KISAH RASUL-RASUL 17 - JANJAI BLAU Lem Bahaso Jang Bebilai

Gu'ok neak Tesalonika

¹ Paulus ngen Silas mok dalen liwet Amfipolis ngen Apolonia, sapei neak Tesalonika. Neak di ade debueak umeak semyang tun Yahudi.

² Awei biasone Paulus masuk moi umeak semyang o. Telau bilai Sabat beturut-turut si madeak ngen tobo'o ayat-ayat kunei Kiteb Sucai.

³ Si tem'ang ngen melei bukti ngen tobo'o bahwo Rajo Penyelamat harus meding saro ngen idup igai kunei tun matei, lajau Paulus madeak, “Dioba Rajo Penyelamat, adeba Yesus, de uku melei ngen ko.”

⁴ Kekedau tun kunei tobo'o jijai pecayo ngen temotoa Paulus ngen Silas, awei o kulo sejumleak lai tun Yunani de saben ngen Allah, ngen dau igai seselawei terkemuko.

⁵ Tapi tun-tun Yahudi jijai iri, ngen batuan kekedau penjahat de bekeliaran neak dalen-dalen, tobo'o menea keributan ngen macau kota o. Tobo'o semerbu umeak Yason ngen maksut utuk mbin Paulus ngen Silas madeptun dau.

⁶ Tapi ketiko tobo'o coa temau Paulus ngen Silas, tobo'o seme'et Yason ngen kekedau tun pecayo luyen moi adep pejabat-pejabat kota, samo menggang, “Tun-tun de macau kute denio bi teko kulo miyo,

⁷ ngen Yason temimo tobo'o nupang neak umeakne. Tobo'o kute melanggea ketetapan-ketetapan Kaisar Roma, si madeak bahwo ade suang rajo luyen, adeba Yesus.”

⁸ Ketiko tun dau ngen pejabat-pejabat kota temi'uk kutene o, tobo'o jijai gemtea.

⁹ Tapi sesudo tobo'o dapet jaminan kunei Yason ngen kunei tun-tun de pecayo luyenne, tobo'o kulo nepas.

Paulus ngen Silas neak Berea

¹⁰ Tapi pado malem o kulo segro tun-tun pecayo neak di meluak Paulus ngen Silas berakat moi Berea. Sapeine neak di lalauba tobo'o moi umeak semyang tun Yahudi.

¹¹ Tun-tun Yahudi neak kota o lebiak tukok ateine kunei pado tun-tun Yahudi neak Tesalonika, kerno tobo'o temimo Firman o ngen kute kerelaan atei, tiep bilai tobo'o semlidik Kitep Sucai utuk namen, jano kutene o benea awei o.

¹² Kerno o dau neak antaro tobo'o de jijai pecayo. Coa didik kulo neak antarone adeba tun Yunani de tekemuko, baik selawei atau semanei.

¹³ Tapi ketiko tun-tun Yahudi kunei Tesalonika namen bahwo neak Berea kulo bi nelei namen firman Allah ngen Paulus, tobo'o kulo teko moi di utuk majung ngen menea tun-tun neak di jijai liseak.

¹⁴ Tapi tun-tun pecayo o meluak Paulus segro berakat moi pantai, tapi Silas ngen Timotius masiak tinggea neak Berea.

¹⁵ Tun-tun de mi'ing Paulus mbesne sapei neak Athena, lajau belek mbin pesen ngen Silas ngen timotius, supayo tobo'o gacang teko ngen Paulus.

Paulus neak Atena

¹⁶ Sementaro Paulus mbot Silas ngen Timotius neak Atena, kebiak ibo ateine kerno si kemliak bahwo kota o penuak ngen patung-patung.

¹⁷ Kerno o neak umeak semyang, Paulus betukar pekeran ngen tun-tun Yahudi ngen tun-tun de saben ngen Allah. Awei o kulo tiep bilai si tukar pekeran ngen tun-tun neak pasar.

¹⁸ Gu'au-gu'au aliran Epikuros ngen aliran Stoa bedebat kulo ngen si. Ade de madeak, “Jano de lok tukang ngike madeak?” Tapi de luyen madeak, “Rupone si melei namen tetang ajaran diwo-diwo bangso luyen.” Kerno si melei namen Bito Baik tetang Yesus ngen idup igai sesudo matei.

¹⁹ Lajau tobo'o mbinne madep sidang moi Tebo Areopagus ngen madeak, “Jano buliak keme namen ajaran belau ipe de ko najea yo?

²⁰ Kerno ko melei namen ngen keme hal-hal de asing. Kerno o keme lok namen jano tai kutene o.” (

²¹ Kerno kute tun Atena ngen tun-tun asing de tinggea neak di coa gen waktau utuk madeak atau temi'uk tetang hal-hal de belau.)

²² Paulus je neak adep tun-tun de bekopoa neak Areopagus. Paulus madeak, “Hoi tun-tun Atena, uku kemliak bahwo lem kute hal udi kebiak beragamo.

²³ Kerno ketiko uku paneu neak kotanu, uku kemliak penan-penan semyangnu, uku temau kulo debueak penan melei kurban. Neak di ade tetulis, ‘Ngen Allah de coa kenal.’ Jano de udi sembeak ngen coa kemnalne, do'oba de uku melei ngen udi.

²⁴ Allah de sudo jemijai bumai ngen kute si'ingne, Siba Tuhan das lenget ngen bumai, coa tinggea lem umeak-umeak diwo de nea manusio.

²⁵ Si kulo coa perlu batuan manusio, kerno siba de melei idup, nyabai ngen kute sesuaktau ngen manusio.

²⁶ Kunei do tun bae Si bi jemijai kute bangso ngen umat manusio utuk nunggau kute muko bumai, si bi temtau musim-musim utuk tobo'o ngen bates-bates penan tinggea tobo'o,

²⁷ supayo tobo'o mesoa Allah. Mudah-mudahan tobo'o temau ngen Si, kunyau Si coa u'ak kunei ite memasing.

²⁸ Kerno neak lem Si ite idup, ite begerok, ite ade, awei de sudo kulo nadeak kekedau penyairnu: ‘Kerno ite yo royot Allah kulo.’

²⁹ Kerno ite asalne kunei royot Allah, ite coa buliak bepeker bahwo keadaan Allah serai awei mas, pirok, atau butau, ciptaan kesenian ngen kepacok manusio.

³⁰ Coa kemliak igai zaman kebodohan, uyo Allah meriteak kute tun neak ipe bae utuk tobat.

³¹ Kerno Si bi tem'tep suaktau bilai ketiko Si ngen Adea makim dunio ngen suang tun de sudo tentau-Ne, sesudo Si melei ngen kute tun suaktau jaminan tetang hal o ngen midup Si kunei antaro tun matei.”

³² Ketiko tobo'o temi'uk tetang tun matei idup igai, mako ade de mino, de luyen madeak, “Tengen bae keme temi'uk ko miling tetang hal o.”

³³ Lajau Paulus teminggea tobo'o.

³⁴ Tapi kekedau tun bepihok ngen si, jijai pecayo, neak antarone kulo: Dionisius, anggota majelis Areopagus, ngen suang selawei genne Damaris, ngen kulo tun-tun luyen besamo-samo tobo'o.