FILIFI 2 - JANJAI BLAU Lem Bahaso Jang Bebilai

Nasihat supayo jijai do ngen merendeak dirai awei Kristus

¹ Udi kuet, kerno udi jijai do ngen Kristus. Ngen udi terhibur kerno Kristus sayang ngen udi! Udi nipin Roh Allah, ngen udi kulo samo kemasiak serto mpek belas kasiak do ngen de luyen.

² Nah, cubaba udi benea-benea semnang ateiku ngen hal-hal yo: idup do atei ngen kasiak de serai, ngen pekeran de serai ngen tujuan de serai.

³ Jibeakba menea sesuaktau kerno kepentingan suang, atau utuk ombong. Sebelekne lokba udi memasing ngen rendeak atei manggap tun luyen lebiak kunei dirai suang.

⁴ Kenliakba kepentingan tun luyen; jibaek cuma kepentingan suang.

⁵ Lokbah udi bejiwo awei Yesus Kristus:

⁶ Pado dasarne Si serai ngen Allah, tapi Si coa meding bahwo keadaan-Ne de ilahi o harus tena'en-Ne.

⁷ Sebelekne, Si temanggea kutene lajau jijai awei suang hamba. Si jijai awei manusio, ngen keten idup awei manusio.

⁸ Si merendeak dirai, ngen idup taat ngen Allah sapei matei – adeba matei senalib.

⁹ Sebab do'oba Allah maket Yesus leleketne, serto melei ngen-Ne kekuasaan de lebiak lai kunei pado kute kekuasaan de luyen.

¹⁰ Mako utuk menghormati Yesus, kute makhluk de neak surgo, ngen de neak bumai, serto de neak beak bumai, bakea nyembeak Si.

¹¹ Tobo'o kutene bakea makau bahwo Yesus Kristusba Tuhan; ngen awei yo mulioba Allah Bapa.

Besinea awei cahayo de tem'ang dunio

¹² Saudaro-saudaroku de tekasiak, ko bogoa taat; kerno'o tepba kemerjo keselamatamnu ngen saben ngen gentar, iso bae awei waktau uku masiak ade, tapi lebiak igai uyo waktau uku coa ade,

¹³ kerno Allahba de kemerjo neak lem dirainu utuk menea udi rela ngen sanggup semnang atei Allah.

¹⁴ Kenerjoba kute sesuaktau ngen coa ngerunyam atau betekea.

¹⁵ Supayo udi coa ade aib ngen coa ade noda, sebagai anok-anok Allah de coa ade cacet, neak tengeak-tengeak tun-tun kidek ngen seset yo, sehinggo udi becahayo neak antaro tobo'o awei bitang-bitang neak dunio.

¹⁶ Samo bepegong pado firman kehidupan, kunyau uku dapet mbangga pado bilai Kristus bahwo uku coa percuma besamo ngen pepayeak.

¹⁷ Mukin uku bakea nunuak ngen daleakku jijai awei kurban curahan neak das jano de udi melei ngen Allah sebagoi tando bahwo udi pecayo ngen Si. Amen memang do'o harus awei o, uku bersyukur das hal o ngen milau beriang ngen udi.

¹⁸ Awei o kulo lokne udi kulo meding senang ngen milau riang ngen uku.

Timotius ngen Epafroditus

¹⁹ Tapi lem Tuhan Yesus kuma'ep segro mbo Timotius ngenko, supayo tenang kulo ateiku kerno bito tetang udi.

²⁰ Cumo Timotiusba dedone tun de do jiwo ngen uku, ngen sungguak-sungguak meker kebahagiannu.

²¹ Kute de luyenne cuma mesoa kepentinganne suang, iso kepentingan Kristus Yesus.

²² Udi suang sudo kemliak buktine bahwo Timotius beguno. Si bi kerjo benek besamo uku utuk melei namen Bito Baik kunei Allah. Keme beduai awei anok ngen bapok bae.

²³ Sebab'o, segro sesudo uku namen awei ipe pekaro uku berakhir be, uku bakea mutus si ngen udi.

²⁴ Uku pecayo bahwo ngen petulung Tuhan, uku suang kulo coa an igai bakea mulau udi kulo.

²⁵ Tetang saudaro ite Epafroditus de udi mbo utuk temulung uku, uku meraso perlu utuk meluak si belek igai ngen udi. Si bi kemuat uku lem kerjo ngen bejuangan.

²⁶ Si indau sekilai pado Saudaro kutene, ngen si liseak kerno udi sudo dapet bito bahwo si bolon.

²⁷ Memang betoa si bolon sapei gesea matei. Tapi Allah ibo ngen si, iso ngen si bae, tapi ngen uku kulo, supayo uku jibeak jijai tambeak ibo igai.

²⁸ Do'o sebabne tambeak lai kulo kelokku utuk meluak si belek igai ngen udi, supayo udi riang igai amen udi temau ngen si, ngen atei uku kulo jijai tenang.

²⁹ Jijai, senambutba si ngen kute riang atei sebagai suang saudaro do imen. Negoba kute tun de awei si.

³⁰ Utuk kepentingan kerjo Kristus, si gesea matei; si temuak nyabaine utuk melei petulung ngen uku das gennu.