KISAH RASUL-RASUL 26 - JANJAI BLAU Lem Bahaso Jang Bebilai

Paulus mbela diraine neak adep Agripa

¹ Agripa madeak ngen Paulus, “Ko nelei kesepatan utuk mbela dirai.” Paulus melei tando ngen tangenne, lajau semapei pembelaanne sebagoi berikut,

² “Au Rajo Agripa, uku meding mujua, kerno pado bilai yo uku dapet mbela diraiku neak adepnu teadep kute tuduak tun Yahudi teadep diraiku,

³ terutamo kerno ko namen nien adat istiadat ngen persoalan-persoalan neak antaro tun Yahudi. Kerno o uku minoi ngen ko, supayo ko temi'uk keteranganku ngen sabar.

⁴ Kute tun Yahudi namen dalen idupku sejok maso u'aiku, kerno uku bi idup neak antaro bangsoku suang neak Yerusalem.

⁵ Bi an tobo'o kemnal uku, sekirone tobo'o lok, tobo'o nam saksai bahwo uku bi idup sebagoi tun Farisi temurut aturanne de kebiak ketat neak lem agamo te.

⁶ Uyo uku harus madep pengadilan kerno uku pecayo ngen janjai de nea Allah ngen ninik puyang ite.

⁷ Janjai do'oba de nembot keduai belas suku bangso Israel, sehinggo tobo'o maneu periteak Allah pu'eng kelemen. Kerno uku pecayo ngen janjai o, Rajo Agripa de mulio, uku tenuduak tun-tun Yahudi.

⁸ Getai udi manggep mustahil bahwo Allah midup igai tun matei?

⁹ Awei ipe kulo, uku suang perneak sako bahwo uku harus betindak teges utuk temtang Yesus kunei Nazaret o.

¹⁰ Hal o neaku kulo neak Yerusalem. Uku coa bae sudo mbin dau tun-tun de setia ngen Allah moi lem sel, sesudo uku dapet kuaso kunei imem-imem kepalo, tapi uku kulo tujau, amen tobo'o nukum matei.

¹¹ Neak lem umeak-umeak semyang uku awit semikso tobo'o ngen makso tobo'o utuk muker kepercayaanne. Kebiak panes ateiku teadep tobo'o sapei uku jemalang tobo'o, bahkan sapei moi kota-kota luyen.”

Paulus cemrito pengalamanne

¹² “Ngen maksud do'oba kulo uku mbin su'et kuaso kunei imem-imem kepalo, lalau moi Damsyik.

¹³ Tetibo, hoi Rajo Agripa, pado tengeak bilai uku kemliak neak tengeak dalen o cayo de kebiak te'ang kunei cayo matai bilai, tu'un kunei lenget seminar kemliling uku ngen kekuat pemaneuku.

¹⁴ Keme kute gulek moi pitok, uku mi'uk sa'ei de madeak ngen uku lem bahaso Ibrani, ‘Saulus, saulus, getai ko semikso uku? Saro bagiaknu temtang Si de bekuaso dasnu.’

¹⁵ Tapi uku jemawab, ‘Api Ko, Tuhan?’ Tuhan madeak, ‘Ukuba Yesus, de ko sikso o.

¹⁶ Tapi uyo, Kelongonba ngen je ba. Uku kemten dirai utuk temtep ko jijai pelayan ngen saksai tetang kute de sudo ko kemliak kunei Uku ngen jano de bakea uku kemten ngen ko be.

¹⁷ Uku bakea mbebas ko kunei bangso yo ngen kunei bangso-bangso luyen. Uku bakea meluak ko lalau ngen tobo'o,

¹⁸ utuk mukok matai tobo'o, supayo tobo'o kelua kunei kegelapan ngen masuk moi lem te'ang, supayo tobo'o lepas kunei kuaso Iblis lajau kenuaso Allah, supayo tun de pecayo ngen-Ku duso-duso tobo'o bakea napun ngen tobo'o bakea jijai tun-tun de senucai.’ ”

Paulus tem'ang pelayanne

¹⁹ “Kerno o, Rajo Agripa, uku beusaho selalu taat ngen pengeliak de sudo uku temimo kunei Allah o.

²⁰ Tapi mulo-mulo uku melei namen ngen tun-tun neak Damsyik, neak Yerusalem ngen neak kute taneak Yudea, kulo ngen bangso-bangso luyen bahwo tobo'o harus tobat, semreak dirai ngen Allah serto menea plep-plep de sesuoi ngen pertobatan o.

²¹ Kerno oba tun-tun Yahudi temakep uku neak Bait Allah ngen cemubo munuak uku.

²² Tapi berkat tulung Allah uku dapet idup sapei uyo, jijai saksai bagiak tun-tun titik ngen tun-tun lai. Jano de uku melei namen o coa luyen kunei de ayokne sudo nelei namen nebai-nebai ngen Musa,

²³ adeba bahwo Rajo Penyelamat de jenanjai Allah o harus menderita ngen Siba de pertamo de bakea idup igai kunei antaro tun matei, bahwo Si bakea melei namen te'ang ngen tun-tun Yahudi ngen tun-tun de iso Yahudi.”

²⁴ Sementaro Paulus madeak kutene o utuk mbela diraine, Festus madeak ngen sa'ei lek, “Ko gilo, Paulus! Lemaunu de dau o menea ko gilo.”

²⁵ Tapi Paulus jemawab, “Uku coa gilo, Festus de mulio! Sebelekne, kecek-kecek de uku ucep o benea, keluea kunei pekeran sihat!

²⁶ Rajo Agripa kulo namen tetang hal-hal yo. Kerno'o, uku binai miling te'us te'ang ngen si. Uku yakin bahwo coa ade sesuaktau kulo kunei kutene yo de ati si namen, kerno hal yo coa tejijai neak penan de sunyai.

²⁷ Jano Rajo Agripa pecayo nebai-nebai? Uku namen bahwo ko pecayo!”

²⁸ Jawab Agripa, “ko sako mudeak menea uku jijai tun Kristen lem waktau de siket yo!”

²⁹ Paulus madeak, “Uku lok bedu'o ngen Allah, supayo gacang atau cendok iso cuma ko bae, tapi kute tun luyen de ade neak yo, de temi'uk kecekku jijai serai awei uku, kecuali peket neak tangenku.”

³⁰ Lajau je ba rajo, gubernur serto Bernike ngen kute tun de temot besamo-samo tobo'o.

³¹ Sementaro tobo'o keluea, tobo'o madeak suang ngen de luyen, “Tun o coa menea sesuaktau de setipal ngen ukuman matei atau ukuman sel.”

³² Agripa madeak ngen Festus, “Tun o sebeneane bi dapet nebebas sekirone si coa madeak Kaisar.”