LUKAS 15 - JANJAI BLAU Lem Bahaso Jang Bebilai

Bebirai de nyep

¹ Tobo penagiak pajak ngen tun-tun beduso biasone teko ngen Yesus utuk temi'uk Si.

² Tun-tun Farisi ngen gu'au-gu'au agamo muloi ngeruyam. Tobo'o madeak, “Si temimo tun-tun beduso ngen mukmei sesamo ngen tobo'o.”

³ Lajau Yesus madeak perumpamo yo ngen tobo'o,

⁴ “Api neak antaro udi de temuan sotos bebirai, ngen amen si nyep dikup neak antarone, coa teminggea de sembilan puluak sembilan likup neak benei libea ngen lalau mesoa de limau o sapei si temaune?

⁵ Ngen amen si bi temaune, si mpekne neak das baune ngen riang,

⁶ ngen sesapeine neak umeak si menok kekuat ngen tetanggone serto madeak ngen tobo'o, ‘Beriangba sesamo ngen uku, sebab bebiraiku de nyep o bi uku temau.’

⁷ Uku madeak ngen udi Awei yo kulo bakea ade keriang neak surgo kerno do tun beduso de betobat, lebiak kunei pado riang kerno sembilan puluak sembilan tun benea de coa perlu betobat.”

Caci de nyep

⁸ “Atau selawei ipe de temuan puluak caci pirok, lajau si kelnyep do neak antarone, coa midup lapu ngen semupau umeak serto mesoane ngen teliti sapei si temaune?

⁹ Ngen amen si bi temaune, si menok kekuat ngen tetanggone serto madeak, ‘Beriangba sesamo ngen uku, sebab caci pirokku de nyep o bi kutemau!’

¹⁰ Uku madeak ngen udi, ‘Awei yo kulo bakea ade riang pado malaikat-malaikat Allah kerno do tun beduso de betobat!’ ”

Perumpamo tetang anok de nyep

¹¹ Yesus madeak igai, “Ade suang temuan duai anok semanei.

¹² Nadeak de titik ngen bakne, ‘Bapa, neleiba ngenku bagiak harto ite de jijai hokku.’ Lajau bakne magiak harto o ngen tobo'o beduai.

¹³ Kekedau bilai sesudo'o anok titik o jemuwoa kute bagiakne o lajau lalau moi negrai de uak. Neak di si mabis hartone o ngen idup befoya-foya.

¹⁴ Sesudo si mabis cacine, timboaba bencana kenyemen neak lem negrai o ngen si kulo muloi peset.

¹⁵ Lajau si lalau ngen bekerjo pado suang penduduk neak di, de meluak si moi kebun jemago ja'uakne.

¹⁶ Kerno nyemen, si lok misai teneine ngen kembuk ja'uak o, tapi coa suang kulo de melei ngen si kembuk.

¹⁷ Lajau si sadar ngen madeak, ‘Tun-tun de bekerjo pado bakku kembiak dau kembukne, ngen uku neak yo gesea matei kenyemen!’

¹⁸ Uku bakea berakat ngen lalau ngen bapaku, ngen madeak ngen si, ‘Bapa, uku bi beduso te'adep surgo ngen te'adep bapa.

¹⁹ Uku coa patut igai senbut anok Bapa. Jenijaiba uku awei saleak suang pekerjo Bapa.’

²⁰ Mako klongonba si lalau ngen bapane. Ketiko si masiak uak, bakne bi kemliak si, lajau tegerokba ateine ngen belas kasiak. Bakne o melilai temau si lajau megep ngen semium si.

²¹ Nadeak anok o ngen si, ‘Bapa, uku bi beduso te'adep Allah ngen te'adep Bapa, uku coa patut igai senbut anok Bapa.’

²² Tapi bak o madeak ngen pelayan-pelayanne, ‘Gacangba mbin moi miyo jubah de kembiak baik, neleiba si makei bajau'o. Nelei si cicin pado ji'aine ngen sepatu pado kekeane.

²³ Ngen mokba anok sapai de gemuk ngen sembeliakba. Ite bakea mbuk ngen beriang.

²⁴ Sebab anokku yo bi matei ngen jijai idup igai, si bi nyep ngen dapet igai.’ Mako muloiba tobo'o beriang.

²⁵ Tapi anokne de tuai ade neak kebun ngen ketiko si belek ngen pa'ok moi umeak, si temi'uk sa'ei musik ngen ta'ai.

²⁶ Lajau si menok saleak suang pelayan ngen temnai ngen si jano tai kutene o.

²⁷ Jawab pelayan o: ‘Asuaknu, Bi belek! Ngen baknu Bi sembeliak anok sapai de lai, kerno si bi temau anokne lem keadaan selamat.’

²⁸ Mako mengiakba anok tuai o ngen si coa lok masuk. Lajau bakne keluea ngen miling ngen si.

²⁹ Tapi si jemawab bakne, nadeakne, ‘Bi betaun-taun uku mlayan bak ngen ati perneak uku melanggea periteak bak, tapi ngen uku ati perneak bak melei dikup anok kambing utuk beriang ngen kekuatku.

³⁰ Tapi tembei bae teko anok bak de mabis hok bak sesamo ngen selawei nakea, mako bak sembeliak anok sapai de lai utuk si.’

³¹ Nadeak bakne ngen si: ‘Anokku, ko bogoa sesamo ngen uku. Ngen kute de uku temuan adeba ko temuan.

³² Ite patut besukocito ngen beriang, kerno asuaknu bi matei ngen jijai idup igai, si bi nyep ngen uyo temau igai.’ ”