IBRANI 5 - JANJAI BLAU Lem Bahaso Jang Bebilai

¹ Tiep Imem Lai niliak kunei antaro umat, naket utuk mlayan Allah sebagai wakea tobo'o. Tugasne adeba melei persembahan ngen Allah pelei ngen kurban utuk pengampunan duso.

² Imem Lai o suang lemah lem dau hal, kerno'o si dapet lemah lembut teadep tun-tun de coa namen jejano ngen de sesat dalenne.

³ Ngen kerno si suang lemah, mako si harus melei persembahan kurban, iso bae kerno duso-duso umat, tapi kulo kerno duso-dusone suang.

⁴ Coa ade suang kulo de maket diraine suang jijai Imem Lai. Allah suangba de maket Si. Awei de sudo tejijai ngen Harun.

⁵ Awei o kulo Kristus. Si coa maket dirai suang jijai Imem Lai. Allah suangba de maket Si. Allah madeak ngen-Si, “Koba Anok-Ku; pado bilai yo Uku jijai Bapa-Nu.”

⁶ Neak penan luyen Allah madeak kulo, “Ko adeba Imem selamo-lamone, awei imem Melkisedek atau de termasuk lem royot Melkisedek.

⁷ Pado waktau Yesus idup neak dunio yo, Si bedu'o, bekinoi ngen sungguak-sungguak pado Allah, de sanggup semlamat-Ne kunei matei. Ngen kerno Si tunduk ngen Allah seca'o hormat, mako Si teni'uk.

⁸ Yesus adeba Anok Allah, tapi kunyau awei o, Si belajea jijai taat liwet penderitaan-Ne.

⁹ Mako sesudo Si jenijai penyelamat de sempurno, Si jijai sumber keselamatan de kekal bagiak kute tun de taat ngen-Si,

¹⁰ Allah kulo madeak Si sebagai Imem Lai, awei Imem Melkisedek atau de termasuk lem royot Melkisedek.

Peringatan

¹¹ Tetang penan Yesus sebagai Imem Lai, ade dau de perlu keme melei namen ngen ko, tapi saro utuk tem'angne sebab udi cendok ngertai.

¹² Sebeneane bi waktaune bagiaknu utuk jijai gu'au, tapi nyatone udi masiak perlu belajea kunei tun luyen tetang syari'ah ajaran Allah. Udi dapet temimo kembuk de telo; udi masiak harus mbuk susu bae.

¹³ Tun de masiak mbuk susu, taine si masiak titik; si ati ade pengalaman tetang jano de benea ngen jano de saleak.

¹⁴ Kembuk de telo adeba utuk tun lai de kerno pengalaman, bi dapet mbeda ipe de baik ngen coa.