EFESUS 4 - JANJAI BLAU Lem Bahaso Jang Bebilai

Kesatuan jemaat ngen karunio de beda

¹ Sebab o, uku, tun de nasuk sel kerno Tuhan, melei nasihat ngen udi, supayo idupnu sesuoi ngen kedudukannu sebagoi tun de sudo nok Allah.

² Lokba udi rendeak atei, lemah lembut, ngen sabar. Kentenba kasiaknu ngen saling temulung.

³ Berusahoba sungguak-sungguak utuk idup ngen damoi supayo kesatuan Roh Allah tep terpeliharo.

⁴ Cuma ade do awok, ngen do Roh. Awei o kulo udi nok utuk do harapan de serai.

⁵ Cuma ade do Tuhan, do imen, do baptisan,

⁶ ngen do Allah de jijai Bapa kute tun. Siba Tuhan semesta alam, de bekerjo liwet kutene, ngen bekuaso neak lem kutene.

⁷ Ite memasing temimo anugerah temurut jano de nelei Kristus.

⁸ Lem Kiteb Sucai tetulis, “Ketiko Si kenek moi penan de lekat, Si mbin tawanan-tawanan; Si melei pelei-pelei ngen manusio.”

⁹ Iso, “Si bi kenek” taine bahwo Si kulo bi tu'un moi bagian bumai de paling beak?

¹⁰ Si de sudo tu'un, Si kulo de sudo kenek uak lebiak lekat kunei pado kute lenget, utuk melei kute sesuaktau.

¹¹ Siba de melei pelei-pelei ngen manusio, pa'o naket-Ne jijai rasul, de luyen jijai nebai, de luyen igai jijai tukang melei Bito Baik o, ngen de luyenne naket-Ne kulo jijai gu'au-gu'au ngen gembala-gembala.

¹² Dio nea-Ne supayo umat Allah lekep sepenuakne kunyau dapet melayani Tuhan ngen mbangun awok Kristus.

¹³ Ngen awei o ite kute jijai do ngen imen de serai ngen pengertian de serai tetang Anok Allah. Ngen ite jijai tun-tun lai de tambeak an tambeak sempurno awei Kristus.

¹⁴ Mako ite coa jijai anok-anok de terombang-ambing ngen coa tau arahne ngen memecem ajaran kunei tun-tun licik. Tobo'o menea tun seset ngen tipu muslihat tobo'o.

¹⁵ Sebelekne, ite harus bepegong ngen kebenaran neak lem kasiak, sehinggo lem kute hal ite tambeak an tambeak jijai sempurno awei Kristus, de jijai Pemipin ite.

¹⁶ Neak beak pipinan-Ne, kute anggota awok o tesusun rapi, ngen neket jijai do ngen pelayanan kute bagianne. Amen tiep-tiep anggota o bekerjo awei de seharusne, mako kute awok o bakea idup jijai lai ngen kuet lem kasiak.

Manusio blau

¹⁷ Sebab o, uku madeak ngen uku temges dio ngen udi neak lem Tuhan: Jibeak idup igai awei tun-tun de coa kemnal Allah ngen pekeranne de sio-sio.

¹⁸ Pekeran tobo'o bi kelem, uak kunei idup de asalne kunei Allah, kerno tobo'o coa temuan pengetahuan jejano tetang Allah kerno tobo'o telo atei.

¹⁹ Tobo'o bi coa temuan selek igai, sehinggo tobo'o temotoa kute hawo nafsu, serakah menea kute plep kidek.

²⁰ Tapi Yesus Kristus de udi kemnal iso awei o.

²¹ Udi bi temi'uk tetang Si. Ngen sebagoi penotoa-penotoa-Ne, udi bi najea kulo tetang sifet-sifet Allah de ade ngen-Si.

²² Sebab o tenanggeaba manusio an ngen pola idup an de gidong nusak ngen kelok-kelokne de seset.

²³ Lokba atei ngen pekerannu jijai blau kutene.

²⁴ Lokba udi idup sebagoi manusio blau de nea temurut kelok Allah neak lem kebenaran ngen kesucian de sesungguakne.

²⁵ Kerno o, saudaro-saudaro kutene, jibeak igai mike. Jujurba ngen tun luyen, sebab ite kute adeba samo-samo anggota awok Kristus.

²⁶ Amen udi ramah, jibeakba udi menea duso, jibeakba bogoa mengiak tiep bilai,

²⁷ supayo Iblis coa dapet kesempatan.

²⁸ Tun de galok maling, jibeakba si maling igai. Sebelekne si harus kerjo supayo dapet nafkahne ngen jujur, dapet mulung tun de peset.

²⁹ Jibeakba ade kecek de coa baik keluea kunei bibianu, tapi pakeiba kecek de baik utuk mbimbing ngen mulung tun luyen. Kecek-kecek awei o bakea jijai kebaikan ngen tun-tun de temi'ukne.

³⁰ Jibeakba udi menea atei Roh Allah jijai ibo, de sudo memateraikan udi ayok bilai penyelamatan.

³¹ Nuangba kute perasaan gis atei, garang mengiak, gu'ok ngen fitneak, awei o kulo kute kejahatan.

³² Tapi lokba udi ramah te'adep tun luyen, baik atei ngen samo melei apun, awei Allah bi mapun udi neak lem Kristus.