IBRANI 9 - JANJAI BLAU Lem Bahaso Jang Bebilai

Ca'o penyembahan neak dunio ngen ca'o penyembahan neak surgo

¹ Janjai de pertamo temuan peraturan-peraturan ibadah, ngen temuan kulo penan ibadah nea manusio.

² De bueak kemah tengok de rogok mukone genne Ruang Sucai. Neak di ade penan utuk lapu, ade kulo meja ngen ruti de senreak ngen Allah.

³ De neak lemne, adeba neak blakang tabir de keduai, ade ruangan de genne Ruang Mahasucai.

⁴ Neak lem ruangan o ade mezbah de nea kunei mas utuk mbem dupa, ade kulo Petai Perjanjian de kutene lapis ngen mas. Neak lem Petai o ade belangai mas si'ingne manna, tokot Harun de sudo tunes, ngen duai lepeng butau tulis de neak dasne tetulis puluak periteak kunei Allah.

⁵ Neak das Petai o ade duai Kerub, adeba makhluk sayep de jijai lambang adene Allah. Sayep kunei keduai makhluk o tebetang neak das tutup Petai, adeba penan pengampunan duso. Tapi kutene o coa dapet ten'ang uyo seca'o jelas.

⁶ Awei'oba kutene natur. Tiep bilai imem-imem masuk moi lem neak muko kemah o utuk maneu tugas tobo'o.

⁷ De masuk moi bagian paling lem kunei kemah o cuma Imem Agung bae. Si menea o cuma taun debat. Do'o neane ngen mbin daleak utuk neleine ngen Allah kerno diraine suang, kerno duso-duso de nea umat-Ne ngen coa sadar.

⁸ Ngen aturan awei o, Roh Allah kemten ngen jelas, bahwo selamo kemah bagian muko o masiak tegok, dalen masuk moi lem Ruang Mahasucai o ati tukok.

⁹ Dio lambang zaman uyo; taine bahwo persembahan-persembahan ngen kurban-kurban benatang de senreak ngen Allah, coa dapet jemijai atei nurani tun de mbin persembahan jijai sempurno.

¹⁰ Kerno upacara-upacara o cuma berkenan ngen kembuk, menem, ngen memecem upacara penyucian. Kutene cuma peraturan-peraturan laher de beguno cuma sapei waktaune Allah menea pembaharuan.

¹¹ Tapi Kristus bi teko sebagai Imem Lai kunei hal-hal de baik de sudo ade. Kemah Tuhan neak ipe Si kemerjo tugas-Ne sebagai Imem Lai adeba kemah de lebiak agung ngen lebiak sempurna. Do'o iso nea manusio; taine iso kunei dunio de nea uyo.

¹² Kristus masuk Ruang Mahasucai neak lem kemah o cuma debat bae utuk seke'anne. Pado waktau o Si coa mbin daleak kambing sebong atau daleak anok sapai utuk senreak; Si mbin daleak-Ne suang, ngen awei o Si mbebas ite utuk seke'anne.

¹³ Daleak kunei kambing ngen sapai sebong serto abu kunei kurban anok sapai, nakei utuk mcik tun-tun de najis temurut peraturan agamo supayo tobo'o jijai bersih.

¹⁴ Nah, amen daleak nge abu o dapet semucai tun-tun o, jano igai daleak Kristus! Liwet Roh de kekal, Kristus melei dirai-Ne suang ngen Allah sebagai kurban de sempurno. Daleak-Ne semucai atei nurani ite kunei upacara agamo de coa beguno, supayo ite dapet melayan Allah de idup.

¹⁵ Do'oba sebabne Kristus jijai Pengantara utuk suaktau janjai de blau, supayo tun de sudo nok Allah dapet temimo berkat-berkat kekal de sudo jenanjai Allah. Kutene o dapet tejijai kerno bi ade de matei, adeba Kristus; ngen mateine Kristus o mbebas tun kunei saleak-saleak de tobo'o nea waktau janjai de pertamo masiak berlaku.

¹⁶ Amen ade su'et warisan, harus kulo ade buktine bahwo tun de menea su'et o bi ninggea.

¹⁷ Kerno su'et warisan coa berlaku selamo tun de meneane masiak idup. Su'et o berlaku cuma sesudo tun o matei.

¹⁸ Kerno o janjai de pertamo kulo harus sah ngen daleak.

¹⁹ Mulo-mulo Musa semapei kute periteak hukum Allah ngen bangso Israel. Sesudo'o Musa mok daleak anok sapai ngen kambing sebong, lajau cemapuane ngen bioa, sesudo'o mcikne neak Kiteb Hukum-Hukum kunei Allah ngen kute bangso Israel, makei dukut hisop ngen bulau bebirai warno mileak tuai.

²⁰ Samo menea o Musa madeak, “Dioba daleak de sah janjai kunei Allah de harus udi taat.

²¹ Sesudo'o ngen ca'o de serai, Musa mcik daleak o kulo neak Kemah Tuhan ngen kute alat-alat utuk semyang.

²² Memang temurut hukum agamo Yahudi, kute sesuaktau senucai ngen daleak; ngen duso cuma dapet napun amen ade penumpahan daleak.”

Kurban Kristus mapus duso

²³ Ngen ca'o awei'oba barang-barang de jijai lambang hal-hal de neak surgo, perlu senucai. Tapi utuk hal-hal de neak surgo o suang perlu kurban de lebiak baik.

²⁴ Sebab Kristus coa masuk moi Ruang Sucai nea manusio, de cuma jijai lambang Ruang Sucai de sebeneane. Kristus masuk moi surgo suang; neak di Si uyo madep Allah utuk kepetingan ite.

²⁵ Imem Lai Yahudi tiep-tiep taun masuk moi Ruang Mahasucai neak lem Umeak Tuhan ngen mbin daleak dikup benatang. Tapi Kristus coa masuk utuk melei dirai-Ne berulang-ulang.

²⁶ Sebab amen awei o, do'o taine Si bi cet saro sejok dunio yo ade. Tapi nyatone, uyo pado zaman akhir yo, Si teko debat bae utuk mapus duso ngen melei dirai-Ne suang.

²⁷ Allah bi temtep bahwo manusio matei debat bae, sesudo'o Allah nhukum.

²⁸ Awei o kulo Kristus debat bae senreak sebagai kurban utuk mapus duso tun dau. Si bakea teko igai keduai kilaine, iso utuk semlesei persoalan duso, tapi utuk semlamat tun-tun de mbot Si.