KISAH RASUL-RASUL 22 - JANJAI BLAU Lem Bahaso Jang Bebilai

¹ “Pasuak-pasuak ngen Bapak-bapak, teniukba, jano de lok uku madeak uyo ngen ko sebagoi mbela dirai.”

² Waktau tun dau temi'uk si miling lem bahaso Ibrani, tobo'o jijai lebiak tenang.

³ Si madeak, “Uku adeba tun Yahudi, laher neak Tarsus neak taneak Kilikia, tapi lai neak kota yo; ndidik ngen teliti neak beak pipinan Gamaliel lem hukum ninik puyang te, sehinggo uku jijai tun de giat kerjo utuk Allah serai awei udi kute pado waktau yo.

⁴ Uku bi semikso penotoa-penotoa ajaran Yesus sapei tobo'o matei; semanei ngen selawei uku tenakep ngen mbin masuk moi lem sel.

⁵ Imem Lai suang ngen kute Mahkamah Agamo dapet melei saksai bahwo uku coa ngike. Kerno tobo'oba de sudo melei ngen uku su'et pengantar utuk tun-tun Yahudi neak Damsyik. Ngen su'et o uku buliak makep tun-tun de pecayo ngen ajaran o neak di, mbin tobo'o moi Yerusalem utuk nukum.”

Paulus cemrito pengalaman

⁶ “Tapi lem pemaneuku moi di, ketiko uku bi pa'ok Damsyik, kekiro tengeak bilai, seketiko'o ade cayo de te'ang kunei lenget kemliling uku.

⁷ Uku gulek moi pitok lajau temi'uk sa'ei de madeak ngen uku: ‘Saulus, Saulus, getai ko semikso Uku?’

⁸ Uku jemawab: ‘Api Ko, Tuan?’ Nadeak-Ne: ‘Ukuba Yesus, tun Nazaret, de ko sikso o.’

⁹ Tun-tun de semerto uku, memang kemliak cayo o, tapi sa'ei Si, de madeak ngen uku, tobo'o coa temi'uk.

¹⁰ Lajau uku madeak: ‘Tuhan, jano de harus uku nea?’ Tuhan madeak ngen uku: ‘Kelongonba ngen lalauba moi Damsyik. Neak di bakea nelei namen ngen ko kute de Allah lok ko kenerjo.’

¹¹ Kerno Uku coa dapet ngeliak cayo de sileu o, mako kekuatku de megong tangenku, mbin uku moi Damsyik.

¹² Neak di ade suang tun genne Ananias, si tun malim ngen taat kemerjo Hukum Taurat, Ananias terkenal baik neak antaro kute tun Yahudi de ade neak di.

¹³ Si teko je neak pa'okku ngen madeak: ‘Saulus, pasuakku, lokba ko kemliak igai!’ Seketiko o kulo uku kemliak igai ngen kemliak si.

¹⁴ Lajau nadeakne: ‘Allah ninik puyang te bi temtep ko utuk namen kelok-Ne, utuk kemliak De Benea, utuk temi'uk sa'ei de kelua kunei bibia-Ne.

¹⁵ Kerno ko harus jijai saksai-Ne teadep kute tun tetang jano de ko kemliak ngen ko temi'uk.

¹⁶ Uyo, getai ko masiak ragau? Kelongonba, neleiba dirainu dibaptis, duso-dusonu senucai ngen menggang ngen Tuhan!’ ”

Allah meluak Paulus khotbah ngen bangso luyen

¹⁷ “Sesudo uku belek neak Yerusalem, ketiko uku dong bedu'o neak Bait Allah, roh uku kenuaso Roh Sucai.

¹⁸ Uku kemliak Si, de madeak ngen uku: ‘Gacangba, segroba teninggea Yerusalem, kerno tobo'o coa bakea temimo saksainu tetang Uku.’

¹⁹ Uku jemawab: ‘Tuhan, tobo'o namen bahwo uku bi masuk umeak-umeak semyang utuk makep tobo'o ngen mokoa tun-tun de pecayo ngen-Ko.

²⁰ Ketiko daleak Stefanus, saksai-Nu o, tenupeak, uku ade neak di, tujau ngen uleak o ngen uku jemago keracok tobo'o de munuakne.’

²¹ Tapi Tuhan madeak ngen uku: ‘Lalauba, sebab Uku bakea mutus ko uak kunei yo ngen bangso-bangso luyen.’ ”

²² Tun dau o temi'uk kecek Paulus; lajau tobo'o muloi menggang, “Nunuak tun yo! Si coa patut idup!”

²³ Tobo'o bogoa menggang samo meluk jubah tobo'o ngen ngibas debu moi udara.

²⁴ Kerno'o pemipin pasukan melei periteak utuk mbin Paulus moi markas ngen meluak merikso, cemambuk Paulus, supayo namen jano sebabne tun dau o menggang awei o teadep si.

²⁵ Tapi waktau Paulus genulek utuk cenambuk, Paulus madeak ngen perwira de betugas, “Jano buliak ko cemambuk tun Roma, ayok si senidang?”

²⁶ Temi'uk kecek o perwira o melei namen ngen pemipin pasukan, nadeakne, “Jano de lok ko nea? Tun o warga negara Roma.”

²⁷ Lajau tekoba pemipin pasukan o ngen Paulus, si madeak, “Nadeakba, jano ko warga negara Roma?” Paulus jemawab, “Benea.”

²⁸ Lajau pemipin pasukan o madeak, “Kewarganegaraan o uku nukua ngen go la'ang.” Paulus jemawab, “Tapi uku laher sebagoi warga negara Roma.”

²⁹ Lajau tobo'o de harus cemambuk si, segro mondor; pemipin pasukan o jijai saben, sesudo si namen bahwo Paulus adeba warga negara Roma.

Paulus neak adep Mahkamah Agamo

³⁰ Tapi pemipin pasukan o lok namen jano de tenuduak tun-tun Yahudi ngen Paulus. Kerno o, menne si meluak mok Paulus kunei sel, pemipin pasukan o melei periteak, supayo imem-imem kepalo ngen anggota Mahkamah Agamo luyenne bekopoa. Lajau si mbin Paulus kunei markas, nembin madep tobo'o.