KISAH RASUL-RASUL 18 - JANJAI BLAU Lem Bahaso Jang Bebilai

Paulus neak Korintus

¹ Sesudo'o Paulus teminggea Atena, lajau lalau moi Korintus.

² Neak di si temau ngen suang Yahudi genne Akwila, asalne kunei Pontus. Si tembei teko kunei Italia ngen Priskila, ngenyanne, kerno kaisar Klaudius bi meriteak, supayo kute tun Yahudi teminggea Roma. Paulus singgeak neak umeak tobo'o.

³ Kerno tobo'o menea kerjo de serai, si tinggea besamo-samo tobo'o. Tobo'o kerjo besamo-samo, kerno tobo'o sesamo tukang menea kemah.

⁴ Tiep bilai Sabat Paulus miling lem umeak semyang ngen berusaho supayo tun-tun Yahudi ngen tun-tun Yunani pecayo ngen Yesus.

⁵ Ketiko Silas ngen Timotius teko kunei Makedonia, Paulus muloi ngen sepenuakne melei namen bito kunei Allah, saksai ngen tun-tun Yahudi bahwo Yesusba Rajo Penyelamat.

⁶ Tapi ketiko tun-tun o melawen si ngen minone, si mersi debu kunei keracokne. Paulus madeak ngen tobo'o, “Kunyauba daleaknu tupeak neak das ulaune suang; uku bersih, coa saleak. Muloi uyo uku bakea lalau ngen bangso-bangso luyen.”

⁷ Si keluea kunei di, lajau lalau moi umeak suang tun genne Titius Yustus, de saben ngen Allah, de umeakne neak depeak umeak semyang.

⁸ Tapi Krispus, pemipin umeak semyang o, jijai pecayo ngen Tuhan besamo-samo ngen kute si'ing umeakne, dau kunei tun-tun Korintus, de temi'uk bito de senapei Paulus, jijai pecayo ngen dibaptis.

⁹ Pado suaktau kelmen Tuhan madeak ngen Paulus neak lem pengeliak, “Jibeak saben! Terusba melei namen firman ngen jibeak diem!

¹⁰ Kerno uku semerto ko ngen coa ade suang kulo de bakea menea de kidek ngen ko, kerno dau umat-Ku neak kota yo.”

¹¹ Lajau tinggaba Paulus neak di detaun tengeak ngen si majea firman Allah neak antaro tobo'o.

¹² Tapi, sesudo Galio jijai gubernur neak Akhaya, tun-tun Yahudi bersatu melawen Paulus, lajau mbin Paulus moi pengadilan.

¹³ Tobo'o madeak, “Si yo berusaho menea tun nyembeak Allah ngen ca'o de bertentangan ngen Hukum Taurat.”

¹⁴ Ketiko Paulus lok muloi miling, Galio madeak ngen tun-tun Yahudi o, “Hoi tun-tun Yahudi, sekirone pengaduannu tetang suaktau pelanggaran atau kejahatan, bi sepatutne uku temimo perkaronu.

¹⁵ Tapi amen hal o adeba selisiak tetang kecek, gen atau hukum de belakau neak antaro udi, mako lokba udi suang semleseine; uku coa lok jijai hakim das perkaro de awei yo.”

¹⁶ Sudo o si musir tobo'o kunei ruang pengadilan.

¹⁷ Lajau tobo'o kute temakep Sostenes, pemipin umeak semyang, lajau mokoane neak adep pengadilan o. Tapi Galio samo sekilai coa dulai hal o.

Paulus belek moi Antiokhia

¹⁸ Paulus tinggea kekedau bilai igai neak Korintus. Lajau si pamit ngen tun-tun de pecayo neak di, ngen belayea moi Siria, sesudo si metok bukne neak Kengkrea, kerno si bi janjai. Priskila ngen Akwila semerto si.

¹⁹ Lajau sapeiba tobo'o neak Efesus. Paulus teminggea Priskila ngen Akwila neak di. Si suang masuk moi umeak semyang, miling ngen tun-tun Yahudi.

²⁰ Tobo'o minoi ngen si utuk tinggea lebiak an neak di, tapi si coa lok.

²¹ Si pamit ngen madeak, “Uku bakea teko igai ngen udi, amen Allah kemlokne.” Lajau Paulus terus lalau moi Efesus.

²² Sesudo sapei neak Kaisarea, Si lalu moi Yerusalem utuk melei salam ngen jemaat neak dilajau terus moi Antiokhia.

²³ Sesudo tinggea kekedau an neak di, si berakat igai lajau jemlajeak kute taneak Galatia ngen Frigia utuk kemu'et atei kute tun-tun pecayo.

Apolos neak Efesus ngen Korintus

²⁴ Sementaro'o tekoba moi Efesus suang Yahudi genne Apolos. Si asalne kunei Aleksandria. Si pacok miling ngen kebiak paham tetang Kiteb Sucai.

²⁵ Si sudo temimo ajaran tetang ajaran Yesus. Ngen semangat si miling, ngen teliti si majea tetang Yesus, tapi si cuma namen baptisan Yohanes.

²⁶ Si muloi binai majea neak umeak semyang. Tapi sesudo Priskila ngen Akwila temi'ukne, tobo'o mbin si moi umeak tobo'o, ngen teliti jemlas ngen si Dalen Allah.

²⁷ Kerno Apolos lok nyeb'ang moi Akhaya, tun-tun pecayo neak Efesus kemirim su'et ngen penotoa-penotoa neak di, supayo tobo'o semambut si. Sapeine neak Akhaya, si jijai kebiak beguno bagiak tun-tun de pecayo ngen Anugrah Allah.

²⁸ Kerno ngen penuak semangat si mbanteak tun-tun Yahudi neak adep umum ngen melei bukti kunei Kiteb Sucai bahwo Yesusba Rajo Penyelamat.