LUKAS 1 - JANJAI BLAU Lem Bahaso Jang Bebilai

Pendahuluan

¹ Teofilus de mulio, Dau tun bi berusaho semusun bito tetang kejijai-kejijai de bi tejijai neak antaro ite.

² Tobo'o semapeine ngen ite. Tobo'o kunei semulo adeba saksai matai ngen pelayan Firman.

³ Kerno o, sesudo uku semlidik kute kejijai o ngen benea kunei asal mulone, uku mok putusan utuk temulis debuak laporan de teratur utuknu.

⁴ Supayo ko dapet melei namen bahwo kute sesuaktau de najea ngen ko sungguak benea.

Melei namen tetang laherne Yohanes Pembaptis

⁵ Pado zaman Herodes, rajo Yudea, ade suang imem de genne Zakharia kunei kelopok Abia. Ngenyanne kulo berasal kunei royot Harun, genne Elisabet.

⁶ Keduaine idup benea ngen sepenuakne neak adep Allah ngen temurut kute periteak de tentep Tuhan.

⁷ Tobo'o beduai coa temuan anok sebab Elisabet mandoa ngen keduaine bi tuai.

⁸ Pado do bilai, waktau sapei giliak kelopokne, Zakharia menea tugasne sebagai imem neak adep Tuhan.

⁹ Ketiko lotre, de sesuai ngen biasone utuk temtau imem de betugas, Zakharia ba de tenunjuk utuk masuk moi lem Umeak Tuhan. Si embem kemnyen.

¹⁰ Pado waktau upacara embem kemnyen, kute umat bekopoa neak luea ngen semyang.

¹¹ Lajau ketenba ngen Zakharia suang malaikat Tuhan je neak depeak kanen mija penan embem kemnyen.

¹² Kemliak hal o si tekanjet ngen jijai saben.

¹³ Tapi malaikat o madeak ngen si, “Jibeak saben, hoi Zakharia, sebab du'onu bi kenabul. Elisabet, ngenyannu, bakea melaher suang anok semanei ngen arusba ko tem gen si Yohanes.

¹⁴ Ko bakea kembiak senang ngen dau tun bakea beriang amen anok o laher konyo.

¹⁵ Sebab si bakea lai neak adep Tuhan ngen si coa bakea menem anggur-anggur ngen menem de luyen ngen si bakea penuak ngen Roh Sucai ayok kunei kandungan makne ngen.

¹⁶ Si bakea menea dau tun Israel bebelek ngen Tuhan, Allah tobo'o.

¹⁷ Si bakea paneu demute Tuhan lem roh ngen kuaso awei Elia. Si bakea menea atei bapa-bapa bebelek ngen anok-anokne ngen atei tun-tun durhako ngen pekeran tun-tun benea. Ngen awei si semiap bagiak Tuhan do umat de patut bagiak-Ne.”

¹⁸ Lajau nadeak Zakharia ngen malaikat o, “Awei ipe uku namen, bahwo hal o bakea tejijai? Sebab uku sudo tuai ngen ngenyanku kulo sudo tuai.”

¹⁹ Jawab malaikat o ngen si, “Ukuba Gabriel de melayan Allah ngen uku bi nutus utuk miling ngen ko ngen utuk semapei Bito Baik yo ngen ko.

²⁰ Sesungguakne ko bakea jijai bisau ngen coa dapet miling sapei bilai ketiko kutene yo tejijai, kerno ko coa masai ngen kecekku de bakea nuak pado waktaune.”

²¹ Sementaro o tun dau mbot Zakharia. Tobo'o jijai sele, bahwo si kembiak an ade lem Umeak Tuhan.

²² Ketiko si keluea, si coa dapet miling ngen tobo'o ngen ngertaiba tobo'o, bahwo si bi kemliak do pengeliak neak lem Umeak Tuhan.

²³ Lajau Zakharia melei tando ngen tobo'o, sebab si tep bisau. Ketiko selsei maso pelayananne, si belek moi umeak.

²⁴ Kekedau an sesudo'o Elisabet, ngenyanne, tenei lai ngen selamo lemo bulen si coa kemten dirai.

²⁵ Nadeakne: “Dioba do plep Tuhan bagiakku. Uyo Si lok mapus aibku neak muko tun.”

Melei namen tetang laherne Yesus

²⁶ Lem bulen ke num Allah meluak malaikat Gabriel lalau moi de buak kota neak Galilea de genne Nazaret.

²⁷ Si tenmau suang semulen de genne Maria. Semulen o betunang ngen Yusuf kunei keluargo Daud.

²⁸ Ketiko malaikat o masuk moi umeak Maria, si madeak, “Salam, hoi ko de nelei karunia, Tuhan semerto ko.”

²⁹ Maria tekanjet temi'uk padeak o, lajau temnai neak lem ateine, jano tai salam o.

³⁰ Malaikat o madeak ngen si, “Jibeak saben, hoi Maria, sebab ko dapet kasiak karunia neak adep Allah.

³¹ Sesungguakne ko bakea kemandung ngen bakea melaher suang anok semanei ngen ko temgen Si Yesus.

³² Si bakea jijai lai ngen bakea senbut Anok Allah De Kembiak lekat. Tuhan Allah bakea jemijai Si rajo awei Rajo Daud, ninik puyang-Ne.

³³ Si bakea meriteak awei rajo das royot Yakub sekean-keanne. Kerajaan-Ne coa bakea abis.”

³⁴ Nadeak Maria ngen malaikat o, “Awei ipe hal o mukin tejijai, kerno uku ati temuan sematen?”

³⁵ Jawab malaikat o ngen si, “Roh Sucai bakea tu'un das ko ngen kuaso Allah De Kembiak lekat bakea melindung ko; sebab o anok de bakea ko melaher o bakea senbut Sucai, Anok Allah.

³⁶ Sesungguakne: Elisabet, sanoknu o, uyo yo gidong ngandung num bulen. Si kemandung suang anok semanei kunyau bi tuai ngen mandoa.

³⁷ Sebab bagiak Allah coa ade de mustahil.”

³⁸ Nadeak Maria, “Sesungguakne uku yo adeba hamba Tuhan; jijaiba padoku temurut padeaknu o.” Lajau malaikat o teminggea Maria.

Maria ngen Elisabet

³⁹ Kekedau waktau sesudo'o berakatba Maria ngen langsung paneu moi tebo temujau debuak kota neak Yudea.

⁴⁰ Si masuk moi umeak Zakharia melei salam ngen Elisabet.

⁴¹ Ketiko Elisabet temi'uk salam Maria, anok neak lem kandungan Elisabet o begerok. Mako Elisabet kenuaso Roh Allah,

⁴² lajau madeak, “Kunei kute selawei ko ba de lebiak temimo berkat. Awei o kulo ngen kandungannu.

⁴³ Api uku sapei indok Tuhan teko ngen uku?

⁴⁴ Ketiko uku temi'uk salam nu, anok lem kandunganku begerok riang.

⁴⁵ Bahagia ba ko, kerno masai jano de nadeak Tuhan ngen ko o, bakea tejijai!”

Maria mucep syukur

⁴⁶ Lajau nadeak Maria: “Jiwoku mujai Tuhan,

⁴⁷ ngen ateiku beriang, kerno Allah Juruselamatku.

⁴⁸ Sebab Si bi kemliak hamba-Ne de hino! Sesungguakne, muloi kunei uyo kute bangso madeak uku bahagia.

⁴⁹ Kerno Allah De Kembiak Kuaso menea hal-hal lai ngen uku. Sucaiba gen-Ne.

⁵⁰ Rahmat-Ne tu'un-temu'un das tun de saben ngen Tuhan.

⁵¹ Si kemten Kuaso-Ne ngen tangen-Ne de kuet ngen cem'ei tun de ombong, ngen kemacau rencano tobo'o.

⁵² Si temu'un tun-tun de bekuaso kunei penanne ngen melkat tun-tun de tembeak.

⁵³ Si melei kute de baik ngen tun de nyemen ngen meluak, tun de kayo lalau ngen tangen kosong.

⁵⁴ Si temulung Israel, hamba-Ne, karno si minget rahmat-Ne.

⁵⁵ Awei de jenanjai-Ne, ngen ninik puyang te, ngen Abraham ngen royotne utuk selamo-lamone.”

⁵⁶ Maria tinggea kekiro telau bulen ke'anne besamo ngen Elisabet, lajau belek igai moi umeakne.

Laherne Yohanes Pembaptis

⁵⁷ Sapeiba waktaune bagiak Elisabet utuk melaher. Si melaher suang anok semanei.

⁵⁸ Tetanggo-tetanggone serto pepasuakne temi'uk bahwo Tuhan bi temunjuk rahmat-Ne de kembiak lai ngen Elisabet. Tobo'o besuko cito besamo-samo ngen si.

⁵⁹ Ketiko cupik o be'omor dlapen bilai, tobo'o mbinne utuk senunat. Lajau tobo'o lok meleine gen Zakharia awei gen bakne.

⁶⁰ Tapi makne madeak, “Jibeak, si arus nelei gen Yohanes.”

⁶¹ Nadeak tobo'o ngen si, “Coa ade neak antaro pepasuaknu de genne awei yo.”

⁶² Lajau tobo'o melei tando ngen bakne utuk temnai gen jano de lok nelei ngen anokne o.

⁶³ Zakharia minoi butau tulis, lajau temulis kecek-kecek yo, “Genne adeba Yohanes.” Kute tobo'o sele.

⁶⁴ Pado waktau o kulo Zakharia nam miling igai ngen memujai Allah.

⁶⁵ Tetanggo-tetanggone kute saben. Bito o tesebea moi kute daerah neak tebo Yudea.

⁶⁶ Kute tun de temi'uk hal o temnai lem atei, “Anok yo konyo jijai jano?” Sebab tangen Tuhan semerto si.

Zakharia semapei bito kunei Tuhan

⁶⁷ Zakhria, tiakne, penuak ngen Roh Sucai sehinggo semapei pesen kunei Tuhan. Si madeak:

⁶⁸ “Maro ite memujai Tuhan, Allah Israel! Si bi teko temulung umat-Ne ngen mbebas tobo'o.

⁶⁹ Si melei ite penyelamat de kuet, royot Daud hamba-Ne o.

⁷⁰ – De mena'o liwet nebai-nebai piliak-Ne, Tuhan bi melei janjai-Ne –

⁷¹ utuk melpas ite kunei musuak-musuak ite ngen kunei tangen kute tun de jemngik ite.

⁷² Utuk temunjuk rahmat-Ne ngen ninik puyang ite, ngen minget janjai-Ne de Sucai.

⁷³ Si besupeak ngen Abraham bak te, Si melei rahmat ngen ite,

⁷⁴ supayo ite, lepas kunei tangen musuak, supayo ite dapet semyang ngen-Si coa saben,

⁷⁵ lem sucai ngen benea neak adep Si somor idup te.

⁷⁶ Ngen ko, hoi anokku, bakea senbut nebai Allah De Kembiak Lekat. Kerno ko bakea paneu demno Tuhan utuk semiap dalen utuk Si,

⁷⁷ utuk melei namen ngen umat-Ne tobo'o bakea senlamat, amen Allah sudo mapun duso-duso tobo'o.

⁷⁸ Tuhan ite baik atei ngen penyayang; Si teko utuk semlamat ite. Awei Matai bilai pueng kunei penan de lekat,

⁷⁹ awei yo ba Si melei te'ang-Ne ngen kute tun de idup neak lem kelem ngen saben. Si mipin ite moi dalen damoi sejahtera.”

⁸⁰ Anok Zakharia o betambeak lai ngen betambeak kuet rohne. Si tinggea neak benei libea, sapei waktaune si kemten diraine ngen bangso Israel.