun-tun de je neak di, ‘Mokba caci mas de do o kunei padone ngen neleiba ngen tun de temuan caci mas depuluak o.’

²⁵ Nadeak tobo'o ngen si, ‘Tuan, si sudo temuan depluak caci mas.’

²⁶ Jawabne, ‘Uku madeak ngen ko: Tiep tun de temuan, ngen si bakea nelei, tapi tun de coa temuan, kunei padone bakea nemok, kulo jano de ade padone.

²⁷ Bakea tapi kute musuakku yo, de coa senang uku jijai rajone, mbinba tobo'o moi miyo ngen nunuakba tobo'o neak adep mataiku!’ ”

Yesus masuk moi Yerusalem ngen jayo

²⁸ Sesudo madeak kutene o Yesus demno tobo'o ngen temrus paneu-Ne moi Yerusalem.

²⁹ Waktau sapei pa'ok Betfage ngen Betania neak Tebo Zaitun, Si meluak duai tun penotoa-Ne lalau lebiak dute.

³⁰ Nadeak Yesus ngen tobo'o, “Lalauba moi sadei mukok'o, amen ko sudo masuk neak di, ko bakea kemliak dikup keledai uai tenambang, de ati perneak tun kemnekne. Nepasba keledai o ngen mbinba moi miyo.

³¹ Amen ade tun temnai ngen ko: ‘Getai ko melepasne?’ Jawabba awei yo: ‘Tuhan perlu ngen si.’ ”

³² Lajau lalauba tobo'o de neluak o, ngen tobo'o dapet kute sesuaktau awei de bi Yesus madeak.

³³ Ketiko tobo'o melepas keledai o, nadeak tun de temuan keledai o, “Getai udi mpas keledai'o?”

³⁴ Nadeak tobo'o, “Tuhan perlu ngen si.”

³⁵ Tobo'o mbin keledai o ngen Yesus. Lajau mpek lepekne ngen keracok tobo'o ngen temulung Yesus kenek moi dasne.

³⁶ Sementaro Yesus kenek moi das keledai o tobo'o metang keracokne neak dalen.

³⁷ Ketiko Yesus pa'ok Yerusalem, neak penan dalen menu'un kunei Tebo Zaitun, muloiba kute penotoa-Ne de mi'ing si beriang ngen mujai Allah ngen sa'ei nya'ing kerno kute mujizat de bi tobo'o keten.

³⁸ Nadeak tobo'o, “Berkatba Si de teko awei Rajo lem gen Tuhan! Damoi sejahtera neak surgo, ngen kemulio Allah neak penan De Kembiak Lekat!”

³⁹ Kekedau tun Farisi kunei antaro tun dau o madeak ngen Yesus, “Gu'au, neluakba penotoa-penotoa Bapok diem.”

⁴⁰ Jawab Yesus, “Uku madeak ngen ko! Amen tobo'o yo diem, mako butau yo bakea menggang.”

Yesus selen ngen Yerusalem

⁴¹ Waktau Yesus bi pa'ok ngen kemliak kota o, Si ngindoi.

⁴² Nadeak-Ne, “Wahai, padeak baikne amen pado bilai yo kulo ko ngertai jano de perlu utuk damoi sejahteranu! Tapi uyo hal o tebunyin bagiak matainu.

⁴³ Sebab bakea teko bilaine, bahwo musuaknu bakea gemlung ko, lajau kempung ngen mipit ko kunei kute jurusan.

⁴⁴ Tobo'o bakea majua ko beserto penduduk de ade padonu. Ngen tobo'o coa bakea munyau do butau kulo tinggea teletok neak das butau de luyen, kerno ko coa ngertai waktau ketiko Allah teko utuk semlamat ko.”

Yesus masuk moi lem Umeak Tuhan

⁴⁵ Yesus masuk moi Umeak Tuhan ngen muloi ba Si musir kute tun jagea neak di.

⁴⁶ Nadeak-Ne ngen tobo'o, “Ade tetulis: ‘Umeak-Ku adeba umeak du'o.’ Tapi ko jemijaine sa'ang perapok!”

⁴⁷ Tetiep bilai Si ngajea neak lem Umeak Tuhan. Imem-imem kepalo ngen gu'au-gu'au agamo serto pemipin-pemipin Yahudi lok munuak Si,

⁴⁸ tapi tobo'o coa namen, arus menea awei ipe sebab kute rakyat tujau ngen Si ngen lok temi'uk Si.