KISAH RASUL-RASUL 6 - JANJAI BLAU Lem Bahaso Jang Bebilai

Tujuak tun niliak utuk melayan tun peset

¹ Penotoa-penotoa Yesus betambeak dau. Pado waktau o tun-tun Yahudi de bebaso Yunani, jijai coa senang te'adep tun-tun Yahudi asli. De bebaso Yunani o madeak, “Selawei-selawei keme de sudo jando coa dapet batau biaya bebilai de nagiak ngen tun-tun.”

² Sebab o keduai belas rasul-rasul o kemopoa kute penotoa ngen madeak ngen tobo'o, “Coa baik amen keme bedan melei namen kecek Allah, 'kerno arus murus sual-sual kembuk.

³ Baikba, udi-udi miliak kunei antaro udi tujuak tun de temuan gen baik ngen kenuaso Roh Sucai serto bijaksana, de dapet keme tugas murus hal-hal yo;

⁴ sebab keme lok bedu'o ngen melei namen kecek Allah bae.”

⁵ Kute tun o tujau ngen usul kunei rasul-rasul o. Lajau tobo'o miliak Stefanus, suang de pecayo nien ngen Yesus ngen kenuaso Roh Sucai. Tepiliak kulo: Filipus, Prokhorus, Nikanor, Timon, Parmenas, ngen Nikolaus kunei Antiokhia; si iso tun Yahudi.

⁶ Ketujuak tun o nusul ngen rasul-rasul, lajau rasul-rasul o bedu'o ngen minoi berkat Tuhan utuk tobo'o.

⁷ Firman Allah tambeak tesebea, jumlah penotoa neak Yerusalem tambeak dau; ngen dau kulo imem-imem de pecayo ngen Yesus.

Stefanus tenakep

⁸ Allah melei berkat ngen Stefanus, sehinggo si menea dau mujizat ngen hal-hal de luea biaso neak antaro masyarakat.

⁹ Tapi ade tun-tun de temtang si; tobo'o adeba anggota-anggota umeak semyang de senbut Umeak Semyang Tun-tun Bebas. Anggota-anggota umeak semyang o adeba tun-tun Yahudi kunei Kirene ngen Aleksandria. Tobo'o ngen tun-tun Yahudi kunei Kilikia ngen Asia bedebat ngen Stefanus.

¹⁰ Tapi tobo'o coa nam melawen jano de nadeak Stefanus, kerno Roh Sucai melei ngen si kebijaksanaan utuk miling.

¹¹ Kerno do'oba tobo'o semogok kekedau tun utuk madeak, “Keme temi'uk tun o mimok Musa ngen Allah!”

¹² Awei'oba tobo'o mujuk tun-tun, ngen pemipin-pemipin Yahudi, serto gu'au-gu'au agamo. Lajau tobo'o lalau temakep Stefanus, sesudo'o mbin si madep Mahkamah Agamo.

¹³ Ngen tobo'o kulo mbin saksai-saksai de coa benea tetang Stefanus. Tobo'o madeak, “Tun yo bogoa mimok Umeak Tuhan de sucai ngen mimok periteak-periteak Allah de senapei Musa.

¹⁴ Keme bi temi'uk si madeak, bahwo Yesus kunei Nazaret o bakea mubuak Umeak Tuhan yo, lajau mubeak kute adat istiadat de tenu'un Musa ngen ite!”

¹⁵ Kute tun de ade lem sidang Mahkamah Agamo o demnong Stefanus. Pado waktau o papea Stefanus keten awei papea malaikat.