KISAH RASUL-RASUL 21 - JANJAI BLAU Lem Bahaso Jang Bebilai

Paulus neak Tirus ngen Siprus 21:1-16

¹ Sesudo pamit ngen pemipin-pemipin neak efesus, keme lalau lasung belayea moi Kos. Menne sapeiba keme neak Rodos. Kunei di keme moi Patara.

² Neak Patara keme temau kepea, de lok nyeb'ang moi Fenisia. Keme kenek kepea o, lajau berakat.

³ Sesudo'o keten Siprus neak peak kideu, tapi keme liwetne lajau lalau moi Siria. Akherne sapeiba keme neak Tirus, kerno muatan kepea harus nukea neak kota o.

⁴ Keme magea penotoa-penotoa ngen tinggea neak di selamo tujuak bilai. Kerno petunjuk kunei Roh penotoa-penotoa o melei nasihat ngen Paulus, supayo Paulus jibeak lalau moi Yerusalem.

⁵ Tapi sesudo liwet waktaune, keme berakat temrus pemaneu keme. Tobo'o kutene besamo-samo anok ngen ngenyanne mbes keme sapei moi luea kota. Neak pengger pantai keme sujut ngen bedu'o.

⁶ Sesudo pamit keme kenek moi kepea, tobo'o belek moi umeak.

⁷ Kunei Tirus keme sapei neak Ptolemais ngen neak di berakherba pemaneu keme. Keme melei salam ngen pasuak-pasuak de pecayo, tinggea debilai neak antaro tobo'o.

⁸ Menne keme berakat kunei di ngen sapei neak Kaisarea. Keme masuk moi umeak Filipus, tukang semiar Bito Baik'o, adeba saleak suang kunei ketujuak tun de niliak neak Yerusalem, ngen keme tinggea neak umeakne.

⁹ Pat anok selawei Filipus bi nelei karunio kunei Allah utuk melei namen bito kunei Allah.

¹⁰ Sesudo kekedau bilai keme tinggea neak di, tekoba suang nebai Yudea genne Agabus.

¹¹ Si teko ngen keme, lajau mok teng Paulus. Samo meket kekea ngen tangenne suang si madeak, “Awei yoba nadeak Roh Sucai: Aweiyoba de temuan teng yo bakea neket ngen tun-tun Yahudi neak Yerusalem, senreak moi tangen bangso-bangso luyen.”

¹² Temi'uk o keme besamo-samo ngen tun-tun neak penan o minoi, supayo Paulus jibeak lalau moi Yerusalem.

¹³ Tapi Paulus jemawab, “Getai udi ngindoi, sehinggo menea ateiku ajua? Kerno uku yo rela iso bae utuk neket, tapi kulo utuk matei neak Yerusalem demi gen Tuhan Yesus.”

¹⁴ Kerno si coa lok temimo nasihat keme, keme nyereak ngen madeak, “Jijaiba kenlok Tuhan!”

¹⁵ Sesudo tinggea kekedau bilai neak Kaisarea, keme semiap barang-barang, lajau berakat moi Yerusalem.

¹⁶ Besamo-samo ngen keme milau kulo kekedau penotoa kunei Kaisarea. Tobo'o mbin keme moi umeak suang tun genne Manason. Si kunei Siprus ngen bi an jijai penotoa Yesus. Keme bakea nupang neak umeakne.

Paulus magea Yakobus

¹⁷ Ketiko keme sapei neak Yerusalem, kute tun-tun do imen semambut keme ngen riang.

¹⁸ Menne lalauba Paulus besamo-samo ngen keme magea Yakobus; kute pemipin-pemipin jemaat bi ade neak di.

¹⁹ Paulus melei salam ngen tobo'o, lajau cemrito kute sesuaktau jano de nea Allah neak antaro bangso-bangso luyen liwet pelayananne.

²⁰ Sesudo temi'uk cerito Paulus'o, tobo'o kutene mujai Allah. Lajau tobo'o madeak ngen Paulus, “Paulus, keliakba, beribau-ribau tun Yahudi bi pecayo ngen Yesus kute setia miaro Hukum Taurat.

²¹ Tapi tobo'o temi'uk tetang ko bahwo ko majea kute tun Yahudi de tinggea neak antaro bangso-bangso luyen utuk mpas Hukum Taurat, kerno ko madeak, supayo tobo'o jibeak semunat anok-anokne ngen jibeak idup temurut adat istiadat te.

²² Jijai awei ipe uyo? Pasti tobo'o bakea temi'uk bahwo ko bi teko miyo.

²³ Kerno'o, neaba jano de keme nadeak yo: Neak antaro keme ade pat tun de menea janjai ngen Allah.

²⁴ Mbinba tobo'o besamo-samo ngen ko, neaba upacara semucai dirai besamo-samo ngen tobo'o, tenanggungba biaya tobo'o, sehinggo tobo'o dapet mtok bukne; mako kute tun bakea namen bahwo kute bito de tobo'o teni'uk tetang ko samo sekilai coa benea, kerno ko suang tep miaro Hukum Taurat.

²⁵ Tapi tetang bangso-bangso luyen, de sudo pecayo, keme bi kemirim su'et ngen tobo'o tetang keputusan keme, adeba tobo'o bahwo tobo'o coa buliak mbuk kembuk de sudo senreak ngen patung, kunei daleak, kunei daging benatang de matei ncit ngen kunei zinah.”

²⁶ Mako Paulus lalau ngen kepat tun o lajau menea upacara semucai dirai besamo-samo ngen tobo'o menne. Sesudo'o masuk moi Bait Allah utuk melei namen tengen upacara semucai dirai bakea selesei, kurban bakea senreak utuk tobo'o sesuang.

Paulus tenakep moi Bait Allah

²⁷ Ketiko maso tujuak bilai o bi lok berakher, tun-tun Yahudi de teko kunei Asia, kemliak Paulus neak lem Bait Allah, lajau tobo'o majung rakyat ngen temakep si,

²⁸ samo menggang, “Hoi tun-tun Israel, tulung! Dioba tun de neak ipe bae majea kute tun utuk temtang bangso ite ngen temtang Hukum Taurat ngen Bait Allah! Uyo si mbin tun-tun Yunani kulo moi lem Bait Allah ngen menea najis penan sucai o!” (

²⁹ Kerno tobo'o bi kemliak Trofimus kunei Efesus ayokne besamo-samo ngen Paulus neak kota, tobo'o sako bahwo Paulus bi mbin si moi Bait Allah.)

³⁰ Lajau kacauba kute kota ngen tun dau teko gemlumbung, lajau makep Paulus ngen me'etne moi luea Bait Allah, seketiko o kulo kute bang Bait Allah o tenutup.

³¹ Sementaro tobo'o beusaho utuk munuak si, sapeiba bito ngen pipinan pasukan bahwo kute Yerusalem gempar.

³² Pemipin pasukan, prajurit-prajurit ngen perwira-perwira segro magea tun dau o. Ketiko tobo'o kemliak si ngen prajurit-prajurit o, bedanba tobo'o mokoa Paulus.

³³ Pemipin pasukan o ma'ok Paulus, temakepne ngen meluak meket si ngen duai ratoi, lajau betanye api si, jano de sudo neane.

³⁴ Tapi kunei antaro tun dau o ade de jemawap awei yo, ade kulo de jemawap awei o. Keadaan kacau sehinggo komandan o coa namen jano sebeneane de sudo tejijai. Kerno o si meluak mbin Paulus moi markas.

³⁵ Ketiko sapei moi endea Paulus pakso nusung prajurit-prajurit kerno tun dau dedesok.

³⁶ Kute rakyat rerami temotoa si, samo menggang, “Nunuak si!”

Paulus minoi izin utuk miling

³⁷ Waktau Paulus lok nembin masuk moi markas, Paulus madeak ngen pemipin pasukan o, “Jano buliak uku madeak sesuaktau ngen ko?” Jawabne, “Ko namen bahaso Yunani?

³⁸ Jijai, ko iso tun Mesir o de tembei bae menea pembrontakan ngen mbin melilai pat ribau tun pengacau de makei senjato moi benei libea?”

³⁹ Paulus jemawap, “Uku adeba tun Yahudi, kunei Tarsus, tun kunei kota de terkenal neak Kilikia; uku minoi, supayo uku neluak miling ngen tun dau o.”

⁴⁰ Sesudo Paulus neluak pemipin pasukan, lalauba si je neak ndea, si melei isyarat ngentangenne moi tun dau o. Ketiko bi aman, muloiba si miling ngen tobo'o lem bahaso Ibrani, nadeakne,