2 TESALONIKA 1 - JANJAI BLAU Lem Bahaso Jang Bebilai

¹ Saudaro-saudaro jemaat neak Tesalonika, de jijai umat Allah Bapa te ngen Tuhan Yesus Kristus! Keme, adeba Paulus, Silas ngen Timotius.

² Anugerah ngen damoi sejahtera kunei Allah, Bapa ite, ngen kunei Tuhan Yesus Kristus semerto udi.

Ucapan syukur ngen du'o

³ Keme Wajib bogoa mucep syukur ngen Allah kerno udi, Saudaro-saudaro. Ngen memang sepatutne keme menea awei o, sebab udi tambeak pecayo ngen Kristus, ngen udi tambeak mengasihi do ngen de luyenne.

⁴ Do'oba sebabne getai keme miling tetang udi tiep kilai keme semulau jemaat-jemaat Allah. Ngen bangga keme cemrito awei ipe udi tep pecayo ngen Kristus neak lem penganiayaan ngen penderitaan de udi meding.

⁵ Do'o adeba bukti tetang adeane penghakiman Allah: Udi bi meding saro kerno Dunio Blau Allah, ngen kerno o udi bakea nanggap patas utuk masuk moi lem kerajaan Allah.

⁶ Allah bakea menea jano de adea, ngen bakea males penderitaan ngen tun de menea udi jijai saro.

⁷ Ngen udi de uyo yo saro – aweai o kulo ngen keme – Allah bakea melei kelegaan pado bilai Tuhan Yesus tu'un kunei surgo ngen kemten dirai-Ne ngen malaikat-malaikat-Ne de penuak kuaso

⁸ ngen menea pembalasan te'adep tobo'o de coa lok kemnal Allah ngen coa taat ngen Bito Baik tetang Yesus Tuhan ite.

⁹ Tun-tun o bakea temimo hukuman kebinasoan selamo-lamone, nuang moi luea kunei lingkungan Tuhan ngen kunei kuaso-Ne de agung.

¹⁰ Kutene o bakea tejijai pado bilai Si teko be utuk diagungkan umat-Ne ngen utuk hormat kute tun de pecayo. Udi kulo bakea ade neak antaro umat Allah o, sebab udi bi pecayo ngen bito de keme semapei ngen udi.

¹¹ Do'oba sebabne keme bogoa bedu'o utuk udi. Keme bedu'o supayo Allah menea udi patas utuk idup temurut kelok-Ne; utuk do; oba Si menok udi. Semoga Allah, ngen kuaso-Ne, kemabul keloknu utuk menea baik, ngen jemijai sempurno kute kerjo de udi nea kerno pecayo ngen Kristus.

¹² Ngen awei o Tuhan te Yesus diagungkan ngen udi, ngen udi kulo diagungkan Yesus kerno kebaikan atei Allah ite ngen Tuhan Yesus Kristus.