LUKAS 18 - JANJAI BLAU Lem Bahaso Jang Bebilai

Perumpamo tetang hakim de coa benea

¹ Yesus madeak do perumpamo ngen tobo penotoa-penotoane utuk temgas, bahwo tobo'o harus bogoa bedu'o ngen coa jejemau.

² Nadeak-Ne, “Lem do kota ade suang hakim de coa saben bakea Allah ngen coa me'go api bae.

³ Neak kota o ade suang jando de bogoa teko ngen hakim o ngen madeak, ‘Mbelaba hokku te'adep lawenku.’

⁴ Kekedau waktau anne hakim o temulok. Tapi sesudo'o si madeak lem ateine, ‘Kunyau kulo uku coa saben bakea Allah ngen coa meg'o api bae,

⁵ tapi kerno jando yo semaroh uku, baikba uku mbenea si, supayo jibeak bogoa bae si teko ngen akhirne semrang uku.’ ”

⁶ Nadeak Tuhan: “Kemliakba jano de nadeak hakim de coa adea o!

⁷ Allah paset bakea mbenea tun-tun piliak-Ne de kebilai kelmen minoi ngen Si! Si paset coa mulua utuk temulung tobo'o!

⁸ Uku madeak ngen udi, ‘Si bakea segro mbenea tobo'o. Bakea tapi, amen Anok Manusio o teko, jano masiak tenmau tun de masai ngen Si neak bumai yo?’ ”

Perumpamo tetang tun Farisi ngen penagiak pajak

⁹ Ngen kekedau tun de manggap diraine benea ngen mandang tembeak kute tun luyen, Yesus madeak perumpamo yo:

¹⁰ “Ade duai tun lalau moi Umeak Tuhan utuk bedu'o; de suang adeba Farisi ngen de luyen penagiak pajak.

¹¹ Tun Farisi o je ngen bedu'o lem ateine awei yo, ‘Au Allah, uku mucep syukur ngen Ko, kerno uku coa serai awei kute tun luyen, iso perapok, iso tun coa jujur, iso tun de berzinah ngen iso kulo awei penagiak pajak yo.

¹² Uku bepuaso duai kilai deminggau, uku melei puluak persen kunei kute asea ku.’

¹³ Tapi penagiak pajak o je e'uak, ngen si coa binai nanggea moi lenget, tapi si mokok dirai ngen madeak, ‘Au Allah, kasiakba uku tun beduso yo.’ ”

¹⁴ Uku madeak ngen udi, “Tun yo belek moi umeakne awei tun de benea temurut Allah ngen tun Farisi o coa. Sebab barang api melekat dirai, si bakea tenbeak ngen barang api tembeak dirai, si bakea nelkat.”

Yesus melei berkat anok-anok

¹⁵ Mako teko tun-tun mbin anok-anokne de titik ngen Yesus, supayo Si megong tobo'o. Kemliak o penotoa-penotoa-Ne mengiak tun-tun o.

¹⁶ Tapi Yesus menok anok-anok'o ngen madeak ngen tobo penotoa-penotoa-Ne, “Kunyauba anok-anok o teko ngen-Ku, ngen jibeak udi temgeak tobo'o, sebab tun-tun de awei do'oba de jijai anggota umat Allah.

¹⁷ Uku madeak ngen udi, ‘Sesungguakne barang api coa semambut Allah meriteak sebagai Rajo awei suang anok titik, si coa bakea masuk moi lemne.’ ”

Tetang tun kayo

¹⁸ Ade suang pemipin temanye ngen Yesus, nadeakne, “Gu'au de baik, jano de harus uku menea utuk dapet idup de kekal?”

¹⁹ Jawab Yesus, “Getai ko nadeak kulo Uku baik? Coa suang kulo de baik seluyen kunei pado Allah bae.

²⁰ Ko paset namen kute periteak Allah, ‘Jibeak berzinah, jibeak munuak, jibeak maling, jibeak mucep saksai ngike, hormatba baknu ngen indoknu.’ ”

²¹ Nadeak tun o, “Kute periteak'o sudo uku temotoa kunei u'ai.”

²² Temi'uk do'o Yesus madeak ngen si, “Masiak tinggea do hal igai de harus ko menea: Jenuoba kute de ko temuan ngen nagiakba do'o ngen tun-tun peset, mako ko bakea dapet hok neak surgo. Sesudo'o teko moi miyo ngen milimba Uku.”

²³ Tapi ketiko tun o temi'uk kecek Yesus, si ibo kerno si kayo sekilai.

²⁴ Lajau Yesus demnong si ngen madeak, “Padeak sarone tun de becaci jijai anggota umat Allah.

²⁵ Sebab lebiak mu'eak dikup unto masuk liwet lubang dolom kunei pado suang kayo jijai anggota umat Allah.”

²⁶ Ngen tobo'o de temi'uk o madeak, “Amen awei'o, api de dapet selamat?”

²⁷ Nadeak Yesus, “Jano de coa mukin bagiak manusio, mukin bagiak Allah!”

²⁸ Petrus madeak, “Keme yo bi teminggea kute de keme temuan ngen temotoa Kumu.”

²⁹ Nadeak Yesus, “Sesungguakne tiep tun de sudo teminggea umeakne, ngenyanne, pasuakne, tun tuaine atau anok-anokne, utuk melayan Allah,

³⁰ tun'o bakea temimo igai belipet pado maso yo kulo, ngen pado zaman de bakea teko si bakea temimo idup de kekal.”

Yesus miling utuk ketelau kilaine tetang kematei-Ne

³¹ Yesus menok keduai belas penotoa-Ne, lajau madeak ngen tobo'o, “Uyo ite lalau moi Yerusalem ngen kute sesuaktau de tetulis tobo nebai tetang Anok Manusio bakea gennep.

³² Sebab Si bakea senreak ngen bangso-bangso de coa kemnal Allah, mimok, mino ngen tenkek.

³³ Ngen tobo'o semikso ngen munuak Si, tapi pado bilai ketelau Si bakea idup igai.”

³⁴ Tapi tobo'o samo sekilai coa ngertai kutene o; tai padeak o tebunyin bagiak tobo'o. Ngen tobo'o coa namen Si miling tetang jano.

Yesus kema'en tun sutai

³⁵ Waktau Yesus gesea sapei neak Yerikho, ade suang sutai de temot neak biding dalen ngen beradoi.

³⁶ Waktau tun o temi'uk tun dau liwet, si temnai, “Jano o?”

³⁷ Nadeak tun ngen si, “Yesus tun Nazaret liwet.”

³⁸ Lajau tun sutai menggang, “Yesus, Anok Daud! Kasiakba uku!”

³⁹ Mako tobo'o, de paneu neak mukok Yesus, temgur si supayo si diem. Tapi tambeak lek si menggang, “Anok Daud! Kasiakba uku!”

⁴⁰ Lajau Yesus bedan meluak mbin tun o ngen-Si. Ngen ketiko si bi ade neak pa'ok-Ne, Yesus temnai ngen si,

⁴¹ “Jano de ko kemlok supayo Uku dapet menea bagiaknu?” Jawab tun o, “Tuhan, supayo uku dapet ngeliak!”

⁴² Lajau nadeak Yesus ngen si, “Ngeliakba ko, imennu bi semlamat ko!”

⁴³ Ngen seketiko o kulo, tun sutai dapet ngeliak. Si temotoa Yesus samo mujai Allah. Kute rakyat kemliak hal o ngen mujai Allah.