KOLOSE 3 - JANJAI BLAU Lem Bahaso Jang Bebilai

¹ Udi bi nidup igai besamo-samo Kristus. Sebab o harusba udi berusaho utuk dapet hal-hal de neak surgo, neak ipe Kristus meriteak besamo ngen Allah.

² Pekerba hal-hal de neak das, iso de neak dunio.

³ Sebab udi bi matei, ngen idupnu coa keten besamo Kristus neak lem Allah.

⁴ Nah, sumber idupnu de sejati adeba Kristus ngen amen Si keten be udi kulo bakea keten besamo-samo ngen Si lem kebesaran-Ne!

Manusio blau

⁵ Kerno'o, nuangba lem dirainu kute sesuaktau de duniawi, awei percabulan, hal-hal de coa baik, hawa nafsu, kelok de kidek (serakah, de serai ngen nyembeak patung).

⁶ Hal-hal de awei'oba de menea Allah mengiak te'adep tun-tun de coa taat ngen-Si.

⁷ Bel'o udi suang kulo menea hal-hal o, pado waktau udi kenuasone.

⁸ Tapi uyo lokba udi muang hal-hal de kidek kunei diraine: jibeak igai mengiak, ngamuk, atau temuan asai jengik te'adep tun luyen. Jibeak debat bae keluea kunei bibianu fitneak atau kecek de kidek.

⁹ Jibeak mike do ngen de luyenne, sebab idup de an ngen kute sifetne bi udi nuang.

¹⁰ Udi uyo bi nelei idup de blau. Udi adeba manusio blau, de gidong nea jijai blau terus menerus ngen Penciptane, adeba Allah, temurut betuk-Ne suang. Maksudne adeba supayo udi kemnal Allah ngen sempurno.

¹¹ Lem hal yo coa ade igai tun Yunani atau tun Yahudi, tun besunat atau tun coa besunat, orang Barbar atau Skit, budok atau tun bebas, tapi Kristus adeba kutene ngen Si jijai do ngen tobo'o kutene.

¹² Saudaro adeba umat Allah. Allah sayang ngen udi ngen miliak udi utuk jijai de Si temuan de khusus. Do'oba sebabne udi harus kemten belas kasihan, udi harus baik atei, rendeak atei, lemah lembut, ngen taen saro.

¹³ Udi harus sabar do ngen de luyenne, sesamo melei apun amen ade de dendem te'adep tun luyen. Tuhan ngen senang atei mapun udi, jijai udi kulo harus lok mapun do ngen de luyenne.

¹⁴ Ngen de peting, adeba: Udi harus sesamo mengasihi sebab kasih o ba de menea jijai do Saudaro-saudaro kutene sehinggo jijai sempurno.

¹⁵ Lokba damoi sejahtera Kristus meriteak lem ateinu, kerno utuk do'oba udi bi nok lem do awok. Ngen bersyukurba.

¹⁶ Lokba ajaran-ajaran Kristus de penuak berkat tinggea neak lem ateinu. Lokba udi samo-samo majea ngen samo-samo melei nasihat de bijaksano. Nyanyikanlah mazmur ngen puji-pujian serto legau-legau rohani; nyanyiba utuk Allah ngen perasaan syukur neak lem ateinu.

¹⁷ Kute jano de udi nea ngen nadeak, harusba do'o nea ngen nadeak das gen Tuhan Yesus. Bersyukurba ngen Allah Bapa utuk jano de nea Yesus utuk nu.

Hubungan-hubungan neak antaro anggota keluargo

¹⁸ Saudaro-saudaro de jijai ngenyan! Taatba ngen matennu, sebab awei'oba seharusne plepnu sebagai tun Kristen.

¹⁹ Saudaro-saudaro de jijai maten! Sayangba ngen nganyannu. Jibeak kasar te'adep tobo'o.

²⁰ Hoi anok-anok! Taatba ngen tun tuainu lem kute hal, kerno do'oba de semnang atei Allah.

²¹ Saudaro-saudaro de jijai bak! Jibeakba menea anok-anoknu gis atei sehinggo tobo'o jijai putus asa.

²² Saudaro-saudaro de jijai hamba! Lem kute hal, lokba udi taat ngen tuannu de neak dunio yo. Jibeakba taat ngen tobo'o cuma pado waktau tobo'o gidong ngawas udi, kerno udi lok nujai. Taatba ngen tobo'o ngen atei de ikhlas, kerno udi hormat ngen Tuhan.

²³ Kerjo jano bae de neriteakne ngen udi, lokba udi kemerjone ngen sepenuak atei, seolah-olah Tuhanba de udi nlayan, ngen iso cuma manusio.

²⁴ Tingetba bahwo udi bakea temimo upeak kunei Tuhan. Jano de seniap Tuhan utuk anok-Ne, do'oba de bakea nelei ngen udi. Kristus adeba tuannu ngen udi hamba-Ne.

²⁵ Api bae de menea saleak bakea temanggung saleakne o, kerno Tuhan coa kemliak api ko.