2 TIMOTIUS 1 - JANJAI BLAU Lem Bahaso Jang Bebilai

^1-2 Timotius, anokku de uku semayang! Uku, Paulus, temulis su'et yo ngen ko, ma'ep Allah Bapa ngen Tuhan te Kristus Yesus melei berkat, rahmat, sejahtera ngenko. Das kelok Allah uku naket jijai rasul Kristus Yesus, nutus utuk melei namen tetang idup de jenanjai Allah. Idup o ite temimo kerno jijai do ngen Kristus Yesus.

Mucep syukur ngen nasehat utuk tekun

³ Uku mucep syukur ngen Allah de uku melayan ngen atei nurani de sucai awei de nea ninik puyang uku bel'o. Uku bogoa mucep mokasiak ngen Allah tiep kilai uku tinget ngen ko lem du'o, baik lueng atau kelmen.

⁴ Uku tinget ngen kesedihan ateinu. Do'oba sebabne uku lok nien temau ngen ko supayo uku dapet benea-benea jijai riang.

⁵ Uku tinget ngen kepercayaannu de sungguak-sungguak ngen Kristus, serai awei kepercayaan niniknu Lois ngen indoknu Eunike. Ngen uku yakin ko kulo pecayo awei o.

⁶ Sebab o uku minget ko utuk midup karunio de nelei Allah ngen ko pado waktau uku pek tangenku moi dasnu.

⁷ Sebab Allah melei ngen ite iso Roh de menea ite jijai saben. Sebelekne Roh Allah o menea ite jijai kuet, penuak kasiak ngen tertib.

⁸ Sebab o jibeakba selek melei saksai tetang Tuhan ite ngen jibeakba selek kerno uku, de nasuk sel kerno Si. Sebelekne, lokba ko ngen kekuatan kunei Allah, meding saro utuk Bito Baik o.

⁹ Allah semlamat ite ngen menok ite supayo jijai umat-Ne suang. Si menea o iso kerno jano de ite bi kenerjo, tapi kerno rencano-Ne suang ngen rahmat-Ne. Si melei ite rahmat-Ne liwet Kristus Yesus ayok dunio yo ade.

¹⁰ Ngen uyo, Allah kemten rahmat-Ne o ngen ite liwet tekone Rajo Penyelamat ite Kristus Yesus. Yesus maleak kuaso maut ngen mbin idup de kekal liwet Bito Baik o.

¹¹ Utuk melei namen Bito Baik o ba Allah maket uku jijai rasul ngen gu'au.

¹² Do'oba sebabne uku menderita kutene yo, tapi uku tep pecayo, sebab uku namen nien api de uku pecayo. Uku pecayo bahwo jano de sudo Si pecayo ngen uku. Si sanggup kulo jemagone sapei pado Bilai Kiamat.

¹³ Totoaba ngen sungguak-sungguak ajaran de benea de sudo uku nelei ngen ko. Ngen lokba ko tep menea o lem imen ngen kasiak neak lem Kristus Yesus.

¹⁴ Ngen tulung kunei Roh Allah de idup neak lem ite, lokba ko jemago baik-baik hal-hal de bego de sudo cayo ngen udi.

¹⁵ Ko namen bahwo kute tun neak wilayah Asia bi teminggea uku, termasuk kulo Figelus ngen Hermogenes.

¹⁶ Tapi keluargo Onesiforus bi kekedau kilai semnang ateiku. Semoga Tuhan melei rahmatne ngen keluargo Onesiforus. Kunyau uku neak lem sel, Onesiforus coa selek ngen keadaan uku o.

¹⁷ Ketiko sapei neak Roma, si terus berusaho mesoa uku sapei si temau ngen uku.

¹⁸ Ngen uku namen bahwo neak Efesus si dau nien temulung uku. Semoga Tuhan melei rahmatne ngen si pado bilai Tuhan mukum kute umat manusio.