IBRANI 8 - JANJAI BLAU Lem Bahaso Jang Bebilai

Yesus Imem Lai ite

¹ Inti kunei kute kecek yo adeba: Ite temuan Imem Lai de awei o, de temot meriteak besamo Allah Mahabesar neak surgo.

² Si kemerjo tugas sebagai Imem Lai neak Ruang Mahasucai, adeba neak lem Kemah Tuhan de sejati, de nea Tuhan, iso manusio.

³ Tiep Imem Lai naket utuk melei kurban atau melei persembahan ngen Allah. Awei o kuloba Imem Lai ite; Si harus temuan sesuaktau utuk nelei sebagai persembahan.

⁴ Amen Si ade neak dunio yo, Si coa bakea jijai imem, sebab bi ade imem de melei kurban de tenuntut lem hukum agamo Yahudi.

⁵ Pekerjaan de tobo'o nea sebagai imem o sebeneane cuma gambaran ngen bayangan kunei jano de ade neak surgo. Do'o sudo nelei namen Allah ngen Musa bel'o, ketiko Musa lok temgok Kemah Tuhan. Allah madeak ngen Musa, “Inget! Kutene o harusba ko nea temurut kerako kemah de kenten ngen ko neak das tebo.”

⁶ Tapi uyo Yesus dapet tugas imem de uak lebiak mulio kunei de kenerjo imem-imem o. Sebab janjai de nea-Ne antaro Allah ngen manusio, adeba janjai de lebiak baik kerno das dasar janjai utuk hal-hal de lebiak baik.

⁷ Amen coa ade ku'ang neak janjai de pertamo, mako coa perlu nea janjai de keduai.

⁸ Tapi Allah bi namen saleak kunei umat-Ne, sehinggo Allah madeak, “Inget, bakea teko waktaune, Uku bakea menea janjai de blau ngen bangso Israel, ngen bangso Yehuda.

⁹ Iso awei janjai de Uku nea ngen leluhur tobo'o pado waktau Uku mutun tobo'o keluea kunei Mesir. Tobo'o coa setia ngen janjai de Uku nea ngen tobo'o; do'oba sebabne Uku coa dulai ngen tobo'o.

¹⁰ Tapi uyo, dioba janjai de bakea Uku nea ngen umat Israel pado bilai-bilai de bakea teko, nadeak Tuhan: Uku bakea mpek hukum-Ku moi lem pekeran tobo'o, ngen temulisne neak atei tobo'o. Uku bakea jijai Allah tobo'o, ngen tobo'o bakea jijai umat-Ku.

¹¹ Tobo'o coa perlu majea sesamo wargane, atau melei namen ngen saudarone, ‘Kenalba Tuhan.’ Sebab tobo'o kute, lai titik, bakea kemnal Uku.

¹² Uku bakea mapun saleak tobo'o, ngen coa minget igai duso-duso tobo'o.”

¹³ Ngen madeak suaktau janjai de blau, Allah menea janjai de pertamo o jijai tuai ngen usang; jano de sudo tuai, bakea segro nyep.