KISAH RASUL-RASUL 14 - JANJAI BLAU Lem Bahaso Jang Bebilai

Neak Ikonium

¹ Neak Ikonium Paulus ngen Barnabas masuk moi umeak semyang tun Yahudi, lajau majea dau hal, sehinggo sejumleak lai tun jijai pecayo, baik tun Yahudi atau tun Yunani.

² Tapi tun-tun Yahudi de temulok bito tobo'o, majung tun-tun iso Yahudi ngen menea tobo'o jengik teadep tun-tun de pecayo ngen Yesus.

³ Jijai Paulus ngen Barnabas tinggea agok'an neak di. Tobo'o miling ngen binai utuk Tuhan de melei bukti tetang anugrah-Ne, melei ngen tobo'o kuaso utuk menea tando-tando ngen mujizat-mujizat.

⁴ Tapi tun dau neak kota'o tepecuak jijai duai: ade de bepihok ngen tun Yahudi, ade kulo de bepihok ngen rasul-rasul'o.

⁵ Lajau muloiba tun-tun de iso Yahudi ngen tun-tun Yahudi besamo-besamo pemipin-pemipin tobo'o berusaho utuk semikso ngen meluk tobo'o ngen butau.

⁶ Namen hal'o, nyikiaba rasul-rasul'o moi kota-kota neak Likaonia, adeba Listra, Derbe ngen daerah sekitarne.

⁷ Neak di tobo'o melei namen Bito Baik.

Neak Listra ngen Derbe

⁸ Neak Listra ade suang semanei de temot bae, kerno si pakuak kunei laher ngen ati perneak dapet paneu.

⁹ Si temi'uk Paulus gidong miling. Paulus kemliak bahwo si tun pecayo ngen dapet kena'en.

¹⁰ Paulus madeak ngen saei nya'ing, “Je ba!”

¹¹ Tun'o kulo je, lajau muloi paneu moi ipe bae.

¹² Waktau tun dau kemliak jano de sudo Paulus menea, tobo'o menggang lem bahaso Likaonia, “Diwo-diwo bi tu'un moi tengeak-tengeak te lem rupo manusio.”

¹³ Lajau tekoba imem diwo Zeus, de kuil-Ne ade neak luea kota, mbin sapai-sapai jatan ngen bungai-bungai moi bang kota utuk melei sesembeak kurban besamo-samo ngen tun dau utuk rasul-rasul'o.

¹⁴ Temi'uk'o Barnabas ngen Paulus, cema'ik keracok tobo'o, lajau melilai moi tengeak-tengeak tun dau'o samo menggang,

¹⁵ “Hoi udi kute, getai udi menea awei yo? Keme yo manusio biaso serai awei udi. Keme ade neak yo utuk melei namen Bito Baik ngen udi, supayo udi teminggea hal-hal de coa beguno ngen belek ngen Allah de idup, de sudo cemipto lenget, bumai, laut ngen kute si'ingne.

¹⁶ Pado jaman mena'o Allah munyau kute bangso temurut dalenne sesuang.

¹⁷ Tapi si iso coa melei bukti tetang dirai-Ne ngen bebagoi plep baik, adeba temu'un ujen kunei lenget ngen melei musim-musim subur utuk udi. Si melei kembuk ngen semnang atei nu.”

¹⁸ Kunyau rasul-rasul'o madeak awei yo, tobo'o gesea coa dapet temgeak tun dau melei kurban ngen tobo'o.

¹⁹ Tapi tekoba tun-tun Yahudi kunei Antiokhia ngen Ikonium, tobo'o majung tun dau'o sehinggo bepihok ngen tobo'o. Lajau tobo'o meluk Paulus ngen butau, seme'etne moi luea kota, kerno tobo'o sako bahwo si bi matei.

²⁰ Tapi waktau tun-tun'o je kemlilingne, jeba si laju masuk moi lem kota. Menne berakatba si besamo-besamo ngen Barnabas moi Derbe.

Belek moi Antiokhia

²¹ Paulus ngen Barnabas melei namen Bito Baik moi kota'o ngen dapet dau murid. Lajau belekba tobo'o moi Listra, Ikonium ngen Antiokhia.

²² Neak penan'o tobo'o kemuet atei murid-murid'o ngen melei nasihat tobo'o supayo tep pecayo ngen Yesus, madeak bahwo utuk masuk moi lem Allah meriteak sebagai Rajo ite harus meding dau kesaro.

²³ Neak tiep-tiep jemaat rasul-rasul'o temtep pemipin-pemipin utuk jemaat'o, sesudo bedu'o ngen puaso, tobo'o semreak pemipin-pemipin'o ngen Tuhan de tobo'o pecayo'o.

²⁴ Tobo'o temrus kemliling kute daerah Pisidia ngen sapei neak Pamfilia.

²⁵ Neak di tobo'o melei namen firman Allah neak Perga, lajau lalau moi Atalia.

²⁶ Kunei di belayeaba tobo'o moi Antiokhia; neak penan'oba tobo'o bel'o senreak ngen anugrah Allah utuk muloi kemerjo kerjo de sudo tobo'o semlesei.

²⁷ Sapeine neak di tobo'o menok jemaat bekopoa, lajau tobo'o cemrito kute sesuaktau de Allah menea liwet tobo'o, bahwo si bi mukok bang utuk bangso-bangso luyen ngen imen.

²⁸ Neak di tobo'o an tinggea besamo-samo ngen murid-murid'o.