2 TESALONIKA 3 - JANJAI BLAU Lem Bahaso Jang Bebilai

Bedu'oba untuk keme

¹ Selanjutne, Saudaro-saudaro, bedu'oba utuk keme. Bedu'oba supayo bito kunei Tuhan dapet terus tesebea ngen gacang ngen tenimo ngen baik, serai awei de sudo tejijai ngen udi bel'o.

² Bedu'oba kulo supayo Allah semlamat keme kunei tun-tun pengacau ngen jahat. Sebab coa kute tun pecayo ngen bito kunei Tuhan o.

³ Tapi Tuhan setia. Si bakea kemuet udi ngen jemago udi kunei Si de kidek.

⁴ Ngen keme pecayo penuak ngen Tuhan tetang udi, bahwo udi dong menea ngen uku bakea terus menea jano de keme pesen ngen udi.

⁵ Kirone Tuhan mbimbing udi utuk lebiak ngertai bahwo Allah kemasiak udi ngen bahwo Kristus melei ketabahan ngen udi.

Wajib bekerjo

⁶ Saudaro-saudaro, das kuaso Tuhan Yesus Kristus, keme meriteak supayo udi me'uak kute Saudaro, de idup bemalas-malas, ngen de coa temurut ajaran-ajaran de keme melei ngen tobo'o.

⁷ Udi suang namen bahwo udi harus temirau contoh keme. Keme coa bemalas-malas ketiko keme ade neak tengeak-tengeak udi.

⁸ Keme coa mbuk kembuk tun ngen coa masenne. Sebelekne kebilai kelmen keme bekerjo setengeak matei supayo keme coa semaro api kulo kunei antaro udi.

⁹ Keme menea o iso kerno keme coa berhok utuk o, meluyen kerno keme lok jemijai dirai keme teladan bagiak udi.

¹⁰ Pado waktau keme masiak ade neak tengeak-tengeak udi, keme melei peraturan yo, “Tun de coa lok kerjo, coa buliak mukmei.”

¹¹ Keme madeak yo kerno keme temi'uk, bahwo ade tun de coa tertib idupne ngen coa kerjo, meluyen sibuk ngen hal-hal de coa beguno.

¹² Das kuaso Tuhan Yesus Kristus keme meriteak tun-tun o ngen melei peringatan, supayo tobo'o kerjo seca'o tenang ngen mesoa nafkah tobo'o suang.

¹³ Tapi udi jibeak jemau menea baik.

¹⁴ Amen ade tun de coa lok temi'uk jano de keme nadeak lem su'et yo. Waspadaba te'adep tun awei o ngen jibeak begaul ngen si supayo si selek.

¹⁵ Tapi jibeakba manggap si musuak, tapi meleiba nasihat ngen si sebagai suang Saudaro.

Salam

¹⁶ Tuhan adeba sumber kesejahteraan ite. Semoga Si bogoa melei ngen udi sejahtera lem kute hal. Semoga Tuhan semerto Saudaro kutene.

¹⁷ Salam kunei uku, Paulus. Uku suang de temulis salam yo. Dioba tando de tenulis lem tiep su'etku.

¹⁸ Kasiak karunio Yesus Kristus, Tuhan ite, semerto udi kutene. Hormat keme, Paulus