EFESUS 6 - JANJAI BLAU Lem Bahaso Jang Bebilai

Anok-anok ngen Indok Bapok

¹ Hoi anok-anok, taatba ngen tun tuaine neak lem Tuhan, kerno awei'oba de benea.

² Hormatba ngen tun tuainu – dio adeba periteak de peting, awei de nyato kunei janjai yo:

³ “Supayo udi bahagia ngen panjang omor neak bumai.”

⁴ Ngen udi, Bapok-Bapok, jibeakba menea anok-anoknu jijai mengiak lem ateine, tapi najeaba tobo'o neak lem ajaran ngen nasihat Tuhan.

Hamba ngen Tuan

⁵ Saudaro-saudaro de jijai budok, Taatba ngen periteak tuannu de neak dunio yo. Neaba do'o ngen perasaan hormat, taat serto ngen sungguak-sungguak, serai awei udi taat ngen Kristus.

⁶ Jibeak cuma neak adep tobo'o bae utuk semnang atei manusio. Tapi lokba udi meneane sebagoi hamba Kristus de gidong temotoa kelok Allah ngen sepenuak atei.

⁷ Kerjo de udi nea sebagoi hamba o, lokba udi kerjo ngen atei riang awei tun-tun de melayan Tuhan, iso manusio.

⁸ Udi namen bahwo tiep tun, baik hamba atau tun bebas, amen si bi menea baik, si bakea temimo balasanne kunei Tuhan.

⁹ Saudaro-saudaro de jijai tuan, neaba awei o kulo te'adep tobo'o ngen jibeakba pakei ngancam. Inget bahwo udi ngen hamba-hambanu o, sesamo temuan do majikan, adeba Tuhan de neak surgo, Si coa kemliak papea.

Senjato Allah de lekep

¹⁰ Akherne, lokba udi kuet neak lem Tuhan, neak lem kekuatan kuaso-Ne.

¹¹ Nakeiba kute perlengkapan perang de nelei Allah ngen udi, supayo udi dapet betaen melawen tipu muslihat Iblis.

¹² Sebab ite berjuang isone melawen manusio, tapi melawen kekuatan kute iblis-iblis de kemuaso zaman de kidek yo. Ite melawen kekuatan roh-roh kidek de kemuaso udara.

¹³ Sebab o mokba kute perlengkapan senjato Allah, supayo udi dapet menea perlawanan pado bilai de kidek o ngen tep je, sesudo udi semlesei kute sesuaktau.

¹⁴ Jijai, lokba udi siap siaga, nakeiba kesetiaan ngen Allah sebagai teng, ketulusan sebagai bajau besainu.

¹⁵ Lokba kerelaan utuk melei namen Bito Baik de mbin sejahtera jijai sepatunu.

¹⁶ Tiep waktau nakeiba percayonu ngen Tuhan sebagoi senjato penangkis, ngen imen o udi dapet madem kute anok panah beropoi kunei tun jahat.

¹⁷ Mokba keselamatan sebagai tudung baja, ngen kecek Allah sebagai pedang kunei Roh Allah.

¹⁸ Neaba kutene o samo bedu'o utuk minoi tulung ngen Allah, bedu'oba tiep waktau neak lem Roh Allah. Lokba udi bogoa siap ngen jibeak nyereak. Bedu'oba utuk kute umat Allah.

¹⁹ Ngen bedu'oba kulo utuk uku, supayo pado waktau uku miling, Allah melei ngen uku kecek-kecek de benea, supayo uku ngen binai melei namen resio Bito Baik o.

²⁰ Kerno Bito Baik o ba, uku jijai suang utusan de nasuk sel. Bedu'oba supayo uku binai miling tetang Bito Baik o, de awei ipe seharusne uku miling.

Salam terakhir

²¹ Supayo udi namen keadaanku ngen kerjoku, mako Tikhikus, saudarote ngen pelayan de setia lem kerjo Tuhan, bakea melei namen ngen udi kute sesuaktau tetang uku.

²² Do'oba sebabne uku mutus si ngen udi utuk melei namen keadaan keme ngen udi kutene, supayo si mibur ateinu.

²³ Damoi sejahtera ngen kasih ngen imen kunei Allah Bapa ngen kunei Tuhan Yesus Kristus semerto udi kutene.

²⁴ Angerah Allah semerto kute tun, de mengasihi Tuhante Yesus Kristus ngen kasih de coa benaso. Hormat keme, Paulus