3 YOHANES 1 - JANJAI BLAU Lem Bahaso Jang Bebilai

Salam

¹ Saudaro Gayus de tecito! Uku, pemipin jemaat, de sungguak-sungguak mengasiak udi.

² Uku bedu'o semoga udi sehat-sehat ngen kutene baik-baik ngen udi, serai awei jiwonu baik-baik kulo.

³ Uku kemliak riang ketiko kekedau saudaro Kristen teko ngen melei namen ngen uku padeak setiane saudaro teadep Allah de benea, sebab memang saudaro bogoa idup temurut ajaran Allah.

⁴ Coa ade de dapet menea uku kembiak riang, kunei pado temi'uk bahwo anok-anok uku idup temurut ajaran Allah

Gayus nujai

⁵ Saudaroku! Saudaro kembiak setia lem pekerjaan de saudaro nea utuk tun-tun de pecayo; bahkan tun-tun de pecayo de ati saudaro kemnal, saudaro melayanne.

⁶ Tobo'o bi melei saksai neak adep jemaat tetang kasih udi. Tulungba tobo'o supayo dapet temrus pemaneu tobo'o, ngen do ca'o de semnang atei Allah.

⁷ Sebab lem pemaneu utuk melayan Kristus, tobo'o coa temimo batuan jano bae kunei tun-tun de coa kemnal Allah.

⁸ Kerno o, ite harus temulung tun-tun de samo-samo bi pecayo ngen Kristus, supayo ite dapet milau lem usaho tobo'o utuk melei namen ajaran de benea kunei Allah.

Diotrefes ngen Demetrius

⁹ Uku sudo temulis pesen de singkat utuk jemaat, tapi Diotrefes de lok jijai pemipin neak lem jemaat, coa lok temotoa uku.

¹⁰ Kerno o, amen uku teko, uku bakea mukea kute de sudo neane, adeba tetang hal-hal kidek ngen dusta de si madeak tetang keme. Tapi kutene o ati cukup utuk si. Pado waktau tun-tun sesamo Kristen o teko, si coa lok temimo tobo'o. Malah si temgeak tun-tun de lok temimo saudaro-saudaro o, si meluak tun-tun o keluea kunei jemaat.

¹¹ Saudaro de tecito, jibeakba nirau de kidek, tapi de baik. Tun de menea baik adeba de Allah temuan tapi tun de menea jahat ati kemnal Allah.

¹² Kute tun mujai Demetrius, Allah kulo mujaine. Keme kulo mujaine, ngen saudaro namen bahwo jano de keme melei namen dapet saudaro pecayo.

Penutup

¹³ Dau nien de harus uku nadeak ngen udi, tapi uku meding lebiak baik jibeak liwet su'et.

¹⁴ Uku ma'ep cigai an igai bakea temau ngen udi, ite bakea miling langsung.

¹⁵ Damoi sejahtera semerto udi. Salam kunei kekuat-kekuatnu. Semapeiba salamku utuk kekuat ite.