KISAH RASUL-RASUL 24 - JANJAI BLAU Lem Bahaso Jang Bebilai

Paulus nadau tun-tun Yahudi

¹ Lemo bilai sesudo'o tekoba Imem Lai Ananias besamo-samo ngen kekedau tuai-tuai ngen suang pengacara genne Tertulus. Tobo'o madep gubernur, semapei dakwaan tobo'o teadep Paulus.

² Paulus nok madep muko ngen Tertulus muloi temuduak Paulus. Tertulus madeak, “Gubernur de mulio, neak beak pipinan Tuan negrai keme tentram, kerno kebijaksanaan Tuan dau sekilai perbaikan de sudo nea utuk bangso yo.

³ Kutene o keme bogoa semambut ngen timo kasiak ngen penghargaan de selekat-lekatne neak ipe bae.

⁴ Tapi kunyau jibeak muang waktau Tuan, uku minoi supayo Tuan temi'uk pengaduan keme de siket yo.

⁵ Keme dapet bahwo tun yo pengacau de bahayo. Neak ipe bae si menea keributan neak antaro tun-tun Yahudi, si jijai pemipin tun-tun Nazaret.

⁶ Si malah sudo cemubo menea najis Bait Allah. [Kerno o keme temakep si, lok mukumne temurut Hukum Taurat keme.

⁷ Tapi kepalo pasukan Lisias teko temgeakne, mbutne ngen kekerasan kunei tangen keme,

⁸ lajau meluak paro tukang ngadau madep ko.] Amen ko suang merikso si, dapetba ko namen kute sesuaktau de keme temuduak teadep si.”

⁹ Tun-tun Yahudi de ade neak di kulo milau temuduak Paulus ngen mbenea kute de nadeak Tertulus.

Paulus mbela dirai neak adep Feliks

¹⁰ Gubernur melei isyarat ngen Paulus bahwo si buliak miling. Lajau Paulus madeak, “Uku namen bahwo sudo kekedau taun ko jijai hakim das bangso yo. Kerno o ngen coa ragau uku mbela pekaroku yo neak adepnu.

¹¹ Tuan dapet maset bahwo coa lebiak kunei duai belas bilai de sudo uku teko moi Yerusalem utuk semyang.

¹² Coa perneak tun temau uku dong tekea ngen suang tun atau menea huru-hara, neak lem Bait Allah, atau neak lem umeak semyang, atau neak penan luyen neak kota.

¹³ Tobo'o coa dapet melei bukti ngen ko jano de uyo tenuduak tobo'o ngen diraiku.

¹⁴ Tapi uku ngakau ngen ko bahwo uku nyembeak Allah ninik puyang keme temurut ajaran Yesus de tobo'o anggep saleak. Uku pecayo ngen kute sesuaktau de tetulis lem Hukum Taurat ngen lem Kiteb Nebai-nebai.

¹⁵ Uku mpek harapan ngen Allah, serai awei tobo'o kulo bahwo bakea ade tun matei idup igai, baik tun de benea atau tun de coa benea.

¹⁶ Kerno o uku bogoa beusaho utuk idup, supayo atei nuraniku bersih teadep Allah ngen manusio.

¹⁷ Sesudo kekedau taun uku teko igai moi Yerusalem utuk melei batuan caci utuk bangsoku ngen utuk melei persembahan kurban ngen Allah.

¹⁸ Sementaro uku menea kutene o, kekedau tun Yahudi kunei Asia temau uku neak lem Bait Allah, sesudo uku selsei semucai diraiku, coa ade tun dau ngen coa ade keributan.

¹⁹ Tobo'oba de seharusne madep ko neak yo utuk melei pengaduan tobo'o, amen tobo'o temuan sesuaktau teadep uku.

²⁰ Tapi kunyauba tun-tun de ade neak yo uyo madeak kejahatan jano de tobo'o dapet, ketiko uku nadep moi Mahkamah Agamo.

²¹ Atau jano mukin kerno do-done kecek de uku madeak, ketiko uku je neak tengeak-tengeak tobo'o, adeba: Kerno hal tun matei idup igai, bilai yo uku nadep ngen ko.”

²² Tapi Feliks de benea-benea namen tetang ajaran Yesus, semlesei perkara tobo'o, Feliks madeak, “Sapeine kepalo pasukan Lisias neak yo, uku bakea mok putusan lem pekaronu.”

²³ Lajau si meluak perwira o tep temaen Paulus, tapi tahanan lengan, ngen coa buliak temgeak suang kulo kunei kekuatne melayan si.

Paulus neak adep Feliks ngen Drusila

²⁴ Sesudo kekedau bilai tekoba Feliks besamo-samo ngenyanne Drusila, suang Yahudi, lajau temi'uk si miling tetang pecayo ngen Yesus Kristus.

²⁵ Tapi ketiko Paulus miling tetang kebenea, taen nafsu ngen tetang ukuman pado Bilai Kiamat, Feliks jijai saben, si madeak, “Cukupba kileak ngen lalauba uyo; amen ade kesepatan baik, uku bakea menok ko.”

²⁶ Sementaro o Feliks ma'ep Paulus melei caci ngen si. Kerno o si awit menokne utuk miling ngen si.

²⁷ Tapi sesudo genep duai taun, Feliks genitei ngen Perkius Festus, utuk mok atei tun Yahudi, Felik munyau Paulus tep lem sel.