2 TIMOTIUS 2 - JANJAI BLAU Lem Bahaso Jang Bebilai

Prajurit Kristus de setia

¹ Timotius, anokku! Lokba ko jijai kuet ngen rahmat de nelei ngen ite, kerno ite jijai do ngen Kristus Yesus.

² Ajaran de bel'o bi ko temi'uk kunei uku neak adep tun dau, lokba ko minoi supayo najea kulo ngen tun-tun de dapet pecayo ngen de pacok majea tun luyen.

³ Ko harus milau saro sebagai prajurit Kristus Yesus de setia.

⁴ Suang prajurit de gidong tugas, si bakea sibuk suang, sebab si lok semnang atei panglimane.

⁵ Suang olahragawan coa bakea jijai juaro neak lem pertandingan, amen si coa taat ngen peraturan-peraturan.

⁶ Petani de sudo kerjo keras, siba de pertamo-tamo berhok dapet asea tanem.

⁷ Perhatikanba jano de uku madeak o, sebab Tuhan bakea melei ngen ko kesanggupan utuk ngertai kutene.

⁸ Tingetba hal yo: Bito Baik de uku melei namen o adeba bito tetang Yesus Kristus, royot Daud; Siba Kristus de sudo idup igai kunei matei.

⁹ Kerno melei namen Bito Baik o ba, uku jijai saro; malah sapei neket ngen ratoi awei penjahat. Tapi Firman Allah coa dapet neket ngen ratoi.

¹⁰ Do'oba sebabne uku sabar temanggung kutene o demi kepentingan tun-tun de sudo niliak Allah, supayo tobo'o kulo dapet keselamatan de nelei liwet Kristus Yesus, ngen kemulioan de kekal.

¹¹ Sungguak benea kecek yo, “Amen ite bi matei besamo Si, ite bakea idup kulo besamo Si.

¹² Amen ite tep tabah, ite bakea meriteak kulo besamo Si. Amen ite muker Si, Si kulo bakea muker ite.

¹³ Amen ite coa setia, Si tep setia, kerno Si coa dapet muker dirai-Ne suang.”

Pekerjo de dapet nujai

¹⁴ Lokba ko minget tun-tun tetang kutene yo. Neak adep Allah, meleiba nasihat ngen tobo'o supayo jibeak tekea tetang istilah-istilah. Do'o coa ade gunone, malah cuma kemacau tun-tun de temi'ukne.

¹⁵ Lokba ko berusaho sungguak-sungguak supayo Allah makau ko sebagai tun de layak bekerjo utuk-Ne. Berusahoba supayo ko coa selek tetang kerjonu, meluyen majea seca'o tepat ajaran-ajaran benea kunei Allah.

¹⁶ Ne'uakba kecek-kecek de coa ade gunone ngen de mino Allah. Kecek-kecek de awei o cuma menea tun tambeak jahat.

¹⁷ Ajaran tun-tun o tesebea awei olon kanker. Neak antaro tobo'o termasuk Himeneus ngen Filetus.

¹⁸ Tobo'o bi nyeleweng kunei ajaran de benea, ngen kemacau pecayo pa'o tun. Tobo'o madeak bahwo idup igai kunei matei bi tejijai.

¹⁹ Tapi dasar de mpek Allah o coa dapet nunyak. Neak dasne tetulis dio, “Tuhan namen tun-tun de temuan-Ne”, ngen “Tun de madeak bahwo si de Tuhan temuan, tun o harus bedan menea de saleak”.

²⁰ Neak lem umeak de lai ade memecem perabot. Ade de nea kunei pirok atau emas, tapi ade kulo de nea kunei kieu atau pitok. Ade de nakei utuk keperluan istimewa, ade kulo de nakei utuk keperluan biaso.

²¹ Tun de mersi awokne kunei kute de kidek, tun o bakea nakei utuk keperluan istimewa. Si jijai de khusus ngen beguno bagiak tuanne. Si seniap utuk nakei bagiak tiep kerjo de baik.

²² Sebab o, Ne'uakba nafsu tun u'ai. Berusahoba utuk idup temurut kelok Allah, setia ngen ajaran-Ne ngen mengasihi sesamo, serto temuan atei de tenang. Idupba awei o besamo tobo'o de menggang minoi tulung ngen Tuhan, ngen atei de sucai.

²³ Jibeakba milau lem selisiak tun-tun bodong de coa namen jejano. Ko namen bahwo kute o cuma jijai tekea.

²⁴ Tun de bekerjo utuk Tuhan coa patut tekea; si harus ramah te'adep kute tun, ngen dapet majea tun seca'o baik ngen sabar.

²⁵ Si harus lemah lembut majea tun-tun de galok melawen; mudah-mudahan Allah melei kesepatan ngen tun-tun o utuk tobat kunei duso-duso tobo'o ngen kemnal ajaran de benea.

²⁶ Ngen awei o tobo'o jijai sadar igai, ngen bebas kunei perangkap Iblis de sudo temaen tobo'o ngen makso tobo'o motoa kelokne.