KISAH RASUL-RASUL 23 - JANJAI BLAU Lem Bahaso Jang Bebilai

¹ Samo kemliak anggota-anggota Mahkamah Agamo, Paulus madeak, “Pasuak-pasuak, sapei bilai yo uku tep idup ngen atei nurani de murni neak adep Allah.”

² Tapi Imem Lai Ananias meluak tun-tun de je paok Paulus tenpok bibia Paulus.

³ Mako Paulus madeak ngen si, “Allah bakea tenpok ko, tun munafik de asai sucai! Ko temot neak yo utuk mukum uku temurut Hukum Taurat, tapi ko melanggea Hukum Taurat ngen periteaknu utuk tenpok uku.”

⁴ Tun-tun de ade neak di madeak, “Ko mino imem lai Allah?”

⁵ Paulus jemawab, “Hoi pasuak-pasuak, uku coa namen bahwo si adeba Imem Lai. Memang ade tetulis: Jibeakba ko madeak kidek tetang suang pemipin bangsonu!”

⁶ Kerno Paulus namen bahwo pa'o kunei tobo'o tun Saduki ngen pa'o tun Farisi, si menggang lem Mahkamah Agamo, “Pasuak-pasuak uku adeba tun Farisi, royot tun Farisi; uku nadep moi mahkamah yo, kerno uku lok tun matei idup igai.”

⁷ Ketiko Paulus madeak awei'o, timboaba gu'ok neak antaro tun Farisi ngen tun Saduki, tepecuakba tun dau'o.

⁸ Kerno tun-tun Saduki madeak bahwo coa ade tun matei idup igai, coa ade malaikat, atau Roh tapi tun Farisi ngakau keduaine.

⁹ Lajau tejijaiba gu'ok lai. Kekedau gu'au-gu'au agamo kunei aliran Farisi maju moi adep, melawen, nadeakne, “Keme samo sekilai coa temau sesuaktau de saleak ngen tun yo! Mukin ade roh atau malaikat de sudo miling ngen si.”

¹⁰ Tekea lai kulo tejijai, sehinggo pemipin pasukan saben, amen tobo'o bakea menggomboa Paulus. Kerno o si meriteak pasukan utuk tu'un moi beak ngen mok Paulus kunei tengeak-tengeak tobo'o, mbinne moi markas.

¹¹ Pado malem menne Tuhan teko je neak depeakne ngen madeak ngen si, “Teguakba ateinu, Ko bi melei saksainu tetang Uku neak Yerusalem. Be ko harus melei saksai o neak Roma.”

Komplotan utuk munuak Paulus

¹² Kekabuk menne, tun-tun Yahudi muloi menea komplotan. Tobo'o supeak coa bakea mukmei atau menem amen tobo'o ati munuak Paulus.

¹³ Ade lebiak kunei pat puluak tun de menea komplotan o.

¹⁴ Tobo'o lalau ngen imem-imem kepalo ngen pemipin-pemipin Yahudi. Lajau tobo'o madeak, “Keme bi besupeak besamo-samo, coa bakea mukmei ngen menem jejano amen keme ati munuak Paulus.

¹⁵ Kerno o uyo lokba udi besamo-samo ngen Mahkamah Agamo meluak kepalo pasukan, supayo si mbin Paulus igai ngen udi, aweine udi lok merikso pekarone lebiak jelas. Sementaro o keme bi siap utuk munuak si ayok si sapei ngen udi.”

¹⁶ Tapi tuk Paulus, anok kunei asuakne selawei temi'uk tetang rencano komplotan o. Mako si lalau moi markas ngen melei namen hal o ngen Paulus.

¹⁷ Lajau Paulus menok saleak suang perwira, madeak ngen si, “Mbinba tun uai yo ngen kepalo pasukan, kerno ade de perlu nadeakne ngen si.”

¹⁸ Perwira o mbinne ngen kepalo pasukan, perwira o madeak, “Paulus tun tahanan o, menok uku ngen minoi, supayo uku mbin tun uai yo ngen ko, sebab ade de perlu nadeakne ngen ko.”

¹⁹ Kepalo pasukan o megong tangen tun uai o, lajau mbinne nyu'ang moi saping ngen betanye, “Jano de perlu ko melei namen ngen uku?”

²⁰ Jawabne, “Tun-tun Yahudi bi sepakat utuk minoi ngen ko, supayo men ko mbin Paulus igai moi Mahkamah Agamo, aweine Mahkamah yo lok dapet keterangan de lebiak jelas kunei si.

²¹ Tapi jibeakba ko keno rayuan tobo'o, sebab lebiak kunei pat puluak tun neak antaro tobo'o bi siap madang si. Tobo'o bi supeak bahwo tobo'o coa bakea mukmei atau menem, ayok tobo'o munuak si; uyo tobo'o bi siap, cuma mbot persetujuannu.”

²² Lajau kepalo pasukan meluak tun uai o belek ngen melei periteak, “Jibeak madeak ngen api bae bahwo ko bi melei namen ngen hal yo ngen uku.”

Paulus nembo moi Feliks

²³ Sesudo'o kepalo pasukan menok duai tun perwira ngen madeak, “Seniapba duai otos tun prajurit utuk berakat moi Kaisarea beserto tujuak puluak tun mbin kudo ngen duai otos tun mbin kujuak, kekiro pado jam sembilan kelmen yo.

²⁴ Semiap kulo kekedau keledai utuk Paulus, mbinba si ngen selamat ngen Gubernur Feliks.”

²⁵ Si temulis su'et de sa'eine awei yo,

²⁶ “Salam kunei Kelaudius Lisias ngen Gubernur Feliks de mulio.

²⁷ Tun yo tenakep tun Yahudi. Ketiko tobo'o lok munuakne, uku teko ngen pasukan temgeakne ngen melpasne, kerno uku temi'uk si adeba warga negara Roma.

²⁸ Utuk namen jano alasanne tobo'o mukum si, uku mbinne moi Mahkamah Agamo tobo'o.

²⁹ Uku namen bahwo si nukum kerno hal-hal Hukum Taurat tobo'o, tapi coa ade tuduak de menea si patas nukum matei atau masuk moi sel.

³⁰ Ngen uku bi melei namen bahwo ade komplotan de ade rencano utuk munuak si. Kerno'o uku segro meluak mbin si ngen ko, tobo penuduak bi uku melei namen bahwo tobo'o harus mengajukan pekaro'o ngen ko.”

³¹ Mako anggota tentra'o maneu tugas tobo'o. Tobo'o mok Paulus lajau mbinne kelmen'o sapei moi Antipatris.

³² Menne tobo'o munyau pasukan de mbin kudo'o temrus pemaneu ngen Paulus, tobo'o suang belek moi markas.

³³ Ketiko pasukan de mbin kudo'o sapei neak Kaisarea, tobo'o semapei su'et'o ngen gubernur, lajau semreak Paulus ngen si.

³⁴ Sesudo'o gubernur mbaco su'et'o, si betanye ngen Paulus kunei ipe asalne. Ketiko si namen bahwo Paulus asalne kunei Kilikia.

³⁵ Si madeak, “Baikba! Uku bakea merikso pekaronu amen tun-tun de madau ko bi sapei neak piyo.” Lajau si melei periteak supayo Paulus tena'en neak lem istana Herodes.